མདུན་ངོས་སུ་བསྐྱོད། |   ཉར་ཚགས་བྱེད། |   མདུན་ངོས་སུ་བཀོད། |  རྒྱ་ཡིག་གི་དྲ་ངོས།

༄༅།།དགའ་ལྡན་ཁྲི་ཐོག་བརྒྱ་དང་བཞི་བ་རྗེ་བཙུན་བློ་བཟང་བསྟན་འཛིན་མཆོག

ཡོང་ཁུངས།   ངེད་དྲ་བ།     སྤེལ་དུས།  2017-08-13 10:37:18         ཀློག་ཐེངས།  
ཡིག་གཟུགས་ཇེ་ཆེར་གཏོང་། ཡིག་གཟུགས་ཇེ་ཆུང་གཏོང་།

དགའ་ལྡན་ཁྲི་པའི་བྱུང་རབས་མདོར་ཙམ་བརྗོད་པ།kq6རྗེ་ཙོང་ཁ་པའི་དྲ་བ།

སྤྲང་པོའི་བུ་ལ་ཡོན་ཏན་ཡོད་ན། དགའ་ལྡན་གསེར་ཁྲིར་བདག་པོ་མེད།kq6རྗེ་ཙོང་ཁ་པའི་དྲ་བ།

33333.jpgkq6རྗེ་ཙོང་ཁ་པའི་དྲ་བ།

འཇམ་མགོན་རྒྱལ་བ་གཉིས་པ་ཤར་ཙོང་ཁ་པ་རྗེ་བཙུན་བློ་བཟང་གྲགས་པ་མཆོག་རབ་བྱུང་དྲུག་པའི་མེ་བྱ་ཕྱི་ལོ་ ༡༣༥༧ ལོར་སྐུ་འཁྲུངས། དགུང་ལོ་གསུམ་གྱི་དུས་སུ་དགེ་བསྙེན་གྱི་སྡོམ་པ་བཞེས། དགུང་ལོར་བདུན་ལ་ཕེབས་པ་ན་དགེ་ཚུལ་གྱི་སྡོམ་པ་བཞེས་ཏེ་མཚན་ལ་བློ་བཟང་གྲགས་པ་ཞེས་གསོལ། དགུང་ལོ་བཅུ་དྲུག་ལ་ཕེབས་པ་རབ་བྱུང་དྲུག་པའི་ཆུ་བྱི་ལོ་ལ་དབུས་སུ་སློབ་གཉེར་ལ་ཕེབས་ཐོན་མཛད། དབུས་སུ་འབྱོར་ནས་བཟུང་སྟེ་དབུང་གཙང་གི་མཁས་བཙུན་གྲུབ་པའི་རྣམ་ཐར་ཅན་གྱི་བླ་མ་མང་པོའི་ཞབས་ལ་གཏུགས་ཏེ་ཆོས་གྲྭ་ཆེ་ཁག་ཐམས་ཅད་ཀྱི་ནང་དུ་སློབ་གཉེར་དང་གྲྭ་སྐོར་སོགས་མཛད་ཅིང་། མདོ་སྔགས་ཀྱི་གཞུང་ཆེན་པོ་ཁག་གཙོ་བོར་གྱུར་པའི་བཅུ་ཕྲག་རིག་པའི་གནས་མཐའ་དག་ལ་འདི་མ་གཟིགས་བྱ་བ་དང་འདི་མ་གསན་བྱ་བ་ཞིག་མེད་པར་མཛད་པས་མཁས་པའི་སྙན་གྲགས་གངས་རིའི་ལྗོངས་ཙམ་མ་ཟད་རྒྱ་སོག་གི་ཡུལ་གྲུ་ཀུན་ཏུ་ཁྱབ་སྟེ་རྒྱ་ནག་གོང་མས་ཀྱང་གདན་ཞུ་ལན་གཅིག་མིན་པ་འབྱོར་ཡང་རྒྱལ་བསྟན་རིན་པོ་ཆེའི་མདོ་སྔགས་ཀྱི་གཞུང་དང་ལག་ལེན་ཆུང་ས་ནས་ཆོ་ག་ཆོས་སྤྱོད་ཚུན་ཆད་དང་། གཙོ་བོ་བསྟན་པའི་གཞི་མ་ཚུལ་ཁྲིམས་ཀྱི་བསླབ་པ་ལ་ཕྱོགས་ཡོངས་ནས་དག་ཐེར་ལེགས་པར་མཛད་བཞིན་པའི་འཕྲོ་སྐྱོང་བ་དང་། དེ་ལས་ཀྱང་གལ་ཆེ་བ་ཞིག་ནི་ཐེག་པ་ཆེན་པོའི་བསྟན་པ་ཡུན་དུ་གནས་པ་ལ་མདོ་སྔགས་ཡོངས་སུ་རྫོགས་པ་གང་ཟག་གཅིག་འཚང་རྒྱ་བའི་ལམ་ཉམས་ལེན་གྱི་རིམ་པའི་ལྟ་སྒོམ་སྤྱོད་གསུམ་གྱི་ཕྱོགས་གང་ནས་ཀྱང་འཁྲུལ་བའི་དྲི་མ་དང་བྲལ་བ་ཞིག་གནས་དགོས་ཤིང་། དེ་ནི་མཉམ་མེད་ཇོ་བོ་ཆེན་པོས་རྒྱལ་བའི་མདོ་སྔགས་ཀྱི་གཞུང་གི་དགོངས་པ་འགལ་མེད་དུ་བཀྲལ། དགེ་བཤེས་སྟོན་པས་སྲོལ་བཏོད། སྐུ་མཁྱེན་གསུམ་གྱིས་དར་ཞིང་རྒྱས་པར་མཛད་པའི་ཕྱག་སྲོལ་བཟང་པོ་བཀའ་གདམས་གཞུང་པ་བའི་ལུགས་ལྟར་འཛིན་སྐྱོང་གནད་ཆེ་བ་དང་། བོད་བརྒྱུད་ནང་བསྟན་དར་རྒྱས་ཡུན་གནས་ཡོང་བ་ལ། མདོ་སྔགས་ཀྱི་གཞུང་བཟང་པོ་རྣམས་ལ་འཆད་རྩོད་རྩོམ་གསུམ་གྱི་སྒོ་ནས་བསྟན་པ་བཤད་སྒྲུབ་གཉིས་ཀྱིས་འཛིན་ཚུལ་ལས་གཞན་པའི་བསྟན་པ་འཛིན་ཚུལ་མེད་པའི་ཚུལ་ལ་ཐུགས་རྩེ་གཅིག་ཏུ་འགྲུས་ཏེ་རྒྱ་སོག་གི་ཡུལ་དུ་མ་ཕེབས་ཅིང་། གདན་འདྲེན་ཞུ་བའི་མི་སྣ་སོགས་ལ་ཐུག་འཕྲད་ཙམ་ཡང་བཤོལ་བར་མཛད། མ་ཟད་རང་གི་གཅེས་པའི་ཨ་མར་ཐུག་ཏུ་ཡང་མ་ཕེབས་པར་འཆད་རྩོད་རྩོམ་པའི་སྒོ་ནས་སློབ་མ་གསོ་སྐྱོང་གི་བྱ་བ་ཉིད་གནད་ཆེ་བར་མཛད་དེ་སློབ་ཚོགས་ནམ་མཁའི་སྐར་ཚོགས་ལྟར་ཉིན་རེ་བཞིན་འཕེལ། སྐབས་དེ་དག་ཏུ་རྗེ་བླ་མ་འདི་ཉིད་ཀྱི་མཚན་སྙན་ཤིན་ཏུ་རྒྱས་ཏེ་དབུས་གཙང་གི་ཆེ་རྒུའི་གཙུག་ནོར་ལྟ་བུར་གྱུར། རྗེ་ཉིད་འབྱོན་བཞུད་མངས་པས་ཐུགས་སུན་ཞིང་། གནས་གཞི་དགོན་པ་གཏན་ཁེལ་ཞིག་དགོས་གལ་ཆེ་བ་ཡོད་པ་དང་། སློབ་ཚོགས་ཀྱི་ནང་ནས་དགོན་པ་རྙིང་པ་འབུལ་མཁན་དང་གསར་བ་གདིངས་བའི་བདག་རྐྱེན་བྱེད་ཟེར་མཁན་མང་དུ་བྱུང་བའི་སྐབས་སུ། ཇོ་བོ་རིན་པོ་ཆེའི་མདུན་དུ་བརྟག་པ་མཛད་པས་འབྲོག་རི་བོ་ཆེ་དགེ་ལྡན་དུ་དགོན་པ་བཏབ་ན་བཟང་བར་བབས་ཏེ། རྗེ་བླ་མ་དགུང་ལོ་ ༥༣ པ་རབ་བྱུང་དྲུག་པའི་ས་གླང་ཕྱི་ལོ་༡༤༠༩ ལོར་འབྲོག་རི་བོ་ཆེ་དགེ་ལྡན་རྣམ་པར་རྒྱལ་བའི་གླིང་བཏབ་པ་ནས་རི་བོ་དགེ་ལྡན་པ་ཞེས་པའི་ཆོས་བརྒྱུད་ཆེན་པོ་འདི་དབུ་བརྙེས། དགེ་ལྡན་རྣམ་པར་རྒྱལ་བའི་གླིང་གི་ཁྲི་པ་དང་པོ་རྗེ་བླ་མ་ཙོང་ཁ་པ་ཆེན་པོ་ཉིད་ཀྱིས་མཛད། རྗེ་དགུང་ལོ་ ༦༣ ཕྱི་ལོ་༡༤༡༩ ལོར་དགོངས་པ་ཆོས་དབྱིངས་སུ་བཏད་པའི་སྔོན་ཙམ་དུ་བཀའ་བཅུ་བ་དར་མ་རིན་ཆེན་ལ་དབུ་ཞྭ་དང་གོས་བེར་གནང་སྟེ་དོན་དེ་གོ་བར་གྱིས་ཞེས་གསུངས་ཏེ། དོན་གྱིས་རྒྱལ་ཚབ་ཏུ་བསྐོ་བར་མཛད་པ་ལྟར་བཀའ་བཅུ་པ་དར་མ་རིན་ཆེན་ཞེས་རྒྱ་གར་པཎ་ཆེན་ལྟ་བུའི་མཁས་གྲུབ་ཆེན་པོ་ཁོང་གསེར་ཁྲིར་མངའ་གསོལ་མཛད་དེ་དགའ་ལྡན་ཁྲི་ཐོག་གཉིས་པ་ཡིན། kq6རྗེ་ཙོང་ཁ་པའི་དྲ་བ།

QQ截图20170812222750.jpgkq6རྗེ་ཙོང་ཁ་པའི་དྲ་བ།

 སྐབས་དེར་རྗེ་བླ་མའི་ནང་ཐུགས་སྲས་ཀྱི་བུ་ཆེན་མཁས་གྲུབ་དགེ་ལེགས་དཔལ་བཟང་པོས། དཔལ་ལྡན་ཡོན་ཏན་ཚོགས་ཀྱི་བྱེད་པོ་ཡིས། །མི་འཇིགས་སེང་གེའི་ཁྲི་ལ་དབང་བསྐུར་བ། །རྒྱལ་བ་གཉིས་པའི་རྒྱལ་ཚབ་ཆོས་ཀྱི་རྗེ། །མི་ཕམ་བླ་མ་གཉིས་པ་རྒྱལ་གྱུར་ཅིག །ཅེས་སོགས་ཚིག་སྦྱོར་ཕུན་སུམ་ཚོགས་པའི་སྙན་ངག་གི་ལམ་ནས་བསྟོད་ཚིག་གི་མེ་ཏོག་འཐོར་བར་མཛད་པ་ནས་འཇམ་མགོན་རྒྱལ་བའི་རྒྱལ་ཚབ་ཅེས་པའི་ཆེ་བསྟོད་ཀྱང་དུས་དེ་ནས་བྱུང་བར་གྲགས། རྒྱལ་ཚབ་དར་མ་རིན་ཆེན་གྱིས་ཕྱི་ལོ་ ༡༤༣༡ བར་ལོ་བཅུ་གསུམ་རིང་དགའ་ལྡན་ཁྲི་པ་གནང་སྟེ་རྗེ་བླ་མའི་མཛད་པ་འཕྲིན་ལས་ཀྱི་རྒྱུན་སྐྱོང་ཞིང་། མདོ་སྔགས་གཉིས་ཀ་ལ་འཆད་རྩོད་རྩོམ་གསུམ་གྱི་སྒོ་ནས་བསྟན་པའི་སྙིང་པོ་གསལ་བར་མཛད་པས་རྗེའི་དངོས་སློབ་རྣམས་ཀྱིས་ཀྱང་རྗེ་བླ་མ་དང་འདྲ་བར་དད་གུས་བླ་མེད་ཞུ་ཞིང་ཕ་རྗེས་བུས་ཟིན་པའི་བཤད་སྒྲུབ་ཀྱི་རྐང་ཚུགས་པར་མཛད། kq6རྗེ་ཙོང་ཁ་པའི་དྲ་བ།

1111.jpgkq6རྗེ་ཙོང་ཁ་པའི་དྲ་བ།

ཕྱི་ལོ་ ༡༤༣༡ ལོར་རྒྱལ་ཚབ་དར་མ་རིན་ཆེན་ཁྲི་ཟུར་མཛད་པ་དང་། རྒྱལ་ཚབ་ཐམས་ཅད་མཁྱེན་པས་བཀའ་བཀོད་དང་བུ་སློབ་རྣམས་ཀྱི་ཐུགས་རེ་ལྟར་མཁས་གྲུབ་དགེ་ལེགས་དཔལ་བཟང་ཁོང་རྗེ་བླ་མའི་གསེར་ཁྲིར་མངའ་གསོལ་མཛད། དགའ་ལྡན་ཁྲི་ཐོག་གསུམ་པ་ཡིན། ལོ་བརྒྱད་ཀྱི་རིང་ཁྲི་པ་གནང་སྟེ་རྗེ་བླ་མའི་ལྟ་སྒོམ་སྤྱོད་གསུམ་གང་གི་ཐད་ནས་ཀྱང་བསྲེས་ལྷད་ཅུང་ཟད་ཀྱང་ཞུགས་ཏུ་མ་བཅུག་པར་གསེར་སྦྱངས་བཙོ་མ་ལྟ་བུའི་རྣམ་ཐར་སྐྱོང་། དགའ་ལྡན་དུ་གཞུང་ཆེན་བཀའ་པོད་ལྔའི་འཆད་ཉན་གྱི་བཤད་གྲྭ་བཙུགས་པ་དེ་ནས་ད་བར་རི་བོ་དགེ་ལྡན་པའི་དགོན་པ་ཕལ་ཆེ་བར་བཀའ་པོད་ལྔའི་འཆད་ཉན་གྱི་རྒྱུན་བཟང་པོ་འདི་བྱུང་། འཇམ་མགོན་བླ་མ་ཤར་ཙོང་ཁ་པ་ཆེན་པོ་ཁོང་ཞལ་བཞུགས་དུས་སུ། ཁོང་དང་ཁོང་གི་བུ་སློབ་རྣམས་རྙེད་བཀུར་སྙན་གྲགས་དང་འཇིག་རྟེན་ཆོས་བརྒྱད་ཀྱི་བྱ་བའི་དབང་དུ་ཅུང་ཟད་ཀྱང་མ་ཤོར་བར་བསྟན་འགྲོའི་དོན་མཛད་པའི་ལུགས་སྲོལ་བཟང་པོའི་ཤུགས་རྐྱེན་དང་། ཁོང་སྐུ་འདའ་ཁར་བུ་ཆེན་རྣམས་ལས་མཁས་བཙུན་བཟང་པོའི་རྣམ་ཐར་ཁོ་ནར་གཞིག་སྟེ་ཁོང་གི་རྒྱལ་ཚབ་ཏུ་བཀའ་བཅུ་པ་དར་མ་རིན་ཆེན་བསྐོ་བཞག་མཛད་པ་དང་། kq6རྗེ་ཙོང་ཁ་པའི་དྲ་བ།

22222.jpgkq6རྗེ་ཙོང་ཁ་པའི་དྲ་བ།

དེའི་རྗེས་སུ་སྲས་ཀྱི་ཐུ་བོ་མཁས་གྲུབ་དགེ་ལེགས་དཔལ་བཟང་གིས་རྒྱལ་ཚབ་མཛད་པ་སོགས་རྗེ་བླ་མའི་ལུང་རྟོགས་ཀྱི་བསྟན་པ་འཛིན་པའི་བརྒྱུད་པ་དགའ་ལྡན་ཁྲི་པ་ཞེས་པ་འདི། སྤྲུལ་སྐུའི་ལམ་ལུགས་ཀྱིས་བྱས་མེད་ལ། རྒྱལ་པོའི་ལམ་ལུགས་ལྟ་བུ་ཡང་མ་ཡིན་ཞིང་། མ་ཟད་ཐོབ་གོ་ས་དང་རྒྱུ་ནོར་དཔལ་འབྱོར་གྱིས་ཕྱུག་མིན་སོགས་ལ་མི་བལྟ་བར་རྗེ་བླ་མའི་མདོ་སྔགས་ཀྱི་གཞུང་ཆེན་ཁག་ལ་ཐོས་བསམ་དང་དེ་དོན་སྒྲུབ་པ་ལ་འགྲུས་པའི་ཐོག་ནས་མཁས་བཙུན་གྲུབ་པའི་ཚུལ་གྱིས་ལུང་རྟོགས་ཀྱི་ཡོན་ཏན་ཆེ་ཆུང་ཁོ་ན་ལ་བལྟས་ཏེ་གདན་ས་གསུམ་པོ་གང་རུང་ནས་བསྐོ་བཞག་མཛད་པ་དང་། དེ་འདྲ་མང་ཆེ་བ་གྲྭ་རྐྱང་དཀྱུས་མའི་ལུགས་ཀྱིས་ལྟོ་སྐྱ་གོས་ཧྲིལ་གྱི་སྒོ་ནས་སྐུ་ཚེ་ཐོས་བསམ་སྒོམ་གསུམ་ལ་འབད་བརྩོན་བྱས་པ་དག་གིས་མ་གཏོགས་མི་ཐོབ་པས། སྤྲང་པོའི་བུ་ལ་ཡོན་ཏན་ཡོད་ན། །དགའ་ལྡན་གསེར་ཁྲིར་བདག་པོ་མེད། །ཅེས་པའི་གཏམ་དཔེ་དེ་ཡོངས་གྲགས་སུ་བྱུང་ཞིང་། འདི་ནི་རུལ་སུངས་ཀྱི་སྤྱི་ཚོགས་ལས་ཡོངས་སུ་བརྒལ་ནས་ཡོན་ཏན་ཅན་ལ་གོང་བཀུར་བྱས་པའི་བླ་ན་མེད་པའི་མཛད་བཟང་ཞིག་དང་། བདག་ཅག་གི་སྟོན་པ་བཅོམ་ལྡན་འདས་ཀྱིས། ཁོང་གི་ཆོས་བརྒྱུད་འདི་ལ་རིགས་མི་གཙོ་རུས་མི་གཙོ་སྒྲུབ་པ་གཙོ་གསུངས་པའི་དགོངས་དོན་ཡང་འདི་ཁོ་ནའོ། །kq6རྗེ་ཙོང་ཁ་པའི་དྲ་བ།

1502529058922386.jpgkq6རྗེ་ཙོང་ཁ་པའི་དྲ་བ།

དགའ་ལྡན་ཁྲི་པ་བསྐོ་བཞག་བྱེད་སྟངས་དེ་བཞིན་དུ་བྱས་ཏེ། དགའ་ལྡན་ཁྲི་ཐོག་བཞི་པ་ཞ་ལུ་བ་ལེགས་པ་རྒྱལ་མཚན་ནས་དགའ་ལྡན་ཁྲི་ཐོག་བརྒྱ་དང་གཉིས་པ་འབྲས་བློ་གླིང་རི་རྫོང་རིན་པོ་ཆེ་(ད་ལྟར་སྐུ་འཚོ་བཞུགས།)དང་། དགའ་ལྡན་ཁྲི་ཐོག་བརྒྱ་དང་གསུམ་པ་འབྲས་བློ་གླིང་རྗེ་བཙུན་བློ་བཟང་བསྟན་འཛིན་མཆོག་གི་(ཉེ་ལམ་སྐུ་གཤེགས་པ)བར་མཁས་བཙུན་བཟང་གསུམ་འཛོམས་པའི་སྐྱེས་ཆེན་ཤ་སྟག་ཕེབས། དེའི་དབང་གིས་རྗེ་བླ་མའི་ཡང་སྲིད་སྤྲུལ་སྐུ་ངོས་འཛིན་བྱས་ཏེ་དགའ་ལྡན་དགོན་པའི་བསྟན་བདག་བྱེད་པའི་སྲོལ་ཞིག་གཏན་ནས་བྱུང་མྱོང་མེད་ལ། དེ་ལ་བརྟེན་ནས་སེ་ར་ནས་བྱམས་ཆེན་ཆོས་རྗེའི་སྤྲུལ་སྐུ་ངོས་འཛིན་བྱས་མི་འདུག་ཅིང་། འབྲས་སྤུངས་ནས་འཇམ་དབྱངས་ཆོས་རྗེའི་སྤྲུལ་སྐུ་ངོས་འཛིན་བྱས་མེད་པ་རེད། དགའ་ལྡན་ཁྲི་ཐོག་དང་པོ་ནས་ཁྲི་ཐོག་སོ་ལྔའི་བར་ཁྲི་བཞུགས་ལོ་ཚད་གཏན་ཁེལ་མེད་ཀྱང་། ཁྲི་ཐོག་སོ་དྲུག་པ་ནས་ཁྲི་འཛིན་ལོ་བདུན་རེ་བྱེད་རྒྱུ་སྡེ་པ་གཙང་བས་གཏན་འབེབས་བྱས་པ་རེད་འདུག ། kq6རྗེ་ཙོང་ཁ་པའི་དྲ་བ།

1502529057920449.jpgkq6རྗེ་ཙོང་ཁ་པའི་དྲ་བ།

དེ་ནས་བཟུང་སྟེ་རྒྱལ་བ་སྐུ་ཕྲེང་བཅུ་གསུམ་པས་སྲིད་དབང་བཟུང་བའི་བར་གདན་ས་སེར་འབྲས་དགའ་གསུམ་གྱི་ནང་ནས་དགའ་ལྡན་ཁྲི་པའི་ལམ་ལུགས་དེ་བསླད་མེད་དམ་གཙང་གི་སྐྱེས་ཆེན་དམ་པ་གནམ་གྱིས་ས་བཀབ་པ་ལྟ་བུ་དག་ཕེབས་ཏེ་བསྟན་པ་བཤད་སྒྲུབ་གཉིས་ཀྱིས་འཛིན་ཚུལ་གཞན་དང་མི་མཚུངས་པ་ཞིག་བྱུང་བ་རེད། དགའ་ལྡན་ཁྲི་པར་ཕེབས་པར་རྨང་གཞིའི་ཆ་རྐྱེན་གདན་ས་ཆེན་པོ་གསུམ་གང་རུང་ནས་ལོ་ངོ་ཉི་ཤུ་ལྷག་གི་རིང་གུས་རྟག་བརྩོན་པ་ཆེན་པོས་མདོ་ཕྱོགས་ཀྱི་གཞུང་ཆེན་དག་ལ་སློབ་གཉེར་གནང་སྟེ། དགེ་བཤེས་ཀྱི་མཚན་རྟགས་བཞེས། དེ་ནས་རྒྱུད་གྲྭ་སྟོད་སྨད་གང་རུང་དུ་ཆོས་ཐོག་ལེགས་པར་འགྲིམས་ཏེ། གསང་བདེ་འཇིགས་གསུམ་གྱི་བསྐྱེད་རྫོགས་ཀྱི་གཞུང་ཆེན་ཁག་གི་གཙོས་ཁྲིད་ལུང་མན་ངག་ཡོངས་རྫོགས་ཆད་ལུས་མེད་པ་ཞུ་དགོས་པ་དང་། སྔགས་ཀྱི་སློབ་གཉེར་གོ་རིམ་ལྡན་པ་བྱས་ཏེ་སྔགས་ཀྱི་རྩོད་རྒྱུགས་ལེགས་པར་འཕྲོད་པ་བྱས། དེ་ནས་མཚན་ཐོའི་གོ་རིམ་ལྟར་རྒྱུད་གྲྭ་གང་རུང་གི་དབྱར་དགུན་གྱི་དགེ་བསྐོས་གང་རུང་ཞིག་བྱེད། དེ་ནས་བླ་མ་དབུ་མཛད་ལོ་གསུམ། དེ་ནས་མཁན་པོ་ལོ་གསུམ་བཅས་རིམ་པ་བཞིན་གནང་སྟེ། དེ་དག་གི་རིང་ལ་བསྐྱེད་རྫོགས་ཀྱི་གཞུང་ཆེན་ཁག་དང་འགྲེལ་བ་བཞི་སྦྲགས་ཀྱི་འཆད་ཉན་ངེས་པར་འགྲོ་དགོས་པ་དང་། བརྩི་བཞག་བློ་འཛིན་དགོས་པ་སོགས་མ་ཚང་བར་མེད་པར་སྒྲུབ་དགོས་ཤིང་། ཆོ་ག་ཕྱག་ལེན་ཐིག་རྡུལ་ཚོན་སོགས་གང་ཅིའི་ཐོག་ནས་གསང་སྔགས་ཀྱི་གཞུང་མན་ངག་ཕྱག་ལེན་ཀུན་མཐར་ཕྱིན་པ་གནང་དགོས་པས། མདོར་ན་དགའ་ལྡན་ཁྲི་པར་ཕེབས་མཁན་དེ་དག་ཆོས་ཕྱོགས་ཀྱི་ཡོན་ཏན་ནི་མདོ་སྔགས་ཀྱི་གཞུང་ལུགས་དང༌། ལག་ལེན་ཀུན་ལ་མཁས་པའི་མཐར་སོན་པ་ཤ་སྟག་ཡིན་པ་མ་ཟད། ཀུན་སྤྱོད་སོགས་ཀྱི་ཆ་ནས་སྐུ་ཚེའི་རིང་ལ་གྱོད་ཁ་མཆུ་དང་ཚུལ་མིན་གྱི་བྱ་སྤྱོད་འདྲ་མིན་ལ་ཞུགས་པའི་མིང་ཙམ་ཡང་མེད་པ་ཞིག་དགོས་པ་ཡིན། རྒྱུད་པའི་མཁན་ཟུར་གནང་ནས། རྒྱུད་སྨད་ནས་ཡིན་ན་བྱང་རྩེ་ཆོས་རྗེ་དང་། རྒྱུད་སྟོད་ནས་ཡིན་ན་ཤར་རྩེ་ཆོས་རྗེ་ལ་ཕེབས་དགོས་པ་དང་། དེ་ནས་ཁྲི་པ་གོང་མ་དག་རིམ་བཞིན་དགོངས་ཞུ་གནང་མཚམས་སུ་ཤར་བྱང་གི་ཆོས་རྗེ་རྣམ་གཉིས་རྒན་རིམ་ལྟར་དགའ་ལྡན་ཁྲི་པར་ཕེབས་འགྲོ་བ་ཡིན། རྗེ་ཡབ་སྲས་གསུམ་ཕེབས་རྗེས་སུ་དགའ་ལྡན་ཁྲི་པར་ཕེབས་པར་དགུང་ལོ་ ༦༠ ཡན་ཆད་ལ་མ་སླེབས་པ་ཞིག་ཧ་ཅང་ཉུང་བ་ཡིན། གདན་སའི་གྲྭ་རྒན་པ་རྣམ་ཀྱིས་དགའ་ལྡན་ཁྲི་གདན་ཟུར་གསུམ་དུས་གཅིག་ཏུ་འཛོམས་པ་ཡིན་ན་རྗེ་ཡབ་སྲས་གསུམ་ཞལ་མཉམ་འཛོམས་ཀྱི་རྟེན་འབྲེལ་ཡོད་ཅེས་གསུངས་སྲོལ་ཡོད་ཀྱང་ཤིན་ཏུ་དཀོན། kq6རྗེ་ཙོང་ཁ་པའི་དྲ་བ།

1502529058790235.jpgkq6རྗེ་ཙོང་ཁ་པའི་དྲ་བ།

རྒྱལ་དབང་སྐུ་ཕྲེང་བཅུ་གསུམ་པས་བོད་ཀྱི་སྲིད་དབང་བཟུང་བའི་སྐབས་སུ། བསྟན་པ་སྤྱི་ལ་ཡང་དགའ་ལྡན་ཁྲི་པའི་ལམ་ལུགས་འདི་སྲ་བརྟན་འགྱུར་མེད་ངོས་གཙང་ཞིག་དགོས་གལ་ཆེ་བར་གཟིགས་ཏེ། དགའ་ལྡན་ཁྲི་པར་ཕེབས་མཁན་དག་གདན་ས་ཁག་ཏུ་སློབ་གཉེར་མཐཪ་ཕྱིན་ཅིང་། དགེ་བཤེས་ལྷ་རམས་པའི་གོ་གནས་མ་ཐོབ་ན་དགའ་ལྡན་ཁྲི་པར་ཕེབས་མི་ཆོག་པ་བཟོས། སྐབས་དེར་སྐུ་ཕྲེང་བཅུ་གསུམ་པ་རང་གི་དགོངས་བཞེད་ལྟར། མདོ་སྔགས་ཀྱི་གཞུང་ཆེན་དག་གཞིར་བྱས་ནས་དགེ་བཤེས་ལྷ་རམས་པའི་རྒྱུགས་ཆེན་བླངས་ཏེ་རྒྱུགས་སྤྲོད་ཀྱི་ཚད་གཞི་ལོན་ངེས་དག་སྔར་རྒྱུན་ལྟར་རྒྱུད་གྲྭ་གཉིས་ཀྱི་དགེ་བསྐོས་དང་། བླ་མ་དབུ་མཛད་དང་། མཁན་པོ་སོགས་རིམ་བགྲོད་ཀྱིས་ཤར་བྱང་གང་རུང་གི་ཆོས་རྗེ་ལ་ཕེབས། དེ་ནས་མཚན་ཐོའི་རྒན་རིམ་ལྟར་དགའ་ལྡན་ཁྲི་པར་ཕེབས་ཆོག་པ་བཟོས་ཏེ། ལྷ་རམས་པའི་རྒྱུགས་སྤྲོད་བཞེས་ནས་དགའ་ལྡན་ཁྲི་པར་ཕེབས་མཁན་དང་པོ་དེ་དགའ་ལྡན་ཁྲི་ཐོག་༩༣ པ། དཔལ་ལྡན་འབྲས་སྤུངས་བློ་གསལ་གླིང་མི་ཉག་དགེ་བཤེས་ཨ་མེས་ཡེ་ཤེས་དབང་ལྡན་ཕྱི་ལོ་ ༡༩༣༣ ལོར་ཁྲིར་ཕེབས། དེ་ནས་བཟུང་དགེ་བཤེས་ལྷ་རམས་པ་མ་གཏོགས་དགའ་ལྡན་ཁྲི་པར་ཕེབས་ས་མེད་པ་གཏན་ཁེལ་གནང་ཡོད། དགའ་ལྡན་ཁྲི་པར་ཕེབས་མཁན་རྣམས་བཞུགས་ཡུལ་དགའ་ལྡན་ཁྲི་ཐོག་ཁང་དུ་བཞུགས་དགོས་པ་དང་། ལས་ཐོག་ཁྲི་བཞུགས་རིང་རི་བོ་དགེ་ལྡན་པའི་གདན་ས་ཆེན་པོ་གསུམ་གྱི་ཆོས་འཆད་ཉན་གྱི་ཐུགས་འགན་གཙོ་བོར་བཞེས་ཏེ་སྤྱིའི་བཀོད་འདོམས་གནང་དགོས་པ་དང་། ལྷ་ལྡན་སྨོན་ལམ་ཆེན་མོ་སོགས་ཀྱི་ཚོགས་དབུ་མཛད་དགོས་པ། དེང་སྐབས་དགེ་ལྡན་ལུགས་བཟང་གཙུག་ལག་སློབ་གཉེར་ཁང་དང་། འཇང་དགུན་ཆོས་ཆེན་མོ་སོགས་༌གདན་ས་གསུམ་གྱི་མཉམ་དུ་སྒྲུབ་དགོས་པའི་ཕྱག་ལས་མང་པོ་ཞིག་གི་གཙོ་འཛིན་ཡང་གནང་དགོས་པ་བཅས་སོ། །kq6རྗེ་ཙོང་ཁ་པའི་དྲ་བ།

1502529059558036.jpgkq6རྗེ་ཙོང་ཁ་པའི་དྲ་བ།

ད་ལམ་སྐབས་སུ་དགའ་ལྡན་ཁྲི་ཐོག་བརྒྱ་དང་བཞི་པ། མདོ་སྔགས་གཞུང་ལུགས་རྒྱ་མཚོའི་མངའ་བདག །སེ་ར་བྱེས་གཙང་རྗེ་བཙུན་བློ་བཟང་བསྟན་འཛིན་མཆོག་ནི། kq6རྗེ་ཙོང་ཁ་པའི་དྲ་བ།

ཕྱི་ལོ་ ༡༩༣༥ ལོར་གཙང་སྟོད་ལྷ་རྩེ་ཁུལ་དུ་སྐུ་འཁྲུངས། དགུང་ལོ་བཅུ་ལ་ཕེབས་པའི་ཚེ་མཁན་ཆེན་བསྟན་འཛིན་རྒྱ་མཚོའི་དྲུང་ནས་རབ་ཏུ་བྱུང་ཞིང་ཚིགས་སྔ་མ་དགེ་ཚུལ་གྱི་སྡོམ་པ་བཞེས་ཏེ། ༸གོང་ས་ལྔ་པས་ཕྱག་བཏབ་པའི་ལྷ་རྩེ་ཆོས་སྡེ་དགོན་དུ་སྒྲིག་ཞུགས་གནང་། དགོན་པའི་སྒྲིག་སྲོལ་ལྟར་ཆོས་སྤྱོད་རབ་གསལ་དང་རྒྱན་འཇུག་སོགས་ཐུགས་འཛིན་གནང་སྟེ་ཚོགས་རྒྱུགས་སུ་ཕུལ། དེ་ནས་བསྡུས་གྲྭ་བློ་རྟགས་དང་། ལྷག་པར་༸གོང་ས་ལྔ་པའི་གསུང་ཕར་ཕྱིན་དང་དབུ་མ་འདུལ་མཛོད་བཅས་ཀྱི་རང་ལུགས་གང་ཡིན་ཐུགས་འཛིན་མཛད་དེ་འདུས་མང་གི་དབུས་སུ་ཚོགས་རྒྱུགས་ཕུལ། དགུང་ལོ་བཅུ་དྲུག་གི་སྐབས་སུ་དབུས་སུ་ཕེབས་ནས་སེར་བྱེས་གྲྭ་ཚང་དུ་ཆོས་ཞུགས་གནང་། སེར་བྱེས་མཁན་ཟུར་རིན་པོ་ཆེ་རྗེ་བཙུན་ལྷུན་འགྲུབ་ཐབས་མཁས་མཆོག་སོགས་མཁས་གྲུབ་དམ་པ་མང་པོར་བསྟེན་སྟེ་གུས་རྟག་བརྩོན་པ་དྲག་པོས་གཞུང་ཆེན་སློབ་གཉེར་མཛད་ཅིང་། གཞུང་གསར་འཛིན་གྲྭར་ཕེབས་ཚེ་སྦྱོར་ལམ་ཕྱི་རྒོལ་གྱི་ཚོགས་གླེང་མཛད་པས་དེ་ཡོད་རྣམས་ཀྱིས་བསྟོད་བསྔགས་ཀྱི་མེ་ཏོར་འཐོར། དགུང་ལོ་ཉེར་གསུམ་ལ་སླེབས་པ་ན་ལྷ་ལྡན་ནོར་གླིང་གཟིམ་ཆུང་དུ་༸སྐྱབས་རྗེ་ཁྲི་བྱང་རིན་པོ་ཆེའི་སྐུ་མདུན་ནས་ཚིགས་ཕྱི་མ་བསྙེན་རྫོགས་ཀྱི་སྡོམ་པ་ལེགས་པར་བཞེས་ཏེ། འདུལ་བའི་འཛིན་པའི་མཆོག་ཏུ་གྱུར། དགུང་ལོ་ཉེར་ལྔའི་སྐབས་སུ་རྒྱ་གར་འཕགས་ཡུལ་དུ་ཕེབས་ཏེ་སྦག་ས་ཆོས་སྒར་དུ་བཞུགས་རིང་། སེར་བྱེས་མཁན་ཟུར་རིན་པོ་ཆེ་རྗེ་བཙུན་བློ་བཟང་དབང་ཕྱུག་དཔལ་བཟང་པོ་དང་། སྐྱབས་རྗེ་ཟོང་རིན་པོ་ཆེ་སོགས་ཀྱི་མདུན་ནས་འདུལ་མཛོད་སོགས་གཞུང་ཆེན་གྱི་སློབ་གཉེར་འཕྲོ་སྐྱོང་། དེ་ནས་དགེ་ལྡན་ལུགས་བཟང་གཙུག་ལག་སློབ་གཉེར་ཁང་དུ་སློབ་དཔོན་དང་ལྷ་རམས་པའི་རྒྱུགས་སྤྲོད་རིམ་གྱིས་གནང་སྟེ། ཕྱི་ལོ་ ༡༩༧༨ ལོར་དགེ་བཤེས་ལྷ་རམས་པའི་མཚན་རྟགས་བཞེས། དེ་ནས་གསང་ཆེན་རྒྱུད་སྡེའི་བསྟི་གནས་དཔལ་ལྡན་སྨད་རྒྱུད་གྲྭ་ཚང་དུ་ཆོས་ཞུགས་མཛད་དེ། འགྲེལ་བ་བཞི་སྦྲགས་དང་བསྐྱེད་རྫོགས་ཀྱི་སྐོར་སོགས་རྒྱུད་སྨད་པའི་ཕྱག་བཞེས་ལྟར་གྱི་དབང་ལུང་མན་ངག་ཞུ་བ་སོགས་སྔགས་ཀྱི་འཆད་ཉན་ཀུན་ལེགས་པར་གྲུབ་པར་མཛད། kq6རྗེ་ཙོང་ཁ་པའི་དྲ་བ།

1502529059646337.jpgkq6རྗེ་ཙོང་ཁ་པའི་དྲ་བ།

ཕྱི་ལོ་ ༡༩༨༡ ལོར་དོན་གྱི་བདག་པོས་ཕྱག་རྟགས་སྤྱི་ཕེབས་ལྟར་རྒྱུད་པའི་བླ་མ་དབུ་མཛད་ཀྱི་ཐུགས་འགན་བཞེས་ཏེ། བཀའ་དགོངས་གཞིར་བཟུང་གིས་སྔགས་དང་མཚན་ཉིད་ཀྱི་རྩོད་གྲྭ། ཐུན་མོང་རིག་གནས་དང་སྐད་ཡིག་སོགས་སྦྱོང་སའི་སློབ་གྲྭ་གསར་འཛུགས་གནང་ཞིང་དེང་སྐབས་འཕེལ་རྒྱས་ལེགས་པོ་བྱུང་སྟེ་རྒྱུད་པའི་བློ་གསར་བ་རྣམས་ཀྱི་རྨང་གཞིའི་སློབ་གསོའི་ཆ་རྐྱེན་ཆེན་པོར་གྱུར་འདུག །ཕྱི་ལོ་ ༡༩༨༤ ལོར་དཔལ་ལྡན་སྨད་རྒྱུད་གྲྭ་ཚང་གི་མཁན་ཁྲིར་ཕེབས་ཏེ། དམ་པ་ཁོང་དཔལ་ལྡན་སྨད་རྒྱུད་པའི་བླ་མ་དབུ་མཛད་ཀྱི་སྐབས་དང་མཁན་པོའི་སྐབས་སུ། གྲྭ་ཚང་འདིའི་ཕྱག་བཞེས་ལྟར་གྱི་རྩ་རྒྱུད་ཀྱི་ཊཱིཀ་ལེའུ་དང་པོ་ནས་བརྒྱད་པའི་བར་དང་། གསང་བདེ་འཇིགས་གསུམ་གྱི་བསྐྱེད་རྫོགས་སོགས་གཞུང་ཆེན་མོ་རྣམས་ཀྱི་བརྩི་བཞག་གནང་བ་ན། བྲག་ཐོག་ནས་ཆུ་འཕྱོ་བ་ལྟར་ཐོགས་པ་མེད་ཅིང་། སྒྲ་དག་གསལ་གསུམ་དེ་འདྲ་དཀོན་པོ་ཡིན་ཞེས་རྒྱུད་པའི་གྲྭ་རྒན་པ་རྣམ་པས་གསུངས་པ་ཐོས། དེ་ཙམ་མ་ཟད་གསང་བདེ་འཇིགས་གསུམ་སོགས་ཀྱི་བདག་བསྐྱེད་བདག་འཇུག་སོགས་རྒྱུད་པ་གྲྭ་ཚང་གི་ཞལ་འདོན་ཆོས་སྤྱོད་ཀྱི་རིམ་པ་ཀུན་ཐུགས་ཐོག་ནས་གསུངས་པ་ལ་ཐོགས་པ་མེད་ཅིང་། ཕྱག་ལེན་ཆ་ཕྲ་མོ་ནས་མ་ནོར་བར་མཛད་པ་དང་། བསྐྱེད་རྫོགས་ཀྱི་གཞུང་ཆེན་པོ་དག་གི་དགོངས་དོན་སྨྲ་བ་ལ་མི་འཇིགས་པའི་སྤོབས་པ་གཟེངས་སུ་མཐོ་བ་རྗེ་བཙུན་ཤེས་རབ་སེང་གེ་སླར་ཕེབས་པ་ལྟ་བུ་ཞིག་བྱུང་འདུག །kq6རྗེ་ཙོང་ཁ་པའི་དྲ་བ།

1502529060886669.jpgkq6རྗེ་ཙོང་ཁ་པའི་དྲ་བ།

ཕྱི་ལོ་ ༡༩༨༨ དེ་འདྲ་ཞིག་ནས་ཕྱི་ལོ་ ༢༠༡༠ བར་ལོ་ངོ་ཉེར་གཉིས་ཀྱི་རིང་། སེ་ར་ཐེག་ཆེན་གླིང་དང་དཔལ་ལྡན་སྨད་རྒྱུད་གྲྭ་ཚང་གཉིས་གཙོ་བོར་བྱས་ཏེ། དགོན་པ་ཁག་མང་པོའི་ནང་དུ་མདོ་སྔགས་ཀྱི་གཞུང་ཆེན་པོ་དག་དཔེ་ཁྲིད་དང་འཆད་ཉན་ཉིན་ལྟར་གནང་། དེ་མཚུངས་ཀྱིས་ཡི་དམ་ཁག་གི་བདག་བསྐྱེད་སོགས་ཀྱང་ཆགས་མེད་དུ་མཛད་པ་སོགས་མདོ་སྔགས་ཀྱི་ལམ་ཉམས་ལེན་ལ་གཅིག་ཏུ་འགྲུས་པར་མཛད། རྒྱལ་ཁབ་ཤར་ནུབ་ཀྱི་ཆོས་ཚོགས་དང་དང་དགོན་པ་མང་པོས་གདན་འདྲེན་ཞུས་ཀྱང་། དུས་སྐབས་ཉུང་ཙམ་རེ་མ་གཏོགས་མང་ཆེ་བ་གདན་ས་རང་དུ་བཞུགས་ཏེ་འཆད་ཉན་དང་གཟིགས་རྟོག་གནང་བཞིན་པ་འདི་ཡང་སྐྱེས་བུ་དམ་པའི་རང་རྟགས་ངོ་མཚར་བ་ཞིག་གོ །kq6རྗེ་ཙོང་ཁ་པའི་དྲ་བ།

1502529059293046.jpgkq6རྗེ་ཙོང་ཁ་པའི་དྲ་བ།

ང་ཚོས་ད་ལྟར་བསམ་བློ་རེ་གཏོང་སྐབས། དུས་རབས་ཉི་ཤུ་པའི་ལོ་རབས་དགུ་བཅུའི་ཡས་མས་སུ་གདན་ས་སྤྱི་དང་དགེ་རྒན་རྣམ་པའི་འཚོ་བ་ཤིན་ཏུ་སྐྱོ་ཡང་། བསྟན་པ་ཁོ་ན་སྙིང་བཅངས་ཀྱི་ཐོག་ནས་དཀའ་ངལ་ལ་བཟོད་བསྲན་དང་། སྡུག་བསྔལ་དང་ལེན། སློབ་མ་རྣམས་ལ་ལྷག་བསམ་རྣམ་དག་གིས་སློབ་ཁྲིད་དང་བདག་གཉེར་གནང་སྟངས་དེ་ཚོ་ལྟ་བུའི་བསྟན་འཛིན་གྱི་སྐྱེས་ཆེན་དེང་སྐབས་ཉིན་མོའི་སྐར་མ་ལྟར་དཀོན་པ་ཡིན། སྐབས་དེ་དུས་སྲིད་གཞུང་ཞིག་དང་གྲྭ་ཚང་ཞིག་གིས་འཚོ་བའི་རོགས་སྐྱོར་དམིགས་བསལ་བ་ཞིག་མེད་ལ། ཟླ་ཕོག་ལ་སོགས་པ་དེ་བས་ཀྱང་མེད། འོན་ཀྱང་འཚོ་བ་རང་སྐྱོང་བྱས་ཏེ། ཉིན་ལྟར་དགེ་ཕྲུག་བརྒྱ་ཕྲག་མང་པོ་ལ་དཔེ་ཁྲིད་གནང་ཞིང་དེ་ཡང་ལོ་གཅིག་དང་གཉིས་མ་ཡིན་པར་ལོ་བཅུ་དང་ཉི་ཤུ་དེ་འདྲ་རྒྱུན་སྐྱོང་ཐུབ་པ་སྙིང་ཁམས་ལྕགས་ལས་གྲུབ་མེད་ན་ཤིན་ཏུ་ཁག་པོ་ཡིན། ཁོང་རྣམ་པས་སྐྱེད་སྲིང་བྱས་པའི་ཚད་ལྡན་གྱི་བླ་སྤྲུལ་དགེ་བཤེས་དགེ་རྒན་བགྲང་གིས་མ་ལངས་པ་ཞིག་ཡོད་པས། འདི་ལས་ལྷག་པའི་བསྟན་རྒྱུན་ལ་ཕན་པ་ཤིག་སྒྲུབ་ཐབས་མེད་དོ། །kq6རྗེ་ཙོང་ཁ་པའི་དྲ་བ།

1502529059116185.jpgkq6རྗེ་ཙོང་ཁ་པའི་དྲ་བ།

དེ་ལྟར་ཡང་ཡང་བསམ་པའི་ཚེ་དགའ་ལྡན་ཁྲི་རིན་པོ་ཆེ་ཁོང་དང་ཁོང་ལྟ་བུའི་དགེ་རྒན་མང་པོ་ཡོད་པ་ཐམས་ཅད་སྤྱིར་བོད་བརྒྱུད་ནང་བསྟན་དང་། ལྷག་པར་འཇམ་མགོན་རྒྱལ་བ་གཉིས་པའི་བསྟན་པ་འདི་ལ་བཀའ་དྲིན་བསམ་གྱིས་མི་ཁྱབ་ཅིང་བརྗོད་ཀྱིས་མི་ལངས་པ་ཡིན་པར་རྒྱུན་དུ་དྲན་བཞིན་ཡོད། དེས་ན་ཁོང་རྣམ་པར་སྙིང་ཁོང་རུས་པའི་གཏིང་ནས་དད་ཅིང་གུས་ལ། རྒྱལ་བསྟན་སྤྱི་བྱེ་བྲག་ཀུན་ཉམ་དམའ་ཉག་ཕྲ་བའི་སྐབས་སུ་སྔོན་གྱི་ཐུགས་བསྐྱེད་བཟང་པོ་དུས་སུ་སྨིན་ཏེ། མཁས་བཙུན་བཟང་པོའི་དཔལ་མངའ། ༸རྗེ་བཙུན་བློ་བཟང་བསྟན་འཛིན་དཔལ་བཟང་པོ་མཆོག་འཇམ་མགོན་རྒྱལ་བ་གཉིས་པའི་མི་འཇིགས་གསེར་གྱི་ཁྲི་འཕང་མཐོན་པོར་མངའ་གསོལ་མཛད་པར་དགའ་དད་སྤྲོ་བ་རབ་ཏུ་འཕེལ་ཞིང་གུས་འདུད་བླ་མེད་ཞུ། སྐུ་ཚེ་ལ་བར་ཆད་མེད་པར་མཛད་པ་འཕྲིན་ལས་ཐམས་ཅད་རྒྱལ་བའི་ཐུགས་བཞེད་ལྟར་འགྲུབ་པའི་སྨོན་འདུན་གྲངས་མེད་བཅས།kq6རྗེ་ཙོང་ཁ་པའི་དྲ་བ།

སེ་ར་བྱེས་གཙང་རྗེ་བཙུན་བློ་བཟང་བསྟན་འཛིན་མཆོག་འབྲོག་རི་བོ་ཆེ་དགའ་ལྡན་རྣམ་པར་རྒྱལ་བའི་གླིང་དུ་གསེར་ཁྲིར་མངའ་གསོལ་མཛད་པའི་ཉིན་དགའ་དད་གུས་པ་ཆེན་པོས་དགའ་ལྡན་ཁྲི་པའི་བྱུང་རབས་མདོར་བསྡུས་ནས་འབྲི་མགོ་བརྩམས་ཏེ། ཕྱི་ལོ་ ༢༠༡༧ ཟླ་ ༨ ཚེས་ ༩ རེས་གཟའ་ལྷག་པ་ཉིན་སེ་ར་ཐེག་ཆེན་གླིང་དུ་གསེར་ཁྲིར་མངའ་གསོལ་དང་རྟེན་འབྲེལ་མཛད་སྒོའི་ཉིན་མཇུག་གྲུབ་པར་བྱས་པའོ། །kq6རྗེ་ཙོང་ཁ་པའི་དྲ་བ།

སེར་བྱེས་དགེ་བཤེས་འཇམ་དཔལ་བློ་ཤེས་ཀྱིས། ཕྱི་ལོ་ ༢༠༡༧ ཟླ་ ༨ ཚེས་ ༩ ཉིན།kq6རྗེ་ཙོང་ཁ་པའི་དྲ་བ།

རྩོམ་སྒྲིག་པ།:མཁའ་ཚེ།
བརྒྱུད་འགོད།  
29.1K