མདུན་ངོས་སུ་བསྐྱོད། |   ཉར་ཚགས་བྱེད། |   མདུན་ངོས་སུ་བཀོད། |  རྒྱ་ཡིག་གི་དྲ་ངོས།

༄༅། །རྟོགས་བརྗོད་དངུལ་གྱི་མེ་ཏོག

ཡོང་ཁུངས།   ངེད་དྲ་བ།     སྤེལ་དུས།  2015-03-14 16:18:19     རྩོམ་པ་པོ།   ཚེ་ཏན་ཞབས་དྲུང་།    ཀློག་ཐེངས།  
ཡིག་གཟུགས་ཇེ་ཆེར་གཏོང་། ཡིག་གཟུགས་ཇེ་ཆུང་གཏོང་།

         ན་མོ་ཨ་མི་ཏ་བྷཱ་ཡ། བློ་བཟང་མཁྱེན་པའི་མེ་ལོང་དྲི་མེད་ངོས། །རྒྱལ་ཀུན་གསང་གསུམ་གྲགས་པའི་གཟུགས་མཚར་བཀྲ། །རིགས་གསུམ་སྒྱུ་མའི་འཕྲུལ་འཛིན་ཐུབ་དབང་གི། །བྱིན་རླབས་བདུད་རྩིའི་གཟེགས་མ་ཆར་དུ་ཕོབ། །མདོ་རྒྱུད་རིག་པའི་གཡུ་རལ་གནམ་དུ་གསིག །ཕས་རྒོལ་གཟིར་བའི་གད་རྒྱངས་འབྲུག་སྟོང་ལྡིར། །ལོག་སྨྲའི་དོན་སྙིང་ལྐོག་མར་འབྱིན་མཛད་པ། །མཁས་གྲུབ་སྨྲ་བའི་སེང་གེ་བསྔགས་པའི་ཕུལ། །དུས་མཐར་བསྟན་ལ་གཅེས་པའི་སྲིད་མིག་གི། །འོད་རླབས་འཇིག་རྟེན་གསུམ་གྱི་ཁོངས་བརྒལ་བ། །སྣང་བ་མཐའ་ཡས་ཆོས་ཀྱི་རྒྱལ་མཚན་མཆོག། རིས་མེད་འགྲོ་འདིའི་གཙུག་གི་ལྷུན་པོར་མཆོད། །འོད་དཔག་མེད་མགོན་མི་ཡི་གར་ཟློས་པས། །ལུང་རྟོགས་ཆོས་ཀྱི་རྒྱལ་མཚན་དར་བོ་ཆེ། །འཛམ་གླིང་ཁྱོན་དུ་སྒྲེང་བའི་ཐུགས་བསྐྱེད་ཅན། །ལྷ་མིའི་བསོད་ནམས་ཞིང་དུ་བྱོན་འདི་རྨད། །གང་ཡང་ཕྱོགས་བཅུ་ནམ་མཁའི་མཐར་གཏུགས་པར། །ཆོས་ཀྱི་རྒྱལ་མཚན་ལེགས་པར་འཛུགས་ཞེས་པའི། །མཚན་རབ་བརྗོད་པའི་རྡོ་རྗེའི་གསུང་དབྱངས་འདིས། །མགོན་ཁྱོད་ལུང་དུ་བསྟན་པར་སྙིང་ནས་སེམས། །མཚན་དཔེ་ལྡན་པའི་སངས་རྒྱས་ཀུན་གྱིས་ཀྱང་། །སཱལའི་ལྗོངས་འདི་ཅི་དགར་བོར་བ་ན། །ཐུགས་རྗེའི་གཏེར་མཛོད་ཟླ་བྲལ་ཁྱོད་གཅིག་པུས། །སྦྱན་རས་བཙས་བའི་བཀའ་དྲིན་བསམ་ལས་འདས། །དྲག་པོ་ཞེས་བྱ་གསེར་སྦྱངས་སྤྲེའུའི་ལོར། །གཡར་མོ་ཐང་གི་ནོར་འཛིན་ཐིག་ལེའི་གཞིར། །ཞབས་མཐིལ་འཁོར་ལོའི་རི་མོ་རྩིབས་སྟོང་བ། །འཕོས་པའི་དགེ་མཚན་གཏམ་གྱི་སྙིང་བོ་སྟེ། །ཁྱད་པར་དངོས་སུ་མཐོང་ཞིང་ཐོས་པ་ཡི། །མཛད་ཆེན་གངྒཱའི་རླབས་འཕྲེང་ལས་ཐོན་པའི། །བསྟན་དང་འགྲོ་ལ་ཡོངས་སྨིན་བདུད་རྩིའི་ཆབ། །བདག་བློའི་བུམ་བཟང་ལྟོ་བར་ཡོངས་སུ་བསྐྱིལ། །ཡན་ལག་བརྒྱད་ལྡན་འཆི་གསོའི་ཐིགས་ཕྲེང་དེ། ། རང་དང་སྐལ་མཉམ་གཞན་ལའང་འགྱེད་སླད་དུ། །ཡི་གེའི་ཟེའུ་འབྲུ་ཆགས་པའི་ཨུཏྤལ་གྱི། །རྣ་ལོང་ཕྱོགས་ཀྱི་བུ་མོར་བདག་གིས་སྦྱིན། །འདི་ནི་མ་བརྟགས་ཉམས་དགའི་གླུ་ངག་མ་ཡིན་ལྷ་ཆེན་ཚངས་པའི་གྲེ་འགྱུར་ཏེ། །གང་བྱུང་ཚིག་སྡེབ་བཅོས་མའི་ངག་རྩོམ་མ་ཡིན་མཚོ་བྱུང་སྒེག་མོ་དགྱེས་པའི་དབྱངས། །འབྲེལ་མེད་བྱུང་རྒྱལ་སྨྲ་བའི་ཅ་ཅོ་མ་ཡིན་འཕགས་ཆེན་དམ་པའི་རྟོགས་པ་བརྗོད། །རབ་བཏགས་ཕུལ་བྱུང་ཚིག་གིས་འུད་སྒྲོགས་མ་ཡིན་བདེན་དོན་ལྷུགས་པོའི་བརྗོད་བྱས་ཕྱུག །〔བསྙོནདོར་གཟུགས་ཅན་གྱི་རྒྱན〕རོ་འཛིན་གློག་ཞགས་འཁྱུག་པ་དོན་ཡོད་ཕྱིར། །ཐམས་ཅད་གཟིགས་པའི་རྟོགས་བརྗོད་ཆ་ཙམ་ཞིག །དབྱངས་ཅན་ཕང་འགྲོའི་རྒྱུད་དུ་དྲངས་པ་ལ། །དད་ལྡན་རྣ་བས་ཡུད་ཙམ་གསན་པར་རིགས། །ཞེས་བྱ་བ་ནི་དམ་པའི་ཞིང་ལ་མཆོད་པར་བརྗོད་པ་དང་བརྗོད་བྱ་ཕུན་སུམ་ཚོགས་པའི་གླེང་སློང་བའི་ངོ་མཚར་བའི་གཏམ་སྟེ་དང་པོའོ།།།།jZWརྗེ་ཙོང་ཁ་པའི་དྲ་བ།

        འཛམ་བུའི་འཁྲི་ཤིང་ལྡེམ་པའི་གསེར་ལྡན་ཁྱོན། །མིའུ་ཐུང་གོམ་པས་གཞལ་དཀའི་གྲྭ་གཅིག་ན། །དགེ་བཅུ་ཚང་བའི་ཡུལ་གྲོང་སྐབས་གསུམ་གནས། །གཅིག་ལས་གཅིག་ལྷག་གླིང་འདིའི་རྒྱན་དུ་ངོམ། །གངས་རིའི་ཕྲེང་བ་ཚར་དུ་དངར་བའི་དབུས། །ཆོལ་ཁ་གསུམ་དུ་བཅད་པའི་བསིལ་ལྡན་ལྗོངས། །དེ་ལས་མདོ་སྨད་མགྱོགས་འགྲོའི་ཆོལ་ཁ་ཞེས། །གྲགས་པའི་མེ་ཏོག་རྣ་བའི་རྒྱན་དུ་དཔྱངས། །ཤར་ན་རི་ཕྲན་སྟོང་གིས་ལེགས་བསྐོར་པའི། །ས་འཛིན་ལྷུན་པོ་རི་རབ་གཉིས་པ་ཞིག །བྱེད་པོ་བློ་གྲོས་རྩལ་གྱིས་བཞེངས་འདྲ་བ། །གཡས་འཁྱིལ་དུང་གི་རི་མོའི་སྙན་པ་འཕུར། །ལྷོ་ན་སྤངས་ལྗོངས་མེ་ཏོག་བརྡལ་བའི་ལྟོར། །གཡུ་འབྲུག་སྔོན་མོ་གསེར་གྱི་ཁྲབ་རིས་ཅན། །ས་ཆེན་མཐིལ་ལ་འཁྱིལ་བའི་འཇོ་སྒེག་གིས།།ཕྱོགས་དེར་དཔལ་དང་འབྱོར་བ་གཡང་དུ་འགུགས། །ནུབ་ན་གསེར་མདོག་ཅོད་པན་འཆང་བ་ཡི། །བླ་རི་ཞེས་གྲགས་ཙོང་ཁའི་ལྷུན་པོ་གང་། །ས་ལས་སྐྱེས་ཀྱང་རི་རྩེ་དགུང་བསྙེགས་པ། །གནམ་སྔོན་གུར་ཁང་འདེགས་པའི་ཀ་བ་ཉིད། །བྱང་ན་རྒྱལ་སྲས་གཞོན་ནུ་དོན་གྲུ་ཀྱིས། །སྦྱིན་པའི་ཕར་ཕྱིན་སྤྱོད་མཆོག་རྫོགས་མཛད་པའི། །དན་ཏིག་ཤེལ་གྱི་རི་བོ་གྲུབ་པའི་གནས། །གནོད་སྦྱིན་ཁྲོས་པའི་ཉམས་བརྒྱ་ལྷུན་གྱིས་གྲུབ། །དེ་དག་དབུས་ན་རྨ་གཡང་ཕྱུག་མོ་ལས། །བབས་པའི་ཆུ་གཏེར་རྨ་ཀླུང་ལྷ་ཡི་ཆབ། །གསེར་འབྲུག་ས་ལ་འཁྱུག་པའི་ཉམས་མཚར་ཅན། །རིས་མེད་སྐྱེ་དགུ་ངལ་གསོའི་རྟེན་དུ་འབབ། །མཛེས་པར་བྱས་སོ་ལྷོ་བྱང་འཛིན་མའི་ཁྱོན། །ཚངས་ཆེན་བློ་གྲོས་མེ་ལོང་ཕང་བར་ཏེ། །མཐོ་རིས་སྐྱེད་ཚལ་སྙིང་དུ་སྡུག་པའི་དཔྱིད། །མདོ་ཁམས་ལྷོ་བྱང་འཛིན་མའི་ཐིག་ལེར་རོ།། 〔བྱ་བ་ཐོག་མའི་གསལ་བྱེད་ཀྱི་རྒྱན〕མརྒད་ཐགས་སུ་བཏགས་པའི་གོས་བཟང་དང་། །བེེ་ཌཱུའི་དར་སྐུད་སླས་པའི་སྐ་རགས་ཀྱིས། །ཉེར་མཛེས་བརྗིད་ཆགས་ས་འཛིན་བུ་མོའི་ཚོགས། །ལང་ཚོ་འབར་བ་འགྲན་བཞིན་ཡི་གར་འོང་། །གདུགས་སྲིབ་རི་བོའི་སུལ་དུ་ཁབ་རྩེ་ཡང་། །འཛུགས་པར་དཀའ་བའི་ཚང་ཚིང་གཡུ་ལོ་ཅན། །ནམ་མཁའི་དབྱིངས་སུ་ཟུག་པའི་ཐང་གསོམ་གྱིས། །ཉི་ཟླའི་འོད་ཀྱང་བདེ་བླག་ཉིད་དུ་འགོག །ཡལ་ག་སྟུག་པོར་བྲེས་པའི་གྲིབ་བསིལ་གྱི། །ལྡིང་ཁང་གུར་དུ་ཕིབས་པའི་འཁྲི་ཤིང་ཚོགས།། སོ་གའི་རླུང་དང་འགྲོགས་པའི་དགའ་སྟོན་གྱིས། །འགྲོ་འདིའི་ཡིད་ལ་དགའ་བདེའི་ཁྲེའུ་སྦྲུམ། །སྣ་ཚོགས་ཚོན་རིས་བཀྲ་བའི་མེ་ཏོག་ཕོན། །མིག་གི་གཟི་དཔལ་འཕྲོག་པ་སྙམ་བྱེད་པའི། །གེ་སར་སྟོང་ལྡན་ལྷུགས་པར་བཞད་པ་ན། །སྦྲང་རྩིའི་ངད་ལྡན་དྲི་ཞིམ་ལྷ་ལམ་འགེངས། །ཅི་འདི་སྐབས་གསུམ་དབང་པོའི་ཡུལ་ལྗོངས་སུ། །བདག་ཅག་མཐོ་རིས་སྐས་ཁར་འཛེགས་སམ་ཅི། །ཡང་ན་གདེངས་ཅན་གྲོང་གི་སྐྱེད་ཚལ་གྱི། །གནམ་སྒོ་ཕྱེ་སྙམ་བདག་ཡིད་ཁྱོགས་ལ་འཕྱང་། །〔ཐེ་ཚོམ་གྱི་དཔེ་རྒྱན〕གནས་འདིར་ཉིན་མོ་ཚ་ཟེར་རྒྱུ་བྱེད་ཅིང་། །མཚན་མོ་བསིལ་སྦྱིན་དབང་པོ་འཆར་བའི་ཕྱིར། །ལྷ་ཀླུའི་འཇིག་རྟེན་མཐོང་བ་མ་ཡིན་ཏེ། །རྨ་ཀླུང་ལྷོ་རྒྱུད་འཛིན་མའི་ལྗོངས་སུ་ངེས། ། 〔གཏན་འབེབས་ཀྱི་དཔེ་རྒྱན〕གངྒཱ་གཉིས་པ་འབབ་པའི་འགྲམ་ངོགས་ན། །སྐྱོར་རའི་མུ་ཁྱུད་དབྱིབས་ལེགས་རི་བོ་དག །ཛ་ལནྔྷ་རའི་རང་བཞིན་མཚོན་པའི་ཕྱིར།། རྩི་ལྗོན་སྐྲ་ལོ་བྱི་བའི་རྣམ་འགྱུར་ངོམས། །དེ་ཡང་གནས་ཡུལ་དཔའ་བོ་མཁའ་འགྲོ་ལ། །མཾ་ས་རཀྟའི་མཆོད་སྤྲིན་དཀྲིགས་པའི་སླད།།ཕལ་བའི་མིག་ངོར་པད་རག་རྩི་ཆགས་པའི། །རང་བྱུང་རི་བོའི་གཏོར་ཚོགས་བཤམས་པ་མཚོན། །རི་བོ་ལ་ལ་ནམ་མཁའི་རུམ་དུ་ཟུག་འདྲ་ཞིང་། །ལ་ལ་དཀན་གཟར་གཡའ་བྲག་རྫ་ཡི་གོ་ཁྲབ་གྱོན། །ལ་ལ་མརྒད་མདངས་འཛིན་གསོམ་པས་ངོས་ཀུན་ཁྱབ། །ཀུན་ཀྱང་མཛེས་སྡུག་ལྡན་པའི་ལྷུན་པོ་འདི་དག་གང་། །བརྗིད་ཆགས་མཛེས་མཚར་མཐོ་ཞིང་དབྱིབས་ལེགས་པའི། །སྟོང་རི་དར་རྒྱལ་གུང་ཡེ་ཁྲེབ་ཆེན་དང་། །འབྲུག་མོ་ཙག་རྡེའུ་གནམ་མཆོངས་ཤ་བོ་སྟེ། །བགྲང་ཡས་ས་འཛིན་ལྗོངས་འདིའི་རྒྱན་དྲུ་གྲུབ།། ཅེས་བྱ་བ་ནི་ལྷ་མིའི་རྣམ་འདྲེན་དམ་པ་ཉིད་སྐུ་འཁྲུངས་པའི་ཡུལ་གྲུ་ལེ་ལག་དང་བཅས་པའི་རི་བོ་དང་ནགས་ཚལ་གྱི་ཁྱད་པར་བརྗོད་པའི་ངོ་མཚར་བའི་གཏམ་སྟེ་གཉིས་པོའོ། ། གནའ་དུས་རྫོགས་ལྡན་བསྐལ་པའི་ཆུ་མཚོ་དབུས། །རྒྱལ་བའི་ལུང་རྟོགས་བསྟན་པའི་པད་དཀར་ལྗོན། །རིས་མེད་སྐྱེ་འགྲོ་སྨིན་ཅིང་གྲོལ་བའི་དཔྱིད། །རྣམ་པར་རྒྱས་པའི་ཕན་བདེ་བརྗོད་ལས་འདས། །གང་དེར་འདུལ་མངོན་མདོ་སྡེའི་སྤྲིན་རུམ་ལས། །དམ་ཆོས་དབྱར་རྔ་ཕྱོགས་སུ་བརྡུངས་པའི་སྒྲས། །སྐལ་བཟང་རྨ་བྱ་མྱོས་པའི་གར་སྟབས་ཀྱིས། །རྒྱན་དྲུག་དུས་ཀྱི་འཕྲིན་ལས་མངོན་པར་མཚོན། བླང་དོར་འཁྲུལ་མེད་འདོམས་པའི་འཆད་པ་དང་། །སྨྲ་ངན་ལོག་རྟོག་དྲུངས་འབྱིན་རྩོད་པའི་དཔལ། །ཆོས་ཀུན་དྲི་ཟའི་ང་རོར་འགུགས་པའི་རྩོམ། །མཁས་པའི་བྱ་བ་རྣམ་གསུམ་འགྲན་བཞིན་འཕེལ། །རྟག་ཆད་མཐའ་གཉིས་སྤངས་པའི་ཡང་དག་ལྟ་། །རང་སེམས་གླང་སྨྱོན་འདུལ་བའི་དཔྱད་འཇོག་སྒོམ་། །བཅས་མཚམས་ཚུལ་བཞིན་སྲུང་བའི་ཀུན་སྤྱོད་དེ། །བསྟན་པའི་མཛད་ཆེན་ཡོད་དགུའི་འཕེལ་ཁ་རྫོགས། །ལ་ལ་གཞུང་ཆེན་པོ་ཏིའི་ཞལ་ཕྱེ་ནས། །འཆད་ཉན་ཐོས་བསམ་ལས་ཀྱིས་སྒྲོ་འདོགས་གཅོད། །དོན་དང་འབྲེལ་བའི་འབེལ་གཏམ་བརྒལ་བརྟགས་ཀྱིས། །ཟབ་དོན་གནས་ལ་བློ་སྒོ་འབྱེད་པར་བརྩོན། །ལ་ལ་དྲང་སྲོང་དགྱེས་པའི་བྲག་སྐྱིབས་སུ། །ལྟོ་གོས་ངན་ངོན་ཙམ་གྱི་འཚོར་བརྟེན་ནས། །སྲིད་འབྱོར་ཟས་ལ་ཞེན་ལོག་ངེས་འབྱུང་གིས། །མཉམ་བཞག་ཏིང་འཛིན་ཞི་བདེའི་ཀློང་ལ་འབྱམས།།དེ་ལྟར་བཤད་སྒྲུབ་ཟུང་འབྲེལ་ཆོས་ཀྱི་སྡེ། །རྒྱུ་སྐར་སྦྲེལ་བའི་ཕྲེང་ཐག་ཆད་འདྲ་བ། །གཙུག་ལག་ཁང་དང་རི་ཁྲོད་སྒྲུབ་པའི་གྲྭ། །མཆོད་འོས་རྟེན་གྱི་མཛོད་བརྒྱ་ས་འདིར་གང་། །ལུང་དང་རྟོགས་པའི་དབྱིག་ལྡན་དམ་པའི་མགོན། །གཞུང་ལུགས་སྡེ་སྣོད་གསུམ་འཛིན་པཎྚི་ཏ། །སྡོམ་ཁྲིམས་སྲོག་ལས་གཅེས་སྤྲས་འདུལ་བ་འཛིན། །ལྷར་བཅས་འགྲོ་བའི་ཡོན་གནས་དད་པའི་ཞིང། །གསང་ཆེན་རྒྱུད་སྡེ་རྣམ་བཞིའི་བུམ་བཟང་ལས། །ཚེ་གཅིག་ཉིད་ལ་སངས་རྒྱས་སར་འགོད་པའི། ཉེ་ལམ་བདུད་རྩི་རོ་བརྒྱས་མྱོས་པའི་ཁྱུ། །མཁའ་སྤྱོད་ཞིང་དུ་ཕུར་བའི་མཐའ་མི་ལང་།། ཞེས་བྱ་བ་ནི་ལྗོངས་འདིར་སྔོན་བྱོན་བསྟན་འཛིན་གྱི་སྐྱེས་བུ་དག་གིས་ཕྱག་རྗེས་རྨད་དུ་བྱུང་བ་བསྐྲུན་པའི་ངོ་མཚར་བའི་གཏམ་སྟེ་གསུམ་པའོ།། ཡ་མཚན་བཟོ་རིག་དགུ་ཕྲག་ཟུང་ལྡན་པའི། །འཇམ་དཔལ་གདུལ་ཞིང་མ་ཧཱ་ཙི་ནའི་གྲོང་། །ཁྱད་འཕགས་གྲགས་པའི་རྫི་རླུང་ནམ་མཁའི་མཐར། །འགོག་མེད་འཕུར་བའི་ངོ་མཚར་རྨད་དུ་བྱུང་། །མ་ངྷུ་མ་ཏི་སྦྲང་རྩིའི་བློ་གྲོས་ལ། །སྙིང་ནས་སྐྱབས་འཚོལ་ཨ་རབ་མི་ཡི་རྒྱུད། །ཀླུང་ཆེན་འགྲམ་དང་ལ་ལུང་ཕྱོགས་ཀུན་ཏུ། །འཁོར་བའི་གྲོང་རྡལ་བདེ་འབྱུང་གདུལ་བར་ཆགས། །གང་ན་ཉམས་དགའི་ནགས་ཚལ་ལྗང་ཕོན་གོས་སུ་བཀླུབས། །རྫ་ཆུ་སིལ་མ་སྔོན་མོ་ལྷུང་ལྷུང་མདུན་དུ་རྒྱུགས། །སྣ་ལྔའི་ལོ་ཏོག་གཡུར་ཟའི་ས་ཞིང་མཐའ་བྲལ་དབུས། །སྐབས་གསུམ་གཞལ་མེད་ཐང་ལ་འཕོས་འདྲ་འདི་དག་ཅི། །དགུང་ལ་བསྙེགས་པའི་རི་འདབས་བགས་ཀྱིས་ཐང་ལ་གཞོལ། །སྔོ་ལྗང་རྩྭ་ལོ་ཆེད་དུ་མལ་སྟན་བཤམས་འདྲ་བ། །རི་སྐྱེས་སྣ་ཚོགས་གར་དུ་འཁྲབ་པའི་བ་གམ་ན། །འཇོག་པོའི་ཕོ་བྲང་ས་ལ་བཞག་གམ་འདི་ནི་ཅི། །གཟུགས་དང་ལང་ཚོའི་མེ་ཏོག་འདབ་བརྒྱ་ཕང་ཕུང་བཞད། །གངས་སུལ་ལས་ཐོན་སེང་གེ་དཀར་མོའི་དཔའ་རྩལ་ངོམ། །སྟོད་སྨད་ལུས་ཀྱི་ཞྭ་གོས་ཆ་བྱད་སྡུག་གུ་མས། །དབང་མེད་ཡིད་རབ་འཕྲོག་པའི་སྐྱེ་འགྲོ་འདི་དག་སུ། །བརྒྱ་བྱིན་གྲོང་ཁྱེར་ཐང་ལ་བབས་འདྲ་ནི། །སྨད་ཀྱི་ཆར་གནས་རྡོ་སྦིས་སེ་ཆང་དང་། །དབུས་ན་གཅུ་འཁོར་བིས་མདོ་ཀ་རིང་སྡེ། །སྟོད་ན་བིས་ཐང་ནས་བཟུང་པྲ་འགྱོང་བར། །གདེངས་ཅན་ཕོ་བྲང་ས་ལ་བཞག་འདྲ་ནི། །ཆོས་རྒྱལ་ཨ་ཤོ་ཀ་ཡི་ཕྱག་རྗེས་ལས། །གྲུབ་པའི་མཆོད་རྟེན་རྣམ་གཉིས་ཉི་ཟླ་ཟུང་།། 〔རྡོ་སྦིས་མཆོད་རྟེན་དང་ར་གཤོང་མཆོད་རྟེན་གཉིས〕གང་དུ་བཞུགས་པའི་ལྗོངས་དང་ཡུལ་ཁམས་སོ། །གཞན་སྡེ་ཟིལ་གནོན་སེང་གེའི་དཔའ་རྩལ་ཅན། །རིགས་གཟུགས་ལང་ཚོས་བསྙེམས་པའི་འགྲོ་འདི་དག །ཆོས་རྒྱལ་མེས་དབོན་དུས་སུ་སོ་སྲུང་དུ། །མངགས་པའི་བྷོ་ཊ་རང་གི་འཁྲུལ་མེད་རྒྱུད། །ཅེས་བྱ་བ་ནི་ལྷོ་རྒྱུད་འཛིན་མའི་ཡུལ་གྲུའི་སྣོད་བཅུད་ཀྱི་དཔལ་ལ་བསྔགས་པའི་ངོ་མཚར་བའི་གཏམ་སྟེ་བཞི་བའོ།།jZWརྗེ་ཙོང་ཁ་པའི་དྲ་བ།

        ཐུབ་བསྟན་དཔལ་འཛིན་བཤད་སྒྲུབ་ཆོས་སྡེ་རྣམས། །དུས་ཀྱི་དམོད་པས་རྒུད་པའི་མཐའ་ལ་སོན། །ཆུ་ཤེལ་མེ་ལོང་ཉི་ཟླའི་དཀྱིལ་འཁོར་དེ། །གནམ་སྟོང་མལ་དུ་ལྷུང་བའི་དཔེ་ཡིས་མཚོན། །རྒྱལ་བའི་འཕྲིན་ལས་གཟི་བྱིན་དར་བ་ན། །བསྟན་འཛིན་འདུས་སྡེ་ཆོས་སྤྱོད་སླར་ཡང་འཕེལ། །ཇི་ལྟར་ཡར་ངོའི་ཚེས་ཟླ་ཞག་རེར་ཡང་། །འོད་དཀར་ལང་ཚོ་རྫོགས་པའི་དཔལ་ལ་ལྟོས། །〔གཉིས་ཀའང་དོན་གཞན་བཀོད་པའི་རྒྱན〕ལྗོངས་འདིའི་གཙུག་ལག་ཁང་ཆེན་བརྟེན་པ་བཅས། །རེ་ཞིག་མིང་གི་ལྷག་མར་གྱུར་ན་ཡང་། །བཀྲ་ཤིས་འབུམ་ལྡན་བགྲང་བྱ་འདི་ཡི་དབྱར། །ལྔ་ཕྲག་ཅིག་ཅར་ཆོས་ཀྱི་སྒོ་མོ་ཕྱེ། །བསླུ་མེད་རྟེན་ཅིང་འབྲེལ་འབྱུང་རྒྱ་མཚོའི་རླབས། །དུས་ལས་ཡོལ་མེད་དགེ་མཚན་སྣང་བ་དཀར། །ཉིན་མོར་བྱེད་པའི་དཔལ་བཞིན་ཤར་བ་ན། །བྱིས་པའི་སྤར་མོ་བགྲད་པས་ཇི་ལྟར་འགེབས། །གང་ཚེ་བདེ་ལྡན་ཞིང་གི་སྟོན་པ་མཆོག །ལྗོངས་འདིའི་བསོད་ནམས་ཞིང་དུ་སྤྱན་དྲངས་ཚེ། །ལྷ་མིའི་མཆོད་བསུ་ཀུན་ཏུ་བཟང་པོའི་སྤྲིན། །ལྷ་ལམ་ཁྱོན་དུ་དཀྲིགས་པའི་ལྟད་མོ་བཤམས། །འཕྲུལ་ལས་བཏོན་པའི་འདོ་ལི་ཡ་མ་ཟུང་། །རླུང་གི་ཤུགས་འཆང་རྟ་མཆོག་འགྲན་པའི་དཔུང་། །རུ་མཚོན་དགུང་ལ་འཕྱར་བའི་སྟག་ཤར་རྣམས། །བརྩེ་ལྡན་མགོན་ཁྱོད་བསུ་བའི་གར་ལ་ཆས། ། དེ་ཚེ་མིག་སྟོང་ལྡན་པ་གཟིགས་མོའི་ཕྱིར། །དགུང་སྔོན་སྤྲིན་གྱི་ཡོལ་བ་རྣམ་བསལ་ཏེ། །ཉིན་མོར་བྱེད་པའི་སྒྲོན་མེ་ལག་ཐོགས་ནས། །ས་ཐོག་འགྲིམ་པའི་ཆོ་འཕྲུལ་གཟུགས་སུ་ཤར། །〔ཕེབས་པའི་ཉིན་ཧ་ཅང་གནམ་ཐང་བ་ལ་དམིགས་པའི་རབ་བཏགས་ཀྱི་རྒྱན 〕ཁྱོད་ཞལ་ལན་གཅིག་མཐོང་བས་འཁོར་མཚོ་ལས། ། ཐར་པའི་ས་བོན་ཐེབས་པའི་ཡིད་ཆེས་བློས། །ཡན་ལག་ལྔ་ག་ས་ལ་གཏུགས་པའི་ཕྱག། ཉེན་དང་མཚན་དུ་འཚལ་བའི་གྲངས་མ་ཟིན།། གླང་བོའི་སྣ་ལྟར་བརྐྱངས་པའི་སྐྱབས་སྦྱིན་གྱི།། ཕྱག་དབང་དཔག་བསམ་ལྗོན་པའི་བསིལ་གྲིབ་ཅན། །ཡན་ལག་མཆོག་ལ་རེག་པ་དེ་སྙེད་པར། །ཕྱིར་མི་ལྡོག་པའི་ལུང་བསྟན་ཐོབ་པ་མཚོན། །གཟུངས་སྔགས་བཟླས་པའི་ཞལ་ཆབ་ཀྱིས་བརླན་པའི།། པད་རག་མདངས་ལྡན་རྡོ་རྗེ་མདུད་པའི་དར།། འདི་ཕྱིར་འཚེ་བའི་དགེགས་ཀྱི་སྲུང་བ་ལ།། དབང་པོའི་ཕྱག་གི་རྩེ་བརྒྱའི་མཚོན་ལས་རྒྱལ།། སྔགས་འཆང་འཇམ་དབྱངས་བློ་གྲོས་སྒྱུ་འཕྲུལ་མཆོག །འཇམ་དབྱམངས་དགེ་འདུན་རྒྱ་མཚོའི་སྤྲུལ་པའི་སྐུའི། །ཐུགས་བསྐྱེད་ཟླ་བ་དཀར་པོའི་འཛུམ་འོད་ཀྱིས། །ཆོས་སྡེ་གསར་བའི་ཀུན་ད་བཞད་པའི་གཞིར།དགེ་འདུན་བགྲེས་གཞོན་ལི་ཁྲིའི་སྟོད་གཡོགས་ཅན།། ཚོགས་མཆོད་རྫས་ཐོགས་པས་མདུན་བསུས་ཏེ། །བཀྲ་ཤིས་རེ་ཁཱས་བརྒྱན་པའི་གུར་ཁང་དུ། །སེང་གེས་བཏེགས་པའི་ཁྲི་ལ་ཞབས་ཟུང་འཁོད།། བྱི་རུའི་ལང་ཚོ་རྒྱས་པའི་ཚེ་ལྷའི་སྐུར།། མངོན་བཞེངས་གྲུབ་རྒྱལ་ལྷ་མོ་ལས་བརྒྱུད་པའི།། ཚེ་དབང་འཆི་བ་མེད་པའི་བདུད་རྩི་ཡིས། །ཉི་ཟླའི་ཚེ་དང་མཉམ་པའི་བྱིན་རླབས་བསྩལ། །ཆོས་ཀྱི་བཀའ་དྲིན་ཐོབ་པའི་གཏང་རག་ཏུ།། དངོས་བཤམས་ཡིད་སྤྲུལ་རྒྱ་མཚོས་མཆོད་དང་ལྷན། །གཡེར་གཤོང་སྤྲལ་པས་སྒྲ་དག་གསལ་གསུམ་གྱི། །མཎ་བཤད་གསུང་གི་མཁས་དགུའི་ཁེངས་པ་བསྙིལ། །ཡུམ་དོན་བདུད་རྩིས་ཕྱུག་པའི་སྡེ་སྣོད་འཛིན།།སྔ་ཕྱི་རྒོལ་བའི་ཚུལ་གྱིས་ཆོས་འཁོར་ལས། ། བརྩམས་པའི་བགྲོ་གླེང་ཆོས་ཀྱི་རྔ་ཆེན་སྒྲས།།ཀུན་ཀྱང་རབ་དགའི་སྒྲོ་མདོངས་གུར་དུ་ཕིབས།། སྐུ་མཆོག་གསེར་གྱི་ལྷུན་པོ་མཐོང་བ་དང་།། གསུང་དབྱངས་ཆོས་ཀྱི་གཎྜི་ཐོས་པའི་དགེས། ། བགྲང་ཡས་སྐལ་ལྡན་སྐྱེ་དགུའི་ཡིད་ཀྱི་མཚོར།། ལེགས་ཚོགས་པད་མའི་ལྗོན་བཟང་སྐྱེད་དུ་བསྲིངས།། ཞེས་བྱ་བ་ནི་ཆོས་སྡེ་ཆེན་པོ་བིས་མདོ་དཔལ་གྱི་དགོན་ཆེན་ཀུན་གཟིགས་མཆོག་གི་ཞབས་ཟུང་བཀོད་པའི་དགེ་མཚན་ལས་བརྩམས་པའི་ངོ་མཚར་བའི་གཏམ་སྟེ་ལྔ་བའོ། ཚོགས་གཉིས་རིན་ཆེན་ཁམས་ལས་ལེགས་གྲུབ་བཤད་སྒྲུབ་འོད་ཟེར་འབུམ་འཕྲོ་བའི། །ཉི་ཟླའི་རྣ་ལོང་ཟུང་གིས་མཛེས་ལྡན་མཁས་གྲུབ་སློབ་ཚོགས་གསེར་རིས་བསྐོར། །གངས་ཅན་གླིང་བཞིའི་དབུས་ན་མངོན་འཕགས་ཐུབ་པའི་གདུང་འཚོབ་ལྷུན་པོ་ཞིག། བློ་བཟང་རྒྱལ་བསྟན་ཆུ་སྲིན་གྲོང་ཁྱེར་དཔེ་མེད་མཛེས་པའི་མགོན་དེ་སུ། །མི་འཇིགས་བཞི་ལྡན་དྲི་མེད་ནོར་གྱིས་གཏམས།། དམ་པའི་རླབས་ཕྲེང་ཆོས་ཀྱི་ཟེགས་མས་ཕྱུག། རྒྱ་ཆེན་ཡོན་ཏན་གཏིང་དཔག་དཀའ་བའི་ཀློང་།། བསྟན་པའི་མཚོ་ཆེན་གང་དེ་བདག་གི་སྐྱབས།། གང་གི་ཐུགས་བསྐྱེད་སྤྲིན་གྱི་བ་གམ་ལས།། ཐོན་པའི་ཨེ་ཝཾ་དགའ་ཚལ་ཉམས་དགའི་གྲོང་།། འོག་མིན་ས་ལ་འཕོས་འདྲར་བསྔགས་པའི་གཏམ། འཇིག་རྟེནརྣ་བའི་བུ་གར་རིང་ནས་སིམ། །བཀའ་དྲིན་མཚུངས་མེད་བཤེས་གཉེན་ཉིན་མོར་བྱེད།། མྱང་འདས་སྒྱུ་མ་ཆེན་པོའི་ཞིང་ཁམས་སུ།། གཞོལ་བའི་ཐུགས་དགོངས་བཟློག་མེད་ཤར་བ་ན། །ཐུབ་བསྟན་པད་ཚལ་སྐད་ཅིག་ཉིད་ལ་ཉམས།།དེ་ཚེ་བསོད་ནམས་ཞིང་མཆོག་ཤ་རཱི་རཾ། །སྙིང་བོར་གཏམས་པའི་བདེ་གཤེགས་མཆོད་པའི་རྟེན། །ཀླུ་ཡི་གྲངས་ལྡན་བཞུགས་པའི་གཙུག་ལག་ཁང་། །གདུང་སེལ་སྨན་གྱི་གུར་ཁང་ཚལ་དེར་བཞེངས། །བི་ཤྭ་ཀརྨའི་ཚོན་རིས་ལང་ཚོ་ཡང་། །མོག་པོར་བྱེད་པའི་སྐུ་བརྙན་སྣ་ཚོགས་ཀྱི། །ཞལ་ཐང་མཇལ་བས་མི་ངོམས་བགྲང་ཡས་པ། །དད་པའི་ཆུ་གཏེར་འཕེལ་བའི་གསོས་སྨན་ཉིད། །རྒྱལ་བའི་བཀའ་དང་བསྟན་བཅོས་འགྱུར་རོ་ཅོག །གྲངས་ཅན་མཁས་པའི་ལེགས་བཤད་པུསྟི་ཀ །གླང་བོས་འདེགས་བཟོད་རྨོངས་མུན་སེལ་བའི་སྒྲོན། །བྲག་རི་བརྩེགས་པས་མཚོན་དུ་འོས་པ་ཙམ། །གུར་ཀུམ་དྲི་ངད་ལྡང་བའི་མཆོད་ཡོན་དང་། །ཉིན་མཚན་ཕྱོགས་མེད་གསལ་བའི་སྒྲོན་མེའི་ཚོགས། །བསོད་ནམས་ཞིང་གི་དངོས་འབྱོར་ཀུན་བཟང་སྤྲིན། །བར་མེད་གཏིབས་པའི་དགེ་མཚན་གཟུགས་སུ་བཀྲ །དེ་ལྟ་ན་ཡང་བརྩེ་མེད་དུས་ཀྱི་སྲིན། །ཁྲོས་པའི་ཟ་བྱེད་གནམ་ས་གདངས་པའི་ཁྱོན། །མཆེ་བའི་མཚོན་ཆ་གཙིགས་པའི་གཅོང་རོང་དུ། །བཟློག་མེད་རྔམས་ཟའི་ཚུལ་དེ་ཡ་རེ་ང་།།〔འཇིགས་རུང་གི་ཉམས་ཀྱི་རྒྱན〕ཨེ་མ་དུས་གསུམ་གཟིགས་པའི་འཕྲིན་ལས་ཀྱི། །སྐྱ་རེངས་གཉིས་པ་སླར་ཡང་ཤར་བའི་ཚེ། །བྱིན་རླབས་ཆབ་ཀྱིས་བརླན་པའི་དགའ་ཚལ་དེ། །དཔྱིད་དཔལ་ཡར་ཟླའི་ལང་ཚོ་དར་བར་མརྩོན།། དེ་ཚེ་སངས་རྒྱས་འོད་དཔག་མེད་པའི་མགོན།།མི་ཡི་གར་ཟློས་ངྷརྨ་ངྷ་ཛའི་ཞབས། །གུས་པས་སྤྱན་དྲངས་ཞབས་སོར་པད་མོའི་འདབ། །ཨེ་ལྦཾ་ཚལ་དུ་བཞད་པའི་སྐལ་བཟང་ཐོབ། །ངུར་སྨྲིག་གོས་འཆང་རབ་བྱུང་བཙུན་པའི་སྡེ། །གོས་དཀར་ལྕང་ལོའི་རྒྱན་ལྡན་སྔགས་པའི་སྡེ། །གཤེན་སྟོན་སྲོལ་འཛིན་གཡུང་དྲུང་བོན་པོའི་སྡེ། །ཚར་དུ་དངར་བས་མཆོད་བསུའི་ལས་ལ་བྲེལ། །སེང་གེ་མཇིང་བསྣོལ་བཏེགས་པའི་རྡོ་རྗེ་ཁྲིར། །གསེར་རི་ཇི་བཞིན་བརྗིད་པའི་སྐུ་མཆོག་གིས། །ཟབ་གསང་ཆོས་ཀྱི་རོལ་མོ་འབུམ་དགུའི་གླུ། །གྱེར་བའི་དབྱངས་སྙན་བསྟན་པའི་བཙས་སུ་སྨིན། །ཆོས་ཀྱི་སྤྱན་ལྡན་རྫོང་དཀར་སྤྲུལ་པའི་སྐུ། །མཁས་བཙུན་ལུང་རིགས་རྒྱ་མཚོས་ལྷ་ཡི་དར། །ཕྱག་ཏུ་ཐོགས་ཏེ་ཡིད་ལ་བརྣགས་པའི་དོན། །སྙན་འཇེབས་གསུང་གིས་རྗེས་སུ་འཛིན་པར་གསོལ། །དད་པའི་གཏེར་མཛོད་འཇོག་པོའི་གྲོང་ཁྱེར་ནས། །ཕངས་མེད་བླངས་པའི་གྱ་ནོམ་མཆོད་པའི་རྫས། །ཁྱོད་ཐུགས་མཉེས་ཕྱིར་གུས་པས་ཕུལ་བ་ལ། །དོན་དང་ལྡན་པའི་མཛད་སྒོ་མཁའ་ལྟར་ཡངས། །གཙུག་ལག་ཁང་ཆེན་སྙིང་གའི་དོ་ར་རུ། །ལྷ་ཡི་མེ་ཏོག་ཕྱོགས་བརྒྱར་འགྲེམ་དང་ལྷན། །བླ་སྤྲུལ་ཆེ་དགུའི་འཁོར་སློབ་དང་བཅས་པས། །རྡོ་རྗེ་འགྲོས་ཀྱི་ཞབས་རྗེས་ས་ལ་ཕབ། །རྭ་ཆེན་རྡོ་རྗེ་གྲགས་དཔལ་དངོས་བྱོན་སྐུ། །གྲུབ་དབང་དམ་པ་སྐུ་ཕྲེང་སྔ་ཕྱི་ཡི། །སྲིད་ན་རྙེད་དཀའི་གདུང་རྟེན་ནོར་བུའི་དྲུང་། །དཔག་པར་དཀའ་བའི་ཐུགས་དམིགས་རྒྱ་ཡིས་བཏབ། །ལྷོ་རྒྱུད་བསྟན་པའི་སྲོག་ཤིང་ཆོས་ཀྱི་མགོན། །རྗེ་བཙུན་འཇིགས་མེད་འཕྲིན་ལས་རྒྱ་མཚོ་གང་། །བལྟམས་པའི་ཚལ་དུ་དངོས་ཕེབས་བྱིན་རླབས་ཀྱི། །ཆར་ཆེན་མེ་ཏོག་ཕྲེང་བའི་དོ་ཤལ་དགོད། །སྐུ་ཡི་མཚན་དཔེ་མཛའ་བས་མི་ངོམས་ཤིང་། །གསུང་གི་རྒྱུད་མངས་ཉན་པས་མི་ཚིམ་པ། །འདི་འདྲའི་དགའ་སྟོན་ཁྱོད་མིན་སུ་ཡིས་སྦྱིན། །ད་དུང་ཡང་ཡང་སྤྱོན་དང་ཐུགས་རྗེའི་གཏེར། །〔རེ་བཅས་ཀྱི་དགའ་བའི་རྒྱན〕ཞེས་བྱ་བ་ནི་ཀ་རིང་ལུང་གཡོན་རི་ཁྲོད་ཨེ་ཝཾ་དགའ་ཚལ་དུ་ཕེབས་ཏེ་ཕན་བདེའི་གྲུ་ཆར་དགུང་ནས་ཕབ་པའི་ངོ་མཚར་བའི་གཏམ་སྟེ་དྲུག་པའོ།། ཇི་ལྟར་རབ་དྭངས་རྫིང་བུའི་མེ་ལོང་དུ། །ཟླ་ཤེལ་གཟུགས་བརྙན་འབད་མེད་ངང་གིས་འཆར། །དེ་བཞིན་དམ་པའི་འཕྲིན་ལས་འོད་དཀར་གྱིས། །དད་པའི་ཀུན་ད་ལྷུགས་པར་འགྲོལ་ལ་ལྟོས། །〔མཚུངས་སྤྱོར་གྱི་དཔེ་རྒྱན〕གནོད་སྤྱིན་ཕྱོགས་ན་བལྟས་པས་མི་ངོམས་ཤིང་། །མཁའ་ལྡིང་འཕུར་བའི་རྩལ་གྱིས་མི་སླེབ་པའི། །བྲག་རི་མཐོན་པོ་གནམ་གྱི་ཀ་བ་ཞིག། །ས་ལ་ཟུག་པའི་སྣང་བ་འདི་ནི་ཅི། །གང་འདི་བགྲང་ཡས་བསྐལ་པའི་སྔོན་རོལ་ཏུ། །ཐུབ་པའི་སྐྱེས་རབས་དོན་ཀུན་གྲུབ་པ་དེས། །ཕྱིན་དྲུག་དང་པོ་མཐར་ཕྱིན་གྲུབ་པའི་གནས། །དན་ཏིག་ཤེལ་བྲག་སྔོན་མོའི་རྫ་རྒྱུད་ལགས། །དེ་ཡི་གཤམ་ན་པིར་ཐོགས་མཁས་པ་ཡིས། །བྲིས་པ་ལགས་སམ་སྙམ་པའི་ཡུལ་ལྗོངས་ཤིག །མཐོ་རིས་མཛེས་ཆའི་སྙིང་བོ་ཀུན་བསྡུས་པའི། །གྲོང་ཁྱེར་མིག་གི་བཅུད་ཀུན་འཕྲོག་འདི་ཅི། །འདི་ནི་གངས་ཅན་ཕྱི་དར་བསྟན་པ་ལ། །ཟླ་མེད་ཕྱག་རྗེས་བསྐལ་པའི་སྲིད་དུ་ཡང་། །གཞོམ་མེད་ཐུགས་བསྐྱེད་རབ་ཡངས་དགོངས་པ་གསལ། །བླ་ཆེན་སྐུ་འཁྲུངས་ལིམྦིའི་དགའ་ཚལ་ཉིད། །དེ་ཡི་ཁོར་ཡུག་ཅོང་ལ་རིང་མོའི་སུལ། །བར་བར་དག་ཏུ་གནས་བཅས་བགྲང་ཡས་པའི། །དད་དང་འབྱོར་བས་རྣམ་ཕྱུག་འགྲོ་ཀུན་ཀྱང་། །མཆོག་གསུམ་སྤྱི་བོར་འཛིན་པ་ཤ་སྟག་སྟེ། །ཁྱད་པར་གསང་སྔགས་དར་རྒྱས་གླིང་བ་ཡི། །དགེ་འདུན་དབུས་བཞུགས་ལྷ་འབངས་དང་བཅས་པས། །ཐམས་ཅད་མཁྱེན་པ་གང་ཉིད་ཕྱོགས་དེ་རུ། །ཇི་ལྟར་ཞུས་ན་འགབ་ཅེས་ཉིན་མཚན་བགྲོས། །བརྩེ་བའི་གཏེར་ཆེན་སྙིང་རྗེའི་གཞན་དབང་དུ། །ཡོངས་གྱུར་འཕགས་ཆེན་དམ་པའི་སྙན་དྲུང་དུ། །སྤྱན་དྲེན་ཞུ་ཚིག་རེ་བའི་སྙིང་བོ་ཅན། །བཏེགས་པའི་མདོ་ལ་ཞལ་བཞེས་བདུད་རྩི་བབས། །འཇིག་རྟེན་བྱེད་པོ་ཚངས་པའི་པིར་གྱིས་གང་འདོད་རི་མོ་མ་བྲིས་ཤིང་། །ས་འདིའི་སྔོན་བྱོན་དཔའ་བོ་སུས་ཀྱང་མནལ་ལམ་དུ་ཡང་མ་རྨིས་པའི། །སྔོན་མེད་འཕྲུལ་མཚར་རྨ་ཀླུང་ཟམ་ཆེན་ཕན་ཚུན་ཐད་ཀར་སྦྲེལ་བ་འདི། །མགོན་ཁྱོད་ད་ལྟ་ཉིད་དུ་འབྱོན་པའི་སྔ་ལྟས་སྐྱ་རེངས་ཤར་མིན་ནམ། །ཟུང་འཇུག་གྲུབ་བརྙེས་ཨ་བྷྱ་དྷྱ་ན་ལ། །གནའ་དུས་ཆེད་བཞེངས་སྒྲུབ་ཁང་ར་བ་དེར། །སྒྱུ་མའི་བློ་ལས་བཏོན་པའི་གུར་ཁང་ཞིག །ལྷ་ཡི་ཁང་བཟང་དང་མཚུངས་ཐོལ་གྱིས་བྱུང་། །སྲིད་པའི་མཐར་ཡང་གཞོམ་གཞིག་རབ་སྤངས་པའི། །རྡོ་རྗེའི་རང་བཞིན་འཕང་དུ་མཐོ་བའི་ཁྲི། །བྱིན་རླབས་ཞུ་བའི་རྟེན་མཆོག་བླ་ན་མེད། །སྐད་ཅིག་ཉིད་ལ་འདོད་འཇོའི་གཏེར་དུ་བཞེངས། །བསྟན་པའི་བདག་པོ་སྟོན་པ་བཅོམ་ལྡན་འདས། །འཕགས་པའི་ཉན་ཐོས་ཆེན་པོ་བརྒྱད་ཟུང་གི ། །སྐུ་བརྙན་བྱིན་རླབས་སྟོང་འབར་དངོས་ཉིད་དུ། །འཁྲུལ་བར་དོགས་པ་འཛིན་པས་གྲལ་གོང་མཛེས། །སྤྱན་ལ་བཀོད་ལེགས་སྣ་ཚོགས་མཆོད་པའི་རྫས། །སྙན་ལ་ཆེར་འཇེབས་རྔ་སིལ་དུང་གི་སྒྲ ། །ཤངས་ལ་དྲི་ཞིམ་ཙན་དན་བདུག་སྤོས་སོགས། །མཆོད་པའི་རྣམ་གྲངས་ཚར་དུ་དངར་བ་ན། །སྨིན་ཟླའི་དཀར་ཕྱོགས་བཟང་བ་གསུམ་པའི་ཉིན། །རླུང་གི་ཤུགས་འཆང་འཕྲུལ་གྱི་ཤིང་རྟའི་ཚོགས། །བསྐྱོད་པའི་སྒྲ་ཆེན་གནམ་ས་འགེངས་པ་བཅས། །དགའ་བ་བརྒྱ་ལྡན་ཅིག་ཅར་ཉམས་སུ་བབས། །ཚོགས་གཉིས་རབ་དཀར་འོ་མཚོ་ལས་འཁྲུངས་སྐུའི། །ཞལ་མཐོང་ཙམ་གྱིས་སྣང་བ་སྒྱུར་བའི་སྤྲིན། །གཡའ་བྲལ་དད་པའི་མཁའ་ལ་དཀྲིགས་གྱུར་པ། །བསམས་ཀྱིན་བདག་ཅག་ཨེ་མ་སྐལ་བ་བཟང་། །དེ་ཚེ་དད་པས་འདུས་པའི་རིས་མེད་འགྲོ། །ཁྲི་ཕྲག་གྲངས་ལས་བརྒལ་བའི་བསུ་སྦྲེང་གིས། །ཡི་གེ་དྲུག་མའི་གདངས་སྙན་ང་རོའི་དབྱངས། །ས་གསུམ་འདར་བ་སྟེར་བའི་གཟི་བྱིན་ངོམ། །སྔོན་དུས་དམར་གཡོ་གཙང་གསུམ་དགོངས་གསལ་གྱིས། །བསྟན་པའི་མེ་རོ་གསོས་པའི་ཉེ་གམ་དེར། །ཀུན་ལ་སྨན་པའི་མཛད་སྒོ་འོད་སྟོང་གིས། །ཕན་དང་བདེ་བའི་པད་ཚལ་འབུམ་དུ་བཞད། །ཕྱག་གཡས་སྐྱབས་སྦྱིན་ཕྱག་རྒྱས་དབུགས་དབྱུང་གི། །བྱིན་རླབས་བདུད་རྩི་ཀུན་ལ་འགྲིམས་དང་ལྷན། །སྒྲིབ་གཉིས་བག་ཆགས་རྩད་ནས་འབྱིན་བཟོད་པའི། །ཆོས་ཀྱི་སྒྲ་ཆེན་རྣ་བའི་དབྱིངས་སུ་ལྡིར།། ཐར་ལམ་སྟོན་པའི་ཚིགས་བཅད་གཅིག་ལ་ཡང་།། སྟོང་གསུམ་ནོར་གྱིས་མཆོད་ཀྱང་གཞལ་མིན་ན། །བདག་ཅག་སྐལ་བ་དམན་པས་ཇི་ལྟར་ཡང་། །མཚོན་བྱེད་ཙམ་ལས་བྱས་གཟོའི་ཆར་མི་སྤོབས། །འོན་ཀྱང་རབ་གུས་དད་པའི་ཆུ་མཚོ་ལས། །ཉེ་བར་ཐོན་པའི་ཟང་ཟིང་པདྨའི་ལྗོན། །ཁོ་ལག་ཡངས་པའི་ཡལ་འདབ་མཆོད་པའི་རྫས། །ཞིང་ཁམས་རྒྱ་མཚོར་དམིགས་པ་འདི་ལྟ་སྟེ། །མཚན་དཔེའི་རྒྱུ་སྐར་སྟོང་གི་དྲ་བས་བཀླུབས། །ཕྱག་གཡས་ས་གནོན་ངན་འགྲོའི་འཕྲང་སྒོ་གཅོད། །མཐོང་ན་མི་མཐུན་མེད་པའི་མཛེས་སྡུག་ཅན། །བྱིན་རླབས་གཏེར་མཛོད་སྐུ་ཡི་རྟེན་དུ་ཕུལ། །གངས་ཆེན་རྡོ་རྗེ་ཐེག་པའི་རིམ་གཉིས་དོན། །ལག་པའི་རྫས་བཞིན་སྟོན་པའི་རྒྱུད་འགྲེལ་དང་། །དན་ཏིག་དཀར་ཆག་བླ་ཆེན་རྟོགས་བརྫོད་བཅས། །མུན་སེལ་སྒྲོན་མེ་གསུང་གི་རྟེན་དུ་ཕུལ། །ཆ་ཚད་མ་ནོར་དབྱིབས་ལེགས་བང་རིམ་ཅན། །རིན་ཆེན་ཛྷེེ་ཁྱིམ་ཁམས་ལས་ཡོངས་གྲུབ་པའི། །བདུད་འདུལ་བྱ་ཆུབ་ཆེན་པོའི་མཆོད་པའི་རྟེན། །ཕན་བདེའི་དཔལ་སྟེར་ཐུགས་ཀྱི་རྟེན་དུ་ཕུལ། །ཀརྴ་པ་ནའི་མིང་གིས་བརྫོད་འོས་པ། །སྟོང་ཕྲག་ལྔ་ལྡན་ཚོན་མདངས་ལྔ་བའི་གོས། སྲིད་དུ་རིང་བས་ཐོག་དྲངས་མཆོད་པའི་རྫས། །རྣམ་གྲངས་བརྒྱ་ཕྲག་བརྒལ་བ་སྤྲིན་ལྟར་གཏིབས། །རླུང་གཤོག་ལྡན་པའི་ཅང་ཤེས་བང་རྩལ་འགྲན། །སྐྱེས་གཟུགས་མཐོ་བས་གླང་ཆེན་མཆེད་ཟླར་སྙེམས། །རྔ་རྔོག་དོ་ཤལ་རྒྱན་ཕྲེང་གིས་མཛེས་པའི། །ཆིབས་དང་ཆིབས་རོགས་ཟུང་ལྡན་བཞི་བཅས་ཕུལ། །གང་ཚེ་ལང་ཚོ་ཡོལ་བའི་ཁུར་གྱིས་མནན། །མགྲིན་པའི་ཁུ་བྱུག་མོན་པའི་ནགས་སུ་ཡིབ། །དེ་ལྟ་ན་ཡང་དད་གདུང་ཤུགས་དྲག་བློས། །གསོལ་འདེབས་དབྱངས་ཀྱི་རོལ་མོ་བདག་གིས་དཀྲོལ། །〔ཆ་ཤས་གཟུགས་ཅན་གྱི་རྒྱན〕ཐོག་མར་བླ་ཆེན་གནས་འདིར་འཁྲུངས་ཚུལ་ནས་བརྩམས་ཏེ། །མདོ་སྨད་གྲུབ་པའི་གནས་མཆོག་ཀུན་གྱི་རྩེར་སོན་པ། །རི་བོ་དན་ཏིག་བྲག་གི་ངོ་མཚར་གཏམ་གྱི་ཕྲེང་། ། ཆུང་ངུའི་ཚིག་གི་རྔ་ཆེན་སྙན་དྲུང་དལ་བུས་བརྡུངས། །དེ་ནས་སྐབས་བབ་ཡིད་ལ་བརྣགས་པའི་འབྲས། །ཚིག་གི་ལོ་འདབ་སྟུག་པོས་མ་བསྒྲིབས་པར། །གང་ཞུས་གསན་དགོངས་མཛད་པའི་དགའ་སྟོན་གྱིས། །སྐལ་བཟང་ཡིད་ལ་དད་གུས་ཐོབ་པའི་མཐར། །བསྟན་པ་རིན་ཆེན་ཉིན་མོའི་མགོན་ལྟར་གསལ། །འགྲོ་བའི་བདེ་སྐྱིད་པད་ཚལ་ལྟར་རྒྱས་སླད། །སྣང་བ་མཐའ་ཡས་པན་ཆེན་ཐམས་ཅད་མཁྱེན། །སྐུ་ཚེ་ཞབས་པད་བསྐལ་བརྒྱར་བརྟན་པར་སྨོན། །ཞེས་པའི་དྲང་སྲོང་བདེན་ཚིག་གྲུབ་པའི་ངག །གཎྜིའི་སྒྲ་དབྱངས་རྗེས་འགྲོས་མདུན་བསུས་ནས། །དུས་བཞི་ཕྱི་མའི་གསང་ཆེན་དཀྱིལ་འཁོར་དུ། །རྗེས་འཛིན་ཞལ་བཞེས་སྩོལ་བར་གསོལ་བ་བཏབ། །དེ་ཚེ་ཀུན་གཟིགས་ཆེན་པོའི་ལེགས་སོའི་དབྱངས། །དཀའ་སྩལ་གསུང་གིས་བསྔགས་བརྗོད་མཛད་དང་ལྷན། །སྣེ་ཚར་ས་ལ་རག་པའི་ལྷ་གོས་ཀྱིས། །བདག་མགྲིན་བརྒྱན་པའི་བཀའ་དྲིན་རྨད་བྱུང་ཐོབ། །ཕན་བདེའི་འབྱུང་གནས་རྒྱལ་བསྟན་འཕེལ་ཕྱིར་དང་། །ཡངས་པའི་རྒྱལ་ཁམས་དགའ་བདེས་འཚོ་བའི་སླད། །ཕྱོགས་དང་མཚམས་སུ་བཀྲ་ཤིས་མེ་ཏོག་ཆར། །ཅི་དགར་འབབ་པའི་རྟེན་འབྲེལ་ཡིད་བཞིན་འགྲུབ། །ཅེས་བྱ་བ་ནི་མདོ་སྨད་གྲུབ་པའི་གནས་ཀྱི་ཕྱི་མོ་དན་ཏིག་དགོན་དང་ལྷ་འབངས་ཐུན་མོང་གིས་སྤྱན་དྲངས་ནས་རྒྱ་ཞུར་དུ་ཆིབས་བསྐྱོད་གནང་བའི་ངོ་མཚར་བའི་གཏམ་སྟེ་བདུན་པའོ།།jZWརྗེ་ཙོང་ཁ་པའི་དྲ་བ།

        ཇི་ལྟར་གྲོང་ཁྱེར་བུ་རམ་ཤིང་འཕེལ་དུ། །བཅོམ་ལྡན་འཁོར་བཅས་བྱོན་པའི་རྣམ་ཐར་དེ། །ད་ལྟ་བདག་ཅག་ཕལ་བའི་སྤྱོད་ཡུལ་དུ། །འབྱུང་བར་མི་འགྱུར་གཏམ་དེ་རྫུན་དུ་ཐལ། །གལ་ཏེ་བདེན་ན་བདེ་ལྡན་ཞིང་གི་མགོན། །སྤྲུལ་པའི་སྐུ་མཆོག་དུ་མས་ཡོངས་བསྐོར་ཏེ། །དུས་གཅིག་ཉིད་ལ་བདག་གི་སྐྱེས་ཁྱིམ་དུ། །ལྷན་ཅིག་གདན་འཛོམས་ལྟད་མོ་འདི་ཅི་ཞིག །〔བསྙོན་དོར་གྱི་རྒྱན〕〔དུས་དེར་རྨ་བྱང་ཕྱོགས་ནས་ཕེབས་པའི་སྐུ་འཁོར་གྱི་སྤྲུལ་སྐུ་རྣམས་ནི། འདི་ལྟར། ཡོངས་འཚིན་རྒྱ་ཡགས་རིན་པོ་ཆེ། ཆེ་ཤོས་སྤྲུལ་པའི་སྐུ། །ཨ་ཀྱཱ་སྤྲུལ་པའི་སྐུ། གསེར་ཏོག་སྤྲུལ་པའི་སྐུ། རྗེ་ཆུ་བཟང་རིན་པོ་ཆེ་རྣམས་དང་། རྨ་ལྷོ་རྒྱུད་ཕྱོགས་ནས་ཕེབས་པ་ནི། ཀུན་མཁྱེན་འཇམ་དབྱངས་བཞད་པ། གུང་ཐང་འཇམ་པའི་དབྱངས། མགར་རྩེ་སྤྲུལ་པའི་སྐུ། གཡེར་གཤོང་སྤྲུལ་པའི་སྐུ། ལ་མོ་སྒར་བ་ཚང་། གཙང་པཎྚི་ཏའི་སྤྲུལ་སྐུ་རྣམས་སོ།།〕སྙིང་རྗེ་ཆེན་པོའི་གཞན་དབང་ཁུར་ལྕི་བ། །དགྱེས་འཛུམ་འོད་ཀྱི་དྲ་བས་འཁྱུད་བཞིན་དུ། །ཁང་བཟང་མཆོག་གི་སྟེགས་བུར་བཞུགས་པ་ན། །གནས་དེར་ལེགས་ཚོགས་ཉི་འོད་ལམ་གྱིས་ཕོག །གནའ་དུས་རབ་དཀར་ལས་ལ་བརྩོན་ལྡན་ཅན། །མེས་པོ་དམ་པ་ཚེ་རིང་དོན་གྲུབ་ཀྱི། །གདུང་གི་རྒྱུད་འཛིན་བདག་ཅག་མཆེད་གསུམ་ལ། །ཨེ་མ་ལེགས་བྱས་འདི་ཀོ་གང་ལས་ཐོབ། །ཁྱད་པར་ཤཱཀྱའི་སྲས་སུ་རབ་བྱུང་སྟེ། །ཡོངས་རྫོགས་བསྟན་ལ་མཇལ་བའི་དགེ་སྦྱོང་བདག། །རང་དབོན་སྒྲ་དབྱངས་དམ་པའི་བག་ཆགས་ཅན། ཁུ་དབོན་ཟུང་ཡང་སྲི་ཞུའི་ལས་ལ་བྲེལ། །དཀར་དམར་བཅུད་ཀྱི་སྙིང་བོ་ཀུན་ཚང་བའི། །བཟའ་བཅའ་བཏུང་བའི་ཞལ་ཟས་རོ་བརྒྱ་བ། །རྒྱ་བོད་ཟུང་དུ་འབྲེལ་བའི་གཡོས་སྦྱོར་གྱིས། །བསོད་ནམས་ཚོགས་ཆེན་གསོག་བའི་དགའ་སྟོན་བཤམས། །ཕྱག་དར་མཆོད་འོས་སྐུ་གསུང་ཐུགས་ཀྱི་རྟེན། །བྱིན་རླབས་ཅན་ལ་སྔོན་མེད་གསར་པའི་བྱིན། །འབེབས་པའི་སླད་དུ་རྟེན་འབྲེལ་སྙིང་བོའི་སྔགས། །འོད་ཞུའི་མེ་ཏོག་ཆར་གྱིས་ཅི་ཡང་བརླན། །མཆོག་གསུམ་ནོར་བུའི་ཅོད་པན་ཐོད་དུ་བཅིངས། །གཞན་ཕན་དགེ་བའི་བསམ་པ་མི་འདོར་ངོས། །བུ་རབས་ཚ་རྒྱུད་ཀུན་ཀྱང་རྣམ་དཀར་ལ། །བརྕོན་པའི་བདེན་བརྗོད་ཐུགས་དམིགས་ཡང་དག་བསྐྱངས། །རིག་འཛིན་ཞིང་ཁམས་དཔལ་ལྡན་ཤམྦྷ་ལར། །རིགས་ལྡན་དྲག་པོ་འཁོར་ལོའི་སྐུར་བཞེངས་ཚེ། །འཕོ་མེད་མི་འགྱུར་བདེ་བའི་སྟོང་གཟུགས་སྐུ། །ལག་རྩེར་གཏོད་པའི་གསོལ་འདེབས་སྙིང་ནས་ཞུས། །དཔག་མེད་དྲིན་གྱིས་བསྐྱངས་པའི་ཕ་མ་གཙོས། །མཁའ་མཉམ་རིགས་དྲུག་འགྲོ་བ་འདི་དག་ཀུན། །འཁོར་མཚོའི་ཀློང་ལས་སྒྲོལ་བའི་ཐུགས་རྗེ་ཆེ། ། ནམ་ཡང་ལྷོད་མེད་གཟིགས་པ་དར་བར་ཞུས། །འཕགས་ཡུལ་གསལ་རྒྱལ་བུ་མོ་རྡོ་རྗེ་མར། །མི་སྡུག་བཞིན་ངན་སུས་ཀྱང་མི་མཐོང་བའི། །ཁང་སྐྱིབས་ཕག་ཏུ་ཡིབ་དགོས་རྒྱལ་བོའི་བཀའ། །མི་འདོད་དབང་མེད་ཕྲག་ལ་ཕབ་པ་དེས། །སྟོན་པ་ཉན་ཐོས་འཁོར་བཅས་ཉིན་གཅིག་ལ། །གདུགས་ཚོད་འདྲེན་ཕྱིར་ཡབ་ཀྱིས་སྤྱན་དྲངས་ཚེ། །བུ་མོས་ཞལ་མཐོང་རེ་བའི་དད་ཤུགས་ཀྱིས། །སངས་རྒྱས་དངོས་མཐོང་གཏམ་ཙམ་རྣ་བར་འཇགས། །དེ་བཞིན་ཁྱིམ་འདིར་སྲས་མོ་རྡོ་རྗེ་མའི། །ཚུལ་མཚུངས་མིག་ལོང་བུ་མོ་ཉམ་ཆུང་ཞིག །ཕྱག་དབང་ཞུ་བའི་གོ་སྐབས་ཡོལ་ཉེ་བ། །མངོན་སུམ་མཁྱེན་པའི་མཛད་སྒོ་ཅི་ཡང་བསྟན། །སུས་ཀྱང་མ་བསྐུལ་བུ་མོའི་གམ་དུ་བྱོན། །གནས་བབ་མ་ཞུས་གསུང་གིས་དབུགས་དབྱུང་མཛད། །གནང་བར་མ་གསོལ་འཐོར་འབྲུ་གཙུག་ཏུ་བཀོད། །འདི་ཕྱིར་དགེ་བའི་ཕྱག་དབང་བཀའ་དྲིན་སྩལ། །གང་འདི་རང་གིས་དངོས་སུ་མཐོང་མ་གཏོགས། །བརྒྱུད་དེ་སྨྲས་པས་སུ་ཞིག་ཡིད་རྟོན་བྱེད།། འཕགས་ཆེན་མཛད་སྤྱོད་ཕྲ་མོ་འདི་ཙམ་ཡང་། །མངོན་སུམ་མཇལ་བ་བདག་ཅག་སྐལ་བ་སྦོམ། །ཨེ་མ་ཚུལ་འདིས་རྨོངས་པའི་བྲན་གྱུར་ཆུ་བུར་མིག་ཅན་བདག་འདྲ་ལ། །དད་པའི་འོ་མཚོ་སྐད་ཅིག་དེ་རུ་མཁའ་ལ་མི་འཕྱུར་རང་དབང་ཅི། །རྨ་བྱས་བཏེགས་པའི་རིན་ཆེན་ཁྲིར་བཞུགས་བསམ་བཞིན་མི་ཡི་གར་ཟློས་པ། །ཆོས་གྱི་རྒྱལ་མཚན་སྟོབས་བཅུ་མངའ་བས་ཚེ་རབས་ཕྲེང་བར་རྗེས་འཛིན་མཛོད། །སྙིང་དབུས་འདབ་བརྒྱད་ཟེའི་འབྲུར་ཁྱོད་ཀྱི་སྐུ། །ནམ་ཡང་འབྲལ་མེད་སྒོམ་པའི་དལ་འབྱོར་རྟེན། །མགོན་ཁྱོད་དབུས་བཞུགས་སློབ་ཚོགས་སྣང་བརྙན་གྱི། །རི་མོ་རིན་ཐང་མེད་པའི་དད་རྟེན་བཞག །ཞལ་མཐོང་ཙམ་གྱིས་རིས་མེད་འགྲོ་ཀུན་ཀྱང་། །འདྲེན་པ་ཁྱོད་ཀྱིས་བརྩེ་བས་ཉེར་དགོངས་ཏེ། །ཐེག་ཆེན་རིགས་ཀྱི་ནུས་པ་མྱུར་སད་ཅིང་། །གཏན་བདེའི་ས་ལ་རྐང་བ་བཀོད་པར་སྨིན།། ཞེས་བྱ་བ་ནི་ཤཱཀྱའི་བཙུན་གཟུགས་འཇིགས་མེད་རིགས་པའི་བློ་གྲོས་རང་གི་ལྟེ་མཚལ་ཕོ་བའི་གཞི་ཁྱིམ་དུ་སྤྱན་དྲངས་པའི་ཚུལ་གྱི་ངོ་མཚར་བའི་གཏམ་སྟེ་བརྒྱད་པའོ། །jZWརྗེ་ཙོང་ཁ་པའི་དྲ་བ།

        འདིར་སྨྲས་པ། བསོད་ནམས་དགེ་བའི་ཞིང་མཆོག་ཟླ་མེད་པར། །སྡེབ་ལེགས་རྣར་སྙན་ཚིག་གིས་རབ་བསྔགས་པས། །སྐྱེ་བའི་ཕྲེང་བར་ལེགས་བཤད་སྨྲ་བ་ལ། །མཁས་གྲུབ་སྨྲ་བའི་མགོན་དང་མཚུངས་པར་སྨོན། །ཚངས་སྲས་སྒེག་མོའི་བཻ་ཌཱུའི་རྒྱུད་མངས་ལས། །དྲངས་པའི་བསྟོད་ཚིག་རབ་སྙན་འདི་སྤྲོས་པས། །གསུང་དབྱངས་ཡན་ལག་དྲུག་ཅུའི་རྩལ་རྫོགས་པའི། །དྲི་མེད་ཡོན་ཏན་མཆོག་ལ་དབང་བར་སྨོན། །དྲི་ཟའི་མགུར་གྱི་ལྡིང་ཁང་བ་གམ་ལས། །སྙན་ངག་འགྱུར་ཁུག་ལྡན་པའི་གླུ་བླངས་པས། །ས་གསུམ་སྐྱེ་དགུ་ཡོད་དོ་ཅོག་གི་མགྲིན། །དཔལ་ལྡན་ཚངས་པའི་དབྱངས་ཀྱིས་བརྒྱན་པར་སྨོན།། 〔གསུང་གའང་ཤིས་པ་བརྗོད་པའི་རྒྱན〕ཞེས་པཎ་ཆེན་ཐམས་ཅད་མཁྱེན་ཅིང་གཟིགས་པ་ཆེན་པོ་མདོ་སྨད་འཁྲུངས་གཞིས་ཕྱོགས་སུ་ཕེབས་པའི་ལེགས་མཛད་ཆ་ཤས་ཙམ་གྱི་ངོ་མཚར་བའི་གཏམ་གྱི་རྟོགས་པ་བརྗོད་པ་དངུལ་གྱི་མེ་ཏོག་ཅེས་བྱ་བ་འདི་ནི། པཎ་ཆེན་གོང་མ་བློ་བཟང་ཐུབ་བསྟན་ཆོས་ཀྱི་ཉི་མ་དཔལ་བཟང་པོ་རེབ་གོང་དུ་ཕེབས་དུས། འཇམ་དཔལ་དབྱངས་དངོས་ཡོངས་འཛིན་པཎྚི་ཏ་རྗེས་སུ་ངྷཱིདཿའི་མཚན་ཅན་གྱིས་མཛད་པའི་རྟོགས་བརྗོད་གསེར་གྱི་མེ་ཏོག་མཚན་དང་ཆ་མཚུངས་པའི་དངུལ་གྱི་མེ་ཏོག་གི་རྟོགས་བརྗོད་འདི་འདྲ་བ་ཞིག་གཞན་གྱིས་སྐུལ་བ་ལ་མ་ལྟོས་པར་རྩོམ་འདུན་གི་ཀུན་སློང་སྐྱེས་པ་ན། ལུང་རྟོགས་བསྟན་པའི་གཏེར་ཆེན་གཡེར་གཤོང་སྤྲུལ་པའི་སྐུ་དང་། རང་དབོན་གསེར་རིའི་མ་ཎིའི་སྐུ་སྐྱེ། དན་ཏིག་པ་འཇིགས་མེད་དོན་གྲུབ་རྣམ་གསུམ་གྱིས་སྣེ་ཚར་རིང་བའི་ལྷ་གོས་ཀྱི་སྐྱེས་དང་བཅས་འཕྲལ་དུ་རྩོམ་དགོས་པའི་རྟིང་སྐུལ་མཛད་པ་དང་བསྟུན། སྙན་ངག་མཁན་དབྱངས་ལྡན་རིག་པའི་འདོད་འཇོ་ཞེས་འབོད་པའི་སྤྲུལ་མིང་པས་མགོ་ཟླའི་ཡར་ཚེས་ལ་གར་འདུག་ལྔ་རིག་དྲི་བསུང་འཐུལ་བའི་ལྡིང་ཁང་ནས་བྲིས་པའི་དགེ་བས་རབ་འབྱངས་རྒྱལ་བའི་གསུང་གི་དབང་ཕྱུག་མྱུར་དུ་གྲུབ་གྱུར་ཅིག །jZWརྗེ་ཙོང་ཁ་པའི་དྲ་བ།

        སྭ་སྟི། ཁ་བའི་རྡུལ་བརྩེགས་སྤུངས་པའི་ས་འཛིན་གྱིས། །ཁོར་ཡུག་ཁྱུད་མོར་བསྐོར་བའི་ཞིང་ཁམས་སུ། །དཔལ་སྟུག་རིག་གཞུང་པད་ཚལ་རྒྱས་མཛད་པའི། །བདུད་རྩིའི་ཆབ་འདིས་རེ་བ་སྐོང་བར་སྨོན། ། ། །jZWརྗེ་ཙོང་ཁ་པའི་དྲ་བ།

རྩོམ་སྒྲིག་པ།:མཁའ་ཚེ།
བརྒྱུད་འགོད།  
29.1K