མདུན་ངོས་སུ་བསྐྱོད། |   ཉར་ཚགས་བྱེད། |   མདུན་ངོས་སུ་བཀོད། |  རྒྱ་ཡིག་གི་དྲ་ངོས།

༄༅། ། བྱ་ཁྱུང་དགོན་ཐེག་ཆེན་ཡོན་ཏན་དར་རྒྱས་གླིང་།

ཡོང་ཁུངས།   བོད་ཀྱི་གནས་ཡིག་དྲ་བ།     སྤེལ་དུས།  2014-08-19 10:42:42     རྩོམ་པ་པོ།   མི་གསལ།    ཀློག་ཐེངས།  
ཡིག་གཟུགས་ཇེ་ཆེར་གཏོང་། ཡིག་གཟུགས་ཇེ་ཆུང་གཏོང་།

 31.jpgQyuརྗེ་ཙོང་ཁ་པའི་དྲ་བ།

བྱང་གི་དགོན་ཆེན་བཞིའི་ཡ་གྱལ་ཆོས་སྡེ་ཆེན་པོ་བྱ་ཁྱུང་དགོན་ཐེག་ཆེན་ཡོན་ཏན་དར་རྒྱས་གླིང་ནི། དེང་སྐབས་ཀྱི་མཚོ་སྔོན་ཞིང་ཆེན་དཔའ་ལུང་རྫོང་ངམ་བ་ཡན་ཚ་ཕུག་ཡུལ་ཚོའི་ལྷོ་ཕྱོགས་སུ་སྤྱི་ལེ་བཅུའི་མཚམས་ཀྱི་བྱ་ཁྱུང་རི་བོའི་སྟེང་དུ་ཆགས་ཡོད། དགེ་ལུགས་གྲུབ་མཐའི་སྲོལ་འབྱེད་རྗེ་ཙོང་ཁ་པ་ཆེན་པོའི་ཡོངས་འཛིན་ཤར་ཕྱོགས་པ་རིག་པའི་དཔའ་བོ་ཆོས་རྗེ་དོན་གྲུབ་རིན་ཆེན་གྱིས་སྤྱི་ལོ༡༣༤༩ལོར་བཏབ། རྗེ་ཙོང་ཁ་པ་དགུང་ལོ་བདུན་ནས་དབུས་གཙང་དུ་ཕེབས་པའི་བར་དུ་གདན་ས་དེ་ནས་ཆོས་ལ་སློབ་སྦྱོང་གནང་། ཆོས་རྗེ་དོན་རིན་པོ་ཆེ་ནི་དགེ་ལུགས་བསྟན་པའི་སྲོལ་འབྱེད་མཁན་རྗེ་ཙོང་ཁ་པ་ཆེན་པོའི་ཡོངས་འཛིན་ཡིན་ལ། སྤྱི་ལོ༡༣༠༩ལོར་རེབ་གོང་རིག་པ་འབྱུང་བའི་གྲོང་ཁྱེར་གྱི་ནང་ཚན་བསེ་དོན་རིན་ཉིན་ཞེས་པའི་སྡེ་རུ་སྐུ་འཁྲུངས། བསེ་གསང་བ་ལྷུན་གྲུབ་རྒྱ་མཚོའི་གམ་ནས་ཡི་གེ་འབྲི་ཀློག་ལ་སྦྱངས། དབུས་སུ་ཕེབས་ནས་གྲུབ་མཐའ་རིས་མེད་དུ་མདོ་སྔགས་རིག་གནས་ཀུན་ལ་སྦྱངས། ཞྭ་ལུར་བྱོན་ནས་ཆོས་ཀྱི་བགྲོ་གླེང་མཛད་དེ་ཤར་ཕྱོགས་པ་རིགས་པའི་དཔའ་བོ་ཞེས་མཚན་སྙན་ཀུན་ལ་ཁྱབ། བླ་མ་མཆིམས་བློ་བཟང་གྲགས་པའི་ལུང་བསྟན་བཞིན་ཨ་མདོར་ཕེབས། ཐོག་མར་གནས་ཤ་སྦྲང་དུ་ཕེབས་ནས་དགོན་པ་འདེབས་གྲབས་ཡོད་པ་ལ་རྟེན་འབྲེལ་མ་འཛོམས་པས་མར་ཆུ་མ་སྡེ་བར་ཕེབས་ནས། ཉི་མ་ཤར་མ་ཐག་པང་དུ་བླངས་པ་དང་འདྲ་བའི་དགོན་པ་སྟེ་སྟེང་གི་གཞི་མ་དགོན་པ་འདི་བཏབ། རྗེས་སུ་ཤར་པང་དང་ཤ་སྦྲང་གཉིས་ནོར་ནས་བཞེད་ཚུལ་འདྲ་མིན་སྣ་ཚོགས་བྱུང༌། སྟེང་གི་གཞི་མ་ནི་བྱ་ཁྱུང་གི་མ་དགོན་ཡིན་པའི་ཆ་ནས་བྱ་ཁྱུང་ན་ཚོགས་གྲལ་ངེས་བཏགས་ཡོད་ཟེར། དེ་ནས་ཡུལ་སྣང་ར་བརྒྱུད་དེ་བྱ་ཁྱུང་དུ་ཕེབས། དགོན་པ་བཏབ་སྟེ་བསྟན་པ་རྒྱ་ཆེར་སྤེལ། རྗེས་སུ་དད་ལྡན་རྣམས་ཀྱིས་ཇེ་རྒྱས་སུ་བཏང་སྟེ་ད་ལྟའི་དགོན་པ་འདི་ཆགས། ལོ་རྒྱུས་ཞིབ་མོ་ནི་གདན་རབས་ན་གསལ་བས་དེར་གཟིགས་པར་ཞུ།Qyuརྗེ་ཙོང་ཁ་པའི་དྲ་བ།

རྩོམ་སྒྲིག་པ།:མཁའ་ཚེ།
བརྒྱུད་འགོད།  
29.1K