མདུན་ངོས་སུ་བསྐྱོད། |   ཉར་ཚགས་བྱེད། |   མདུན་ངོས་སུ་བཀོད། |  རྒྱ་ཡིག་གི་དྲ་ངོས།

༄༅། །དུས་གསུམ་གྱི་རྣམ་གཞག་ལ་ཅུང་ཙམ་དཔྱོད་པ།

ཡོང་ཁུངས།   བོད་ལྗོངས་རིག་གནས་དྲ་བ།     སྤེལ་དུས།  2014-09-28 11:04:04     རྩོམ་པ་པོ།   བེ་རི་འཇིགས་མེད།    ཀློག་ཐེངས།  
ཡིག་གཟུགས་ཇེ་ཆེར་གཏོང་། ཡིག་གཟུགས་ཇེ་ཆུང་གཏོང་།

     དུས་གསུམ་གྱི་རྣམ་གཞག་ལ་ཅུང་ཟད་དཔྱོད་པ་ལ་གཉིས། གསུང་རབ་ལས་བཤད་པའི་དུས་གསུམ་དང༌། བརྡ་སྤྲོད་པའི་གཞུང་ལས་འབྱུང་བའི་དུས་གསུམ་བཤད་པའོ། །KHjརྗེ་ཙོང་ཁ་པའི་དྲ་བ།

    དང་པོ་གསུང་རབ་ལས་བཤད་པའི་དུས་གསུམ།KHjརྗེ་ཙོང་ཁ་པའི་དྲ་བ།

    དང་པོ་གསུང་རབ་ལས་བཤད་པའི་དུས་གསུམ་གྱི་དབྱེ་གཞི་ནི་འདུས་བྱས་ཁོ་ན་ལ་འཇོག་པ་གྲུབ་མཐའ་ཀུན་མཐུན་ཞིང༌། ནང་གསེས་ཀྱིས་ཕྱེ་ན། བྱེ་བྲག་ཏུ་སྨྲ་བ་རྣམས་ཀྱིས་བུམ་པ་བུམ་པའི་འདས་པའི་དུས་ནའང་ཡོད། དེའི་མ་འོངས་དང་ད་ལྟ་བ་བཅས་གསུམ་ཀའི་དུས་ན་ཡོད་པ་འདོད་དོ། །དེ་ཡང་ཅུང་ཟད་ཞིབ་མོའི་ལུགས་སུ་བྱས་ན། ཆོས་མངོན་པ་མཛོད་ལས།དེ་ཡོད་སྨྲ་བའི་ཕྱིར་ཐམས་ཅད།།ཡོད་པ་སྨྲ་བ་འདོད་དེ་དག།རྣམ་བཞི་དངོས་དང་མཚན་ཉིད་དང༌།།གནས་སྐབས་གཞན་འགྱུར་འགྱུར་ཞེས་བྱ།།ཞེས་པ་ལྟར་གཞི་ཐམས་ཅད་ཡོད་པར་སྨྲ་བའི་བྱེ་བྲག་ཏུ་སྨྲ་བ་རྣམས་ཀྱི་ནང་ནས། དངོས་པོ་གཞན་འགྱུར་གྱི་དུས་གསུམ་འདོད་མཁན་ནི་བཙུན་པ་ཆོས་སྐྱོབ་ཡིན་ཏེ། དེས་མྱུ་གུའི་མ་འོངས་པ་ནས་ད་ལྟ་བ་དང༌། ད་ལྟ་བ་ནས་འདས་པ་ལ་འཇུག་ན་མ་འོངས་པ་དང༌། ད་ལྟ་བའི་དངོས་པོ་འདོར་གྱི་མ་འོངས་པ་དང་ད་ལྟའི་དུས་ཀྱི་རྫས་མི་འདོར་ཏེ། དཔེར་ན་གསེར་གྱི་གཞོང་པ་བཅོམ་ནས་དེས་གསེར་གྱི་ལག་གདུབ་དང་རྣ་རྒྱན་བྱེད་པ་བཞིན་རྣམ་པ་འདོར་ཡང་རྫས་ཀྱི་ངོ་བོ་མི་འདོར་པའི་ཕྱིར། ཡང་འོ་མ་ཞོར་གྱུར་པ་ན་དབྱིབས་དང་རོ་གཞན་དུ་འགྱུར་གྱི་ཁ་དོག་གཞན་དུ་མི་འགྱུར་བ་བཞིན་ནོ་ཟེར། བཙུན་པ་དབྱངས་སྒྲོགས་ནི་དུས་གསུམ་མཚན་ཉིད་གཞན་འགྱུར་དུ་འདོད་དེ། དུས་རེ་རེར་ཡང་མཚན་ཉིད་གསུམ་ཀ་དང་ལྡན་མོད། གང་ཤས་ཆེ་བ་དེའི་སྒོ་ནས་དུས་གསུམ་འཇོག་དགོས་པའི་ཕྱིར་ཏེ། དཔེར་ན། སྐྱེས་བུ་ཞིག་བུད་མེད་ཅིག་ལ་ཆགས་པ་ཤས་ཆེ་བར་གྱུར་པ་དེའི་ཚེ་སྐྱེས་བུ་དེ་བུད་མེད་གཞན་ལ་ཆགས་བྲལ་མ་ཡིན་པ་བཞིན་ནོ།། བཙུན་པ་དབྱིག་བཤེས་ནི་གནས་སྐབས་གཞན་འགྱུར་གྱི་དུས་གསུམ་སྨྲ་སྟེ། མྱུ་གུ་ལྟ་བུ་དངོས་ཉིད་ཀྱང་མ་འོངས་པ་ལ་སོགས་པའི་གནས་སྐབས་སོ་སོར་ཕྱིན་པ་ན་དུས་སོ་སོར་འཇོག་པ་སྟེ། དཔེར་ན་རིལ་བུ་གཅིག་ཉིད་ཤོ་མིག་ཏུ་རིམ་གྱིས་གཞག་པ་ན་གཅིག་དང་བརྒྱ་དང་སྟོང་གི་ཐ་སྙད་བྱེད་པ་བཞིན་ནོ།། བཙུན་པ་སངས་རྒྱས་ལྷ་ནི་གཞན་ནས་གཞན་དུ་འགྱུར་བའི་དུས་གསུམ་སྨྲ་སྟེ། བུད་མེད་གཅིག་ཉིད་ལྟོས་ས་སོ་སོ་ལ་ལྟོས་ཏེ་ཨ་མ་དང་བུ་མོར་བརྗོད་པ་བཞིན་དུ་དངོས་པོ་གཅིག་ཉིད་ཀྱང་སྔ་མ་ལ་ལྟོས་ཏེ་མ་འོངས་པ་དང་ཕྱི་མ་ལ་ལྟོས་ཏེ་འདས་པ་འཇོག་གོ་ཟེར། ལུང་གི་རྗེས་འབྲངས་ཀྱི་མདོ་སྡེ་པས་ནི་སྤྱི་དུས་གསུམ་གྱི་དབྱེ་བ་འཇོག་ཏུ་མེད་དེ་གཞི་གྲུབ་ན་ད་ལྟ་བ་ཡིན་པས་ཁྱབ་པ་སྨྲ་བའི་ཕྱིར། འོན་ཀྱང་ཆོས་དེ་ལ་ལྟོས་པའི་དུས་གསུམ་གྱི་རྣམ་གཞག་འདོད་དེ། གཞི་བུམ་པ་ལྟ་བུ་གཞག་པའི་ཚེ། བུམ་པའི་དུས་སུ་འགགས་ཟིན་པ་རྣམས་བུམ་པའི་དུས་སུ་འདས་པ་དང༌། བུམ་པའི་དུས་སུ་ཡོད་པ་རྣམས་བུམ་པའི་དུས་སུ་ད་ལྟ་བ། བུམ་པའི་དུས་སུ་སྐྱེ་བཞིན་པ་བུམ་པའི་དུས་སུ་མ་འོངས་པར་འདོད་ཅིང༌། དེ་ལས་གཞན་པའི་མདོ་སྡེ་པ་དང་སེམས་ཙམ་པ། རང་རྒྱུད་པ་ཀུན་ཁ་མཐུན་པར། མྱུ་གུའི་དུས་སུ་འགགས་ཟིན་པ་མྱུ་གུའི་དུས་སུ་འདས་པ་དང༌། མྱུ་གུའི་དུས་སུ་སྐྱེས་ལ་མ་འགགས་པ་མྱུ་གུའི་དུས་སུ་ད་ལྟ་བ་དང༌། མྱུ་གུའི་དུས་སུ་སྐྱེ་བཞིན་པ་མྱུ་གུའི་དུས་མ་འོངས་པ་ཡིན་ལ། མྱུ་གུའི་དུས་སུ་འགགས་ཟིན་པ་མྱུ་གུའི་དུས་སུ་འདས་པ་ཡིན་ཡང༌། འདས་པའི་དུས་མ་ཡིན་ཏེ། དུས་ཡིན་ན་སྲོག་དང་མི་ལྡན་པའི་ལྡན་མིན་འདུ་བྱེད་ཡིན་དགོས་པའི་ཕྱིར། དེས་ན་འདས་པ་དང་འདས་པའི་དུས་གཉིས་ཁྱད་པར་འབྱེད་ཤེས་དགོས་ཏེ། ས་བོན་ལྟ་བུ་མྱུ་གུ་ལ་ལྟོས་ཏེ་འདས་པ་ཡིན་ཡང་འདས་པའི་དུས་མ་ཡིན་པའི་ཕྱིར་ཏེ། ཁྱོད་གཟུགས་ཡིན་པའི་ཕྱིར། ཁྱབ་སྟེ། དུས་ཡིན་ན་ལྡན་མིན་འདུ་བྱེད་ཡིན་དགོས་པའི་ཕྱིར། དེས་ད་ལྟ་བ་དང་མ་འོངས་པ་ལའང་རིགས་འགྲེ ཡང་ས་བོན་ལྟ་བུ་མྱུ་གུ་ལ་ལྟོས་ཏེ་འདས་པ་དང་མྱུ་གུའི་དུས་སུ་འདས་པ་ཡིན་ཡང་མྱུ་གུའི་འདས་པ་མ་ཡིན་ཏེ། དེ་མྱུ་གུའི་མ་འོངས་པ་ཡིན་པའི་ཕྱིར། དེར་ཐལ། ཁྱོད་གྲུབ་པའི་སྐབས་རང་འབྲས་མྱུ་གུ་སྐྱེ་འགྱུར་ཡིན་པའི་ཕྱིར། དེས་ན་མྱུ་གུའི་དུས་སུ་འདས་པ་དང༌། མྱུ་གུའི་མ་འོངས་པ། མྱུ་གུའི་རྒྱུ་རྣམས་དོན་གཅིག་ལ། དེས་ད་ལྟ་དང་མ་འོངས་པ་ལའང་རིགས་འགྲེ། ཡང་ས་བོན་ཆོས་ཅན། མྱུ་གུ་ལ་ལྟོས་ཏེ་འདས་པ་ཡིན་ཡང་འདས་པ་མ་ཡིན་ཏེ། རང་དུས་སུ་སྐྱེས་ཟིན་མ་འགགས་པ་ཡིན་པའི་ཕྱིར། གཞན་ཡང་དེ་ཆོས་ཅན། དེར་ཐལ། ཁྱོད་འདུས་བྱས་ཡིན་པའི་ཕྱིར། ཁྱབ་སྟེ། འདས་པ་ཡིན་ན་དངོས་མེད་ཡིན་དགོས་པའི་ཕྱིར། དེས་ན་ས་བོན་མྱུ་གུ་ལ་ལྟོས་ནས་འདས་པ་ཡིན་ཡང་སྤྱིར་འདས་པ་མ་ཡིན་ཏེ། དངོས་པོ་ཡིན་པའི་ཕྱིར། དེས་ད་ལྟ་དང་མ་འོངས་པ་གཉིས་ལའང་སྦྱར་བར་བྱའོ། ལུགས་དེ་དག་ཏུ་གཞི་མྱུ་གུའི་དུས་སུ་འདས་མ་འོངས་གཉིས་མྱུ་གུའི་རྒྱུ་དང་འབྲས་བུ་ཡིན་པས་འདུས་བྱས་སུ་ཁས་ལེན་མོད། སྤྱིར་འདས་མ་འོངས་གཉིས་འདུས་བྱས་མ་ཡྀན་ཏེ། དེ་གཉིས་དངོས་མེད་ཡིན་པའི་ཕྱིར།KHjརྗེ་ཙོང་ཁ་པའི་དྲ་བ།

      དབུ་མ་ཐལ་འགྱུར་བ་ནི། རྩ་ཤེ་རབ་བྱེད་བཅུ་དགུ་པ་ལས།ད་ལྟར་བྱུང་དང་མ་འོངས་པ།།གལ་ཏེ་འདས་ལ་ལྟོས་གྱུར་ན།།ད་ལྟར་བྱུང་དང་མ་འོངས་པ།།འདས་པའི་དུས་ན་ཡོད་པར་འགྱུར།། ཞེས་དང༌།བཞི་བརྒྱ་པའི་རབ་བྱེད་བཅུ་གཅིག་པ་ལས།མ་འོངས་བུམ་པ་ད་ལྟ་བའི།།བུམ་ཡོད་མ་ཡིན་འདས་པ་མེད།།གང་ཕྱིར་དེ་གཉིས་མ་འོངས་པ།།དེ་ཕྱིར་མ་འོངས་ཡོད་མ་ཡིན།། ཞེས་དང༌།KHjརྗེ་ཙོང་ཁ་པའི་དྲ་བ།

     བཞི་བརྒྱ་པའི་འགྲེལ་པར། དེ་ལ་མ་འོངས་པ་ནི་ད་ལྟའི་དུས་སུ་མ་ཕྱིན་པའོ།། འདས་པ་ནི་དེ་ཉིད་ལས་འདས་པའོ།། ད་ལྟར་བྱུང་བ་ནི་སྐྱེས་ལ་མ་འགག་པའོ།། ད་ལྟར་བྱུང་བ་ནི་ད་ལྟར་དམིགས་པའི་ཕྱིར་གཙོ་བོ་ཡིན་གྱི། མ་འོངས་པ་དང་རྒལ་བ་དག་གི་མ་འོངས་པ་དང་འདས་པའི་དུས་གཉིས་རྣམ་པར་འཇོག་པ་ནི་གཙོ་བོ་མ་ཡིན་ནོ།། ཞེས་གསུངས་པ་ལྟར་ལགས་ཏེ། གོ་བདེ་བའི་ལུགས་སུ་བྱས་ན། དུས་གསུམ་གྱི་གཙོ་བོ་མ་ཡིན་པ་གང་ཞིག ཐལ་ཟིན་པ་འདས་པའི་མཚན་ཉིད། དེ་གང་ཞིག་དུས་གསུམ་གང་རུང་ཡང་ཡིན། ཐལ་ཟིན་པ་དང་ད་ལྟ་བ་མ་ཡིན་པའི་གཞི་མཐུན་པ་མ་འོངས་པའི་མཚན་ཉིད། དུས་གསུམ་གྱི་གཙོ་བོ་གང་ཞིག་སྐྱེས་ལ་མ་འགགས་པ་ད་ལྟ་བའི་མཚན་ཉིད་དུ་འདོད་དོ།།KHjརྗེ་ཙོང་ཁ་པའི་དྲ་བ།

    འདིར་རི་བོ་དགེ་ལྡན་པའི་མཁས་པ་རྣམས་ཀྱིས་ཐལ་འགྱུར་བའི་ཐུན་མོང་མ་ཡིན་པའི་གྲུབ་མཐའ་བརྒྱད་བགྲངས་པའི་བདུན་པ་ཞིག་པ་དངོས་པོར་འདོད་པ་དང༌། བརྒྱད་པ་དེ་ལ་བརྟེན་ནས་དུས་གསུམ་གྱི་རྣམ་གཞག་ཐུན་མོང་མ་ཡིན་པའི་བཤད་པ་མཛད་དེ། ཞིག་པ་དངོས་པོ་འདོད་པའི་ཁུངས་ཀྱང༌། ས་བཅུ་པའི་མདོར། སྐྱེ་བའི་རྐྱེན་གྱིས་རྒ་ཤི་འཆི་བ་ཡང་བྱ་བ་གཉིས་སུ་ཉེ་བར་གནས་པ་ཡིན་ཏེ། འདུ་བྱེད་འཇིག་པར་ཡང་བྱེད་པ་དང༌། ཡོངས་སུ་མི་ཤེས་པའི་རྒྱུན་མི་ཆད་པའི་རྒྱུ་ཡང་འབྱིན་པའོ།། ཞེས་དང༌། རྩ་ཤེ་ལས། དངོས་དང་དངོས་མེད་འདུས་བྱས་ཡིན། ཞེས་དང༌། རིགས་པ་དྲུག་ཅུ་པར།རྒྱུ་ཟད་ཉིད་ལས་ཞི་བ་ནི།།ཟད་ཅེས་བྱ་བ་དམིགས་པ་སྟེ།།ཞེས་པའི་བཀའ་བསྟན་གྱི་གཞུང་རྣམས་བགྲངས་ནས་ཞིག་པ་དངོས་པོའི་དོན་དུ་བཀྲལ་ལ། དཔལ་ལྡན་ས་སྐྱ་པའི་མཁས་པ་ཆེན་པོ་དག་གིས་ནི་དེ་ལས་གཞན་དུ་གསུངས་ཤིང༌། ལུང་རིགས་ཀྱི་སྤྲོས་པ་རྒྱས་པ་ནི་ཀུན་མཁྱེན་གོ་རམས་པའི་འཇུག་ཊིཀ་ཏུ་གསལ་བས་དེར་གཟིགས་དགོས། རྒྱལ་མཆོག་ཀརྨ་པ་མི་བསྐྱོད་རྡོ་རྗེ་དང་ཀུན་མཁྱེན་འཇམ་དབྱངས་མི་ཕམ་པ་ཆེན་པོས་ཀྱང་ཞིག་པ་དངོས་པོར་མི་འདོད་ཅིང༌། ཞིག་དངོས་འདོད་པའི་ཕྱོགས་ལ་ལུང་རིགས་ཀྱིས་སྤྲོས་པ་རྒྱས་པར་བྱས་པ་རྣམས་ཀྱང་བློ་གཟུ་བོར་གནས་ཤིང་རིགས་པའི་རོལ་རྩེད་ཕྲ་ལ་མཛངས་པས་མཁས་པ་མགུ་བའི་ལེགས་བཤད་ཁོ་ན་ཉིད་དུ་ངེས་ཏེ། མཁྱེན་པར་འདོད་ན་དེ་དག་ལས་སྔ་མས་མཛད་པའི་འཇུག་འགྲེལ་དྭགས་བརྒྱུད་གྲུབ་པའི་ཤིང་རྟ་དང༌། ཕྱི་མས་ཟླ་བའི་ཞལ་ལུང་དྲི་མེད་ཤེལ་ཕྲེང་ལ་གཟིགས་དགོས། འདི་དག་གི་རྣམ་གཞག་ཤིན་ཏུ་ཟབ་ཅིང་ཕྲ་མོད། འདིར་བཤད་པའི་སྐབས་གཙོ་བོ་མ་ཡིན་པས་དེ་ཙམ་གྱིས་ཆོག་པར་བྱས་སོ། །འདི་ནི་གསུང་རབ་ལས་བཤད་པའི་དུས་གསུམ་དང་བརྡ་སྤྲོད་ནས་བཤད་པའི་དུས་གསུམ་གཉིས་དབྱེ་གཞི་དབྱེ་སྟངས་སོགས་སྒོ་ཀུན་ནས་མི་འདྲ་བ་ཤེས་པའི་ཆེད་དུ་མདོ་ཙམ་བསྟན་པར་བྱས་སོ། །རང་རེའི་ཚད་མའི་གཞུང་ལུགས་ནས་བཤད་པའི་དུས་གསུམ་གྱི་རྣམ་པར་གཞག་སྟངས་ཀྱང་ཕལ་ཆེར་གོང་དུ་བཤད་པ་དེ་དག་གིས་བསྡུས་ཤིང་འདྲ་བ་མངོན་ཏེ། རྣམ་འགྲེལ་གྱི་སྤྱི་ཐལ་དང་བསྡུས་གྲྭ་རྣམས་སུ་གཟིགས་ན་ཤེས་ནུས་པས་འདིར་ཟུར་དུ་སྤྲོས་བཤད་མ་བྱས་ཀྱང་འཐུས་པར་སེམས་སོ།།KHjརྗེ་ཙོང་ཁ་པའི་དྲ་བ།

    གཉིས་པ་བརྡ་སྤྲོད་ཀྱི་གཞུང་ལས་འབྱུང་བའི་དུས་གསུམ་བཤད་པ།KHjརྗེ་ཙོང་ཁ་པའི་དྲ་བ།

    གཉིས་པ་བརྡ་སྤྲོད་ཀྱི་གཞུང་ལས་འབྱུང་བའི་དུས་གསུམ་བཤད་པ་ལ།KHjརྗེ་ཙོང་ཁ་པའི་དྲ་བ།

    ༡ ༽ སྤྱི་ལྡོག་རགས་པའི་དབང་དུ་བྱས་པའི་དུས་གསུམ་གྱི་གོ་བ་བཤད་པ།KHjརྗེ་ཙོང་ཁ་པའི་དྲ་བ།

    ༢ ༽ བྱེད་པ་པོ་ལ་ཡོད་པའི་ལས་ཀྱི་དུས་གསུམ་བཤད་པ། ༣ ༽ བྱ་བ་ཡུལ་ལ་ཡོད་པའི་ལས་ཀྱི་དུས་གསུམ་བཤད་པ། ༤ ༽ དེ་དག་གི་ཁྱད་པར་དུ་མ་བྱས་པའི་དུས་གསུམ་བཤད་པ། ༥ ༽ བྱེད་པོ་དང་མ་འབྲེལ་བའི་ལས་ཀྱི་དུས་གསུམ་བཤད་པ། ༦ ༽ དུས་གསུམ་གྱི་དབྱེ་བ་རྒྱས་པ་བཤད་པ། ༧ ༽ བརྗོད་བྱ་དོན་གྱི་དུས་གསུམ་བཤད་པ། ༨ ༽ རྗོད་བྱེད་ཚིག་གི་དུས་གསུམ་བཤད་པ།  ༩ ༽ དུས་གསུམ་གྱི་དབྱེ་བ་ཕྱེ་བའི་དགོས་པ་བཤད་པ་སྟེ་དགུ་ཡོད་དོ།།KHjརྗེ་ཙོང་ཁ་པའི་དྲ་བ།

  ༡ ༽ སྤྱི་ལྡོག་རགས་པའི་དབང་དུ་བྱས་པའི་དུས་གསུམ་གྱི་གོ་བ་ཙམ་བཤད་པ།KHjརྗེ་ཙོང་ཁ་པའི་དྲ་བ།

    བརྡ་སྤྲོད་རིག་པའི་གཞུང་ལས་བཤད་པའི་དུས་གསུམ་ཞེས་པ་དེ་ནི། གསུང་རབ་ལས་བཤད་པའི་དུས་གསུམ་གྱི་འཇོག་ཚུལ་ལྟར་དངོས་པོ་ཞིག་ཡིན་ཕྱིན་ཆད་དུས་གསུམ་གྱི་དབྱེ་བ་ཕྱེ་རུང་མིན་པར། དབྱེ་བའི་གཞི་བྱེད་པ་པོ་དང་འབྲེལ་མ་འབྲེལ་ཇི་ལྟར་ཡང་བྱ་བ་གང་ཞིག་དེ་ཉིད་བྱས་ཟིན་པ་ལ་འདས་པ། དེ་བསྟན་པའི་ཚིག་ལ་འདས་ཚིག་ཟེར། བྱ་བ་དེ་ཉིད་བྱེད་བཞིན་པའི་ཁྱད་པར་བྱས་པའི་ཆ་ནས་བཞག་པ་ད་ལྟ་བ་དང༌། དེ་སྟོན་པའི་ཚིག་དེ་ད་ལྟ་བའི་ཚིག་ཟེར། བྱ་བ་དེ་ཉིད་བྱ་འགྱུར་གྱི་ཁྱད་པར་དུ་བྱས་པའི་ཆ་ནས་བཞག་པ་མ་འོངས་པ་དང་དེ་ཉིད་སྟོན་པའི་ཚིག་ལ་མ་འོངས་པའི་ཚིག་ཟེར། གོང་གསལ་འདས་ཚིག་དང༌། ད་ལྟ་བའི་ཚིག མ་འོངས་པའི་ཚིག་ཅེས་པའི་ཚིག་དེ་དག་མིང་ཚིག་གཉིས་སུ་ཕྱེས་པའི་ཚིག་དང་འཁྲུལ་བར་མི་བྱ་སྟེ། སྔ་མ་གསུམ་པོ་དེ་དུས་གསུམ་གྱི་ཁྱད་པར་གོ་བྱེད་ཀྱི་སྒྲའི་ཆ་ཤས་ཙམ་ཡིན་གྱི་ལས་ཚིག་དངོས་མིན། ཕྱི་མ་ནི་དོན་གྱི་ཁྱད་པར་བསྟན་པའི་ཚིག་དངོས་ཡིན་པས་སོ།།KHjརྗེ་ཙོང་ཁ་པའི་དྲ་བ།

    གོ་སླ་བའི་ཆེད་དུ་དཔེར་བརྗོད་ན།KHjརྗེ་ཙོང་ཁ་པའི་དྲ་བ།

    འདི་དག་ནི་སྤྱི་ལྡོག་རགས་པའི་དབང་དུ་བྱས་པའི་དུས་གསུམ་གྱི་གོ་བ་ཙམ་བཤད་པ་ཡིན་གྱི། མཐའ་གཅིག་ཏུ་ཁྱབ་པ་བཟུང་བའི་བཤད་པ་མ་ཡིན་པ་ནི་འོག་ནས་དུས་གསུམ་ལ་ཞིབ་ཏུ་དཔྱོད་པའི་སྐབས་ཤེས་ནུས་སོ། །སྔོན་གྱི་བརྡ་སྤྲོད་མཁན་པོ་ཕལ་མོ་ཆེས་དུས་གསུམ་གྱི་རྣམ་གཞག་ལ་སྤྱི་ལྡོག་རགས་པའི་དབང་དུ་བྱས་པ་ཙམ་ལས། རྣག་ཐོག་བཙག་བུའི་ཚུལ་གྱིས་དཀའ་གནད་ཞིབ་ཕྲས་དཔྱོད་པ་གནང་བ་ནི་ཆེས་ཤིན་ཏུ་ཉུང་མོད། བཀའ་དང་བསྟན་བཅོས་སྤྱི་དང་ལྷག་པར་བོད་ཀྱི་མཁས་པ་ཚད་ཐུབ་མང་པོའི་གསུང་རབ་གླེགས་བམ་དུ་བཞུགས་པ་རྣམས་ལ་ཞིབ་ཏུ་བལྟས་ན། ད་གཟོད་དུས་གསུམ་གྱི་རྣམ་གཞག་ལ་ཞིབ་འཇུག་དགོས་པའི་བློ་གྲོས་ཀྱི་སྣང་བ་གསར་པ་ཞིག་ཅིས་ཀྱང་འཆར་ངེས་སོ། །KHjརྗེ་ཙོང་ཁ་པའི་དྲ་བ།

    ༢ ༽ བྱེད་པ་པོ་ལ་ཡོད་པའི་ལས་ཀྱི་དུས་གསུམ་བཤད་པ།KHjརྗེ་ཙོང་ཁ་པའི་དྲ་བ།

    འགྲེལ་བྱེད་ཁ་ཅིག བྱེད་པ་པོ་ལ་ཡོད་པའི་ལས་ད་ལྟ་བ་དང་བྱ་བ་ཡུལ་ལ་ཡོད་པའི་ལས་ནི་མ་འོངས་པ་ཡིན་ཞེས་གསུངས་པ་ནི་སྤྱི་ལྡོག་རགས་པའི་མཚན་གཞིའི་གོ་བ་ཙམ་མམ། ཡང་ན་བྱ་བྱེད་ཀྱི་ཁྱད་པར་དུ་མ་བྱས་པའི་བྱེད་འབྲེལ་གྱི་ལས་ལ་དུས་གསུམ་དུ་ཕྱེས་པའི་ད་ལྟ་བ་དང་བྱེད་པ་པོ་སྟོན་པའི་རྗོད་བྱེད་ཀྱི་སྒྲའམ་ཡིག་གཟུགས་གཅིག་པ་ལ། མ་འོངས་པ་དང་བྱ་ཡུལ་གཉིས་སྟོན་བྱེད་ཀྱི་སྒྲའམ་ཡིག་གཟུགས་གཅིག་པ་ལ་དགོངས་ན་མ་གཏོགས་འཐད་པ་མི་སེམས་ཏེ། བྱེད་པ་པོ་ལ་ཡོད་པའི་ལས་དེ་ད་ལྟ་བ་ཙམ་དུ་མ་ཟད་དུས་གསུམ་གྱི་ཁྱད་པར་ཕྱེ་རྒྱུ་ཡོད་པའི་ཕྱིར་ཏེ། བྱེད་པ་པོ་ལ་ཡོད་པའི་ལས་དེ་བྱ་བ་རང་མཚན་པ་ཡིན་པའི་ཕྱིར། དེ་ལ་ཁྱབ་པ་མེད་ན། བྱེད་པ་པོ་དང་འབྲེལ་མི་འབྲེལ་ལ་མ་ལྟོས་པར་བྱ་བ་ཡིན་ཕྱིན་ཆད་ལ་དུས་གསུམ་གྱི་ཁྱད་པར་ཕྱེ་མི་རུང་བར་འདོད་པ་ཡང་མི་འཐད་པར་ཐལ། འདོད་མི་ནུས་ཏེ་བྱེད་པ་པོས་ཕར་བྱ་བ་བྱེད་པའི་ཆ་ནས་འཇོག་པའི་དུས་གསུམ་དང༌། བྱ་བའི་ཡུལ་གྱི་ངོས་ནས་ཚུར་རྣམ་འགྱུར་སྟོན་སྟངས་ལ་དུས་གསུམ་གྱི་ཁྱད་པར་ཡོད་པ་མངོན་སུམ་གྱིས་གྲུབ་པའི་ཕྱིར།KHjརྗེ་ཙོང་ཁ་པའི་དྲ་བ།

    གཞན་ཡང་བྱེད་པ་པོ་ལ་ཡོད་པའི་ལས་དེ་དུས་ད་ལྟ་བ་དང་བྱ་བ་ཡུལ་ལ་ཡོད་པའི་ལས་དེ་མ་འོངས་པ་ཡིན་ན། ཁྱེད་ལ་འདི་འདྲི་བར་བྱ་སྟེ། བྱེད་པ་པོ་དང་འབྲེལ་བའི་ལས་སམ་བྱ་བ་ལ་དུས་གསུམ་གྱི་དབྱེ་བ་ཕྱེ་བ་མི་འཐད་པར་ཐལ། ཁྱེད་ལ་ད་ལྟ་བ་དང་མ་འོངས་པ་གཉིས་མ་གཏོགས་འདས་པ་ངོས་འཛིན་རྒྱུ་མེད་པའི་ཕྱིར། དེར་ཐལ། དེ་འདྲའི་བྱ་བ་དེ་ལ་བྱེད་པ་པོ་དང་འབྲེལ་བའི་བྱ་བ་དང༌། བྱ་བའི་ཡུལ་དང་འབྲེལ་བའི་བྱ་བ་གཉིས་སུ་གྲངས་ངེས་ཤིང་དེ་གཉིས་ལས་བྱེད་པ་པོ་ལ་ཡོད་པའི་ལས་ནི་ད་ལྟ་བ་དང་བྱ་བའི་ཡུལ་ལ་ཡོད་པའི་ལས་སམ་བྱ་བ་ནི་མ་འོངས་པ་ཡིན་པའི་ཕྱིར། རྟགས་ཁས། འདོད་མི་ནུས་ཏེ་དུས་གསུམ་གྱི་དབྱེ་བ་དེས་བྱ་བ་ཡིན་ཕྱིན་ཆད་ལ་ཁྱབ་ཅིང༌། ཁྱེད་རང་གིས་ཀྱང་དུས་གསུམ་གྱི་དབྱེ་བས་ནི་བྱེད་ལས་དང་འབྲེལ་བའི་ངག་གི་སྦྱོར་བ་ཀུན་ལ་ཁྱབ་པ་བཤད་འདུག་པའི་ཕྱིར།KHjརྗེ་ཙོང་ཁ་པའི་དྲ་བ།

    གལ་ཏེ་དུས་གསུམ་གྱི་དབྱེ་བས་བྱེད་ལས་དང་འབྲེལ་བའི་ངག་གི་སྦྱོར་བ་ཀུན་ལ་ཁྱབ་པར་ཐལ། དུས་གསུམ་གང་རུང་ངམ་འདས་མ་འོངས་གཉིས་ཀྱིས་དེ་ལྟར་ཁྱབ་པའི་ཕྱིར་སྙམ་ན་རིགས་པའི་ལམ་ལས་འདས་པ་སྟེ། གསེར་བུམ་ལ་ཀ་བུམ་གཉིས་ཀྱིས་ཁྱབ་པར་ཐལ། ཀ་བུམ་གང་རུང་ངམ་བུམ་པས་ཁྱབ་པའི་ཕྱིར་ཞེས་པ་དང་ཁྱད་པར་ཏིལ་འབྲུ་ཙམ་ཡང་མི་འདུག་པའི་ཕྱིར། །KHjརྗེ་ཙོང་ཁ་པའི་དྲ་བ།

    རྗེས་འབྲངས་ཁ་ཅིག་དངུལ་ཆུ་དུས་གསུམ་གྱི་དབྱེ་བས་བྱ་བྱེད་དང་འབྲེལ་བའི་ལས་ཐམས་ཅད་ལ་ཁྱབ་པའི་སྒྲུབ་བྱེད་དུ། བྱ་བའི་ལས་ཐམས་ཅད་མ་འོངས་པ་དང༌། བྱེད་པའི་ལས་ཐམས་ཅད་ད་ལྟ་བ་ཡིན་པས་སོ། །ཞེས་གསུངས་པ་འདི་ཡང་ཚིག་ཟུར་གྱི་གོ་བ་མཐའ་གཏུགས་ན། བྱ་བྱེད་དང་འབྲེལ་བའི་ལས་ཐམས་ཅད་ལ་དུས་གསུམ་གང་རུང་གིས་ཁྱབ་པའམ། ད་ལྟ་བ་དང་མ་འོངས་པས་ཁྱབ་པའི་དོན་དུ་སོང་འདུག་པས། ཁྱེད་ལ་བྱེད་པ་པོ་དང་འབྲེལ་བའི་བྱ་བ་འདས་པ་ཡོད་མེད་དང༌། ཡོད་ན་དེ་བྱེད་པོ་དང་འབྲེལ་བའམ་བྱ་ཡུལ་དང་འབྲེལ་བའི་ལས་གང་ཞིག་ཡིན་དྲིས་ན་ལན་ཅི་འདེབས། གནད་འདི་དག་ལ་བརྟགས་ཤིང་དཔྱོད་ན་བྱེད་པ་པོ་ལ་ཡོད་པའི་བྱ་བ་ལ་དུས་གསུམ་གྱི་རྣམ་གཞག་བཤད་དགོས་པ་ཤིན་ཏུ་གསལ་ལོ། །དེས་ན་བྱེད་པ་པོ་དང་འབྲེལ་བའི་ལས་སམ་བྱ་བ་ལ་དུས་གསུམ་གྱི་རྣམ་གཞག་འཐད་དེ། བྱེད་པ་པོས་བྱ་བ་གང་ཞིག་ཡིན་པ་དེ་ཉིད་ཕར་བྱེད་ཟིན་པ་དེ་བྱེད་པ་པོ་ལ་ཡོད་པའི་བྱ་བ་འདས་པ་དང༌། དེ་འདྲའི་བྱ་བ་དེ་ཉིད་བྱེད་པ་པོའི་ངོས་ནས་ཕར་བྱེད་བཞིན་པ་དེ་བྱེད་པ་པོ་ལ་ཡོད་པའི་བྱ་བ་ད་ལྟ་བ། དེ་འདྲའི་བྱ་བ་དེ་ཉིད་བྱེད་པ་པོའི་ངོས་ནས་ཕར་བྱེད་འགྱུར་དེ་བྱེད་པ་པོ་ལ་ཡོད་པའི་བྱ་བ་མ་འོངས་པ་ཡིན་ཏེ། དཔེར་ན། ཤིང་མཁན་གྱིས་སྟ་རེས་ཤིང་གཅོད་པ་ལྟ་བུ་ལ་མཚོན་ན། ཤིང་མཁན་གྱི་ངོས་ནས་སྟ་རེས་ཕར་འདེགས་འཇོག་གིས་ཤིང་གཅོད་ཟིན་པ་ལྟ་བུ། བྱེད་པ་པོ་ལ་ཡོད་པའི་བྱ་བ་འདས་པ་ཡིན། དེ་ལྟར་གཅོད་བཞིན་པའི་ཆ་དེ་བྱེད་པ་པོ་ལ་ཡོད་པའི་བྱ་བ་ད་ལྟ་བ་ཡིན། དེ་ལྟར་གཅོད་པར་འགྱུར་བ་དེ་བྱེད་པ་པོ་ལ་ཡོད་པའི་བྱ་བ་མ་འོངས་པ་ཡིན་པའི་ཕྱིར།KHjརྗེ་ཙོང་ཁ་པའི་དྲ་བ།

    འདི་ལྟ་བུའི་བྱེད་པ་པོ་ལ་ཡོད་པའི་ལས་ལ་དུས་གསུམ་གྱི་རྣམ་གཞག་འཐད་པ་མདོ་རྒྱུད་དགོངས་འགྲེལ་རྣམས་སུ་ཤིན་ཏུ་གསལ་ཏེ། དཔེ་མཚོན་འགའ་ཞིག་འགོད་ན།KHjརྗེ་ཙོང་ཁ་པའི་དྲ་བ།

    ༡ བྱེད་ཚིག་འདས་པ་ལ་འཇུག་པ། དཔེར་ན། མདོ་མཛངས་བླུན་ལས། དེའི་ཆུང་མ་བྱེད་དེ་བུ་ཡང་ཡོད་པར་གྱུར་ཏོ་ཞེས་དང༌། རྒྱལ་པོ་རྫིང་བུར་འོང་བའི་ཚེ་ཐམས་ཅད་ཀྱིས་བཟུང་སྟེ་གསོད་པར་བྱས་སོ། ཞེས་དང༌། ངོ་མཚར་དུ་འཛིན་ཏེ་བསྟོད་ཅིང་བསྔགས་སོ། ལྟ་བུའི་བྱེད་དང༌། གསོད། འཛིན་རྣམས་བྱེད་པ་པོ་ལ་ཡོད་པའི་བྱ་བ་དང་དུས་འདས་པ་གཉིས་ཀ་སྟོན་པའི་ཚིག་ཡིན་ནོ། །དེས་རིགས་བསྒྲེས་ནས། ཤིང་གཅོད་པར་བྱས། རྡོ་གཅོག་པར་བྱས། ལམ་སྒོམ་པར་གྱུར། ནོར་སྒྲུབ་ཚར། སོགས་བྱེད་པ་པོ་དང་འབྲེལ་བའི་ལས་ཚིག་འདས་པ་གསལ་བྱེད་དུ་འགྲོ་བ་ནི་ཚིག་གྲོགས་ཕྱི་མ་རྣམས་ལ་བརྟེན་ནས་ཤེས་ནུས་སོ།།KHjརྗེ་ཙོང་ཁ་པའི་དྲ་བ།

    ༢ བྱེད་ཚིག་ད་ལྟ་བ་ལ་འཇུག་པ། མདོ་མཛངས་བླུན་ལས། དེའི་གཟུགས་ལ་གཡེངས་བས་ལྟ་བ་ན། ཞེས་དང༌། དབྱངས་ཅན་དགྱེས་གླུར། དབང་ཕྱུག་གོ་ཆ་བློ་གསལ་དགའ་བ་སྐྱེད། ལྷག་བསམ་བསྐུལ་བའི་མདོར། ཕྱིར་ཕྱིར་ཞིང་ནི་རྣམ་པར་འགྱེད་པར་རྩོམ། ལང་ཀར་གཤེགས་མདོར། རྒྱལ་པོ་རྣམས་ཀྱིས་བསྔགས་མཆོད་བྱེད། ལྟ་བུ་བྱེད་ཚིག་ད་ལྟ་བ་ལ་འཇུག་པའི་ཚིག་ཡིན་ནོ། །དེས་རིགས་བསྒྲེས་ནས། ཆོས་སྒྲུབ་བོ། སྐད་སྒྱུར་རོ། ཆོས་འཆད་དོ། ལམ་སྒོམ་པའི་དུས། པར་སྐྲུན་པའི་ཚེ། རྩོད་པའི་སྐབས། རྩོམ་པ་ན། བསམ་བཞིན་པ། ལྟ་བུ་ཡང་ཚིག་གྲོགས་ལ་དཔོག་སྟེ་བྱེད་པ་པོ་དང་འབྲེལ་བའི་ལས་ཚིག་ད་ལྟ་ཡིན་པར་ཤེས་ནུས་སོ།།KHjརྗེ་ཙོང་ཁ་པའི་དྲ་བ།

    ༣ བྱེད་ཚིག་མ་འོངས་པ་ལ་འཇུག་པ། མདོ་མཛངས་བླུན་ལས། ང་གར་སྐྱེས་ཀྱང་ཁྱེད་དང་འཕྲད་ནས་ཁྱེད་ཀྱང་ངས་གསོད་པར་ཤོག་དེས་དམ་བཅའོ། །ཞེས་དང༌། ལྕགས་གཟེར་སྟོང་འདེབས་སོ་ཞེས་བསྒོས། ཞེས་དང༌། ལུས་ཀྱི་ཤ་ཕུག་ནས་མར་མེ་སྟོང་འཛུགས་སོ་ཞེས་རྒྱལ་ཕྲན་དང་མི་ཐམས་ཅད་ལ་བསྒོས། ཞེས་དང༌། ལང་ཀར་གཤེགས་མདོར། གཟིང་དང་མཉམ་པ་ཉིད་དང་ནི།། བྱེད་པར་འགྱུར་བར་ཐེ་ཚོ་མེད། །ཅེས་དང༌། སྟོན་པའི་བསྟན་པ་གསལ་བྱེད་པ། །འབྱུང་བར་འགྱུར་བར་ཐེ་ཚོམ་མེད། །བཟང་སྤྱོད་ལས། སངས་རྒྱས་གསུང་ལ་རྟག་ཏུ་འཇུག་པར་བགྱི། །པཎ་ཆེན་བློ་བཟང་ཆོས་རྒྱན་གྱིས། བདེ་ཆེན་སངས་རྒྱས་ཀྱི་ས་ལ་འགོད་པར་བྱ། །ལྟ་བུའི་གསོད་དང༌། འདེབས། འཛུགས། བྱེད། འཇུག འགོད་རྣམས་རིམ་པ་བཞིན་བྱེད་ཚིག་ཡིན་པར་མ་ཟད་ཚིག་གྲོགས་རྣམས་ལས་མ་འོངས་པའི་འཇུག་པ་ཡང་ཤེས་ནུས་སོ། །དེས་མཚོན་ནས། སྒྲུབ་པར་འགྱུར། འཆད་པར་འགྱུར། སྒོམ་པར་བགྱི། སུམ་རྟགས་སློབ་པོ། རིག་གནས་སྦྱོང་དགོས། ལྟ་བུ་རྣམས་མ་འོངས་པ་སྟོན་པའི་ཚིག་གྲོགས་དང་འགྲོགས་སྟབས་ཀྱིས་བྱེད་ཚིག་མ་འོངས་པ་སྟོན་བྱེད་དུ་ཤེས་དགོས་སོ།།KHjརྗེ་ཙོང་ཁ་པའི་དྲ་བ།

    ༣ ༽ བྱ་བའི་ཡུལ་ལ་ཡོད་པའི་ལས་ཀྱི་དུས་གསུམ་བཤད་པ།KHjརྗེ་ཙོང་ཁ་པའི་དྲ་བ།

    ཞ་ལུ་ལོ་ཆེན་ཆོས་སྐྱོང་བཟང་པོ་སོགས་མཁས་པ་མང་པོ་ཞིག་གིས་བྱ་བའི་ཡུལ་ལ་ཡོད་པའི་ལས་སམ་བྱ་བ་རྣམས་མ་འོངས་པར་འདོད་པ་ནི། བྱ་བྱེད་ཀྱི་ཁྱད་པར་དུ་མ་བྱས་པའི་དུས་མ་འོངས་པར་སྟོན་པའི་རྗོད་བྱེད་ཀྱི་སྒྲའམ་ཡིག་གཟུགས་གཅིག་པ་ཙམ་ལ་དགོངས་པ་ཡིན་ནམ་སྙམ་ལ། རྣམ་པ་གཅིག་ཏུ་ན་བྱ་བ་དེ་ཉིད་རྗོད་བྱེད་ཙམ་གྱི་མ་འོངས་པའི་ཚིག་དང་སྒྲ་འདྲ་བ་ཙམ་མིན་པར་བརྗོད་བྱ་དེ་ག་རང་མ་འོངས་པའི་དོན་དུའང་དགོངས་པ་སྲིད་དེ། དཔེར་ན་ཤིང་མཁན་གྱིས་ཤིང་ལ་སྟ་རེ་ཕར་གཡུགས་པའི་སྐད་ཅིག་དང་པོ་ནས་བྱེད་པ་པོ་ལ་ཡོད་པའི་ལས་གཅོད་པ་གྲུབ་ཀྱང༌། དེ་དུས་བྱ་བའི་ཡུལ་ལ་ཡོད་པའི་ལས་གཅད་པ་གྲུབ་མེད་དེ། དང་པོར་སྟ་རེ་རིམ་པས་རིམ་པས་ཕར་གཡུག དེ་རྗེས་ཤིང་གི་ངོས་ནས་དུམ་བུ་དུམ་བུར་འགྲོ་དགོས་པ་ཡིན་ཏེ། དགྲ་ལ་མེ་མདའ་འཕེན་པ་ན། མེ་མདའ་འཕེན་པ་པོའི་ངོས་ནས་འཕེན་པའི་བྱ་བ་བྱས་ཚར་ཀྱང༌། བྱ་ཡུལ་དགྲ་བོའི་ངོས་ལ་ཡོད་པའི་ལས་མེ་མདའ་ཕོག་པའི་བྱ་བ་དེ་གྲུབ་མ་ཚར་བའི་སྐབས་ཤིག་ཡོད་པའི་ཕྱིར་དང༌། ད་དུང་དེ་ལས་ཕྲ་བར་བཤད་ན། སྐྱེས་བུ་མདའ་རྩལ་སྐྱེན་པོས་ཤིང་གི་ལོ་མ་བརྒྱ་བརྩེགས་པ་ལ་མདའ་བརྒྱབ་ཚེ་ཤིང་ལོ་དང་པོ་ནས་རིམ་བཞིན་འབིགས་དགོས་པ་མ་གཏོགས་ཇི་ཙམ་མདའ་རྩལ་མཁས་ཀྱང་མཉམ་དུ་ཕུག་མི་ཐུབ་པས། དེས་ན་ཤིང་མཁན་གྱི་སྟ་རེ་ཤིང་ལ་ཐུག་མ་ཐག་གཅོད་པའི་བྱ་བ་བྱེད་ཀྱང༌། ཡུལ་ཤིང་སྡོང་གི་ངོས་ནས་དུམ་བུ་རིམ་པ་བཞིན་གོག་པའི་བྱ་བའམ་འགུལ་སྐྱོད་བྱེད་མ་ཚར་བའི་ཆ་ཞིག་ཡོད་པ་ལའང་དགོངས་སྲིད་དེ། གང་ལྟར་ཡང་དཔྱོད་པར་བྱེད་དགོས་སོ། །གནད་འདི་དག་ལ་བརྟེན་ནས་མཁས་པ་འགའ་ཞིག་གིས་བྱ་བྱེད་ལས་གསུམ་དུས་མཉམ་དུ་མ་གྲུབ་ན་བྱ་བྱེད་ཀྱི་འབྲེལ་བ་མེད་པར་འགྱུར་བས། དེས་ན་བྱ་བྱེད་ལས་གསུམ་གྱི་ནང་ནས་བྱ་བ་ནི་གཙོ་བོ་བྱེད་པ་པོ་ལ་ཡོད་པའི་བྱ་བ་ཉིད་འཇོག་གི བྱ་ཡུལ་དང་འབྲེལ་བའི་བྱ་བ་མི་འཇོག་སྟེ་དེ་བྱེད་པའི་འབྲས་བུ་ཡིན་པའི་ཕྱིར། བརྗོད་བྱ་དོན་གྱི་འབྲས་བུའམ་མ་འོངས་པར་བཞག་འདུག་པ་ལའང་བརྟག་དགོས། མཁས་པ་ཆེན་པོ་པྲ་ཏི་རིན་ཆེན་དོན་གྲུབ་སོགས་ཀྱིས་ནི། བྱེད་པ་པོ་དང་འབྲེལ་བའི་ལས་སམ་བྱ་བ་ད་ལྟ་བར་བཞེད་འདུག་སྟེ། གཅོད་པའི་སྐབས་ཀྱི་བྱ་བ་ལ་བསམ་ན་འདི་ཉིད་འཐད་པར་སེམས་ཏེ་བྱེད་པ་པོ་དང་བྱ་ཡུལ་གཉིས་བྱ་བའི་སྒོ་ནས་དངོས་སུ་མ་འབྲེལ་ན་བྱེད་པ་པོ་དང་འབྲེལ་བའི་ལས་མ་ཡིན་པར་འགྱུར་ལ། དངོས་སུ་འབྲེལ་ན། སྟ་རེ་ཤིང་དང་དངོས་སུ་འཕྲད་དགོས་པར་མ་ཟད་སྟ་རེ་འདེགས་འཇོག་གིས་ཤིང་དངོས་སུ་གཅོད་པ་དང༌། ཤིང་དངོས་སུ་དུམ་བུར་འགྲོ་ན་མ་གཏོགས་བྱ་བྱེད་ཀྱི་ལས་གཉིས་དངོས་སུ་འབྲེལ་ལུགས་མེད་པའི་ཕྱིར།KHjརྗེ་ཙོང་ཁ་པའི་དྲ་བ།

 KHjརྗེ་ཙོང་ཁ་པའི་དྲ་བ།

    བསྟན་དར་ལྷ་རམས་པས། མ་འོངས་པའི་ཚིག་གི་སྔོན་འཇུག་ལ་དངོས་བསྟན་གཙོ་བོའི་དབང་དུ་བྱས་ན་འ་ཡིག་ཁོ་ན་དང༌། བྱ་བ་ཡུལ་ལ་ཡོད་པའི་ལས་མ་འོངས་པ་ཡང་གསུངས་པ་ལྟར་ན་སྔོན་འཇུག་བཞི་ག་འདུག་ཅིང༌། ཞེས་པའི་ཚིག་གི་ངོ་གདོང་ལ་དཔགས་ན། བསྟན་དར་རང་གིས། འབོད། སློབ། ཅེས་པའི་ཚིག་རྣམས་བྱ་བའི་ཡུལ་ལ་ཡོད་པའི་ལས་ད་ལྟ་བར་དགོངས་པ་ཤིན་ཏུ་གསལ་ལོ།།KHjརྗེ་ཙོང་ཁ་པའི་དྲ་བ།

    གོང་གསལ་འདོད་པ་དེ་གཉིས་ཀ་ཤིང་གཅོད་པའི་སྐབས་ལྟ་བུའི་ཁྱད་པར་དུ་བྱས་ནས་མ་འོངས་པ་དང་ད་ལྟ་བ་གང་ཞིག་ཡིན་དཔྱོད་པ་དང་གསུང་ཚུལ་གྱི་ཁྱད་པར་ཙམ་ཡིན་གྱི། སྤྱིར་བྱ་ཡུལ་དང་འབྲེལ་བའི་ལས་སམ་བྱ་བ་ལ་དུས་གསུམ་གྱི་ཁྱད་པར་འཐད་དེ། གོང་དུ་བྱེད་པ་པོ་ལ་ཡོད་པའི་ལས་ཀྱི་དུས་གསུམ་བཤད་པའི་སྐབས་དཔྱོད་པ་ལྟར་འདིར་ཡང་འདྲ་བས་སོ།། དཔེར་ན། ཤིང་མཁན་གྱིས་ཤིང་ལ་སྟ་རེས་འདེགས་འཇོག་བྱེད་པ་ན། བྱ་ཡུལ་ཤིང་གི་ངོས་ནས་དུམ་བུར་སོང་ཚར་བའམ་བྱ་ཡུལ་ཤིང་གི་ངོས་ནས་ཚུར་འགུལ་སྐྱོད་ཀྱི་རྣམ་འགྱུར་སྟོན་ཟིན་པ་ནི་བྱ་ཡུལ་ཤིང་ལ་ཡོད་པའི་བྱ་བ་འདས་པ་ཡིན། ཤིང་གི་ངོས་ནས་དུམ་བུར་འགྲོ་བཞིན་པའམ་འགུལ་སྐྱོད་ཀྱི་རྣམ་འགྱུར་སྟོན་བཞིན་པ་ནི། བྱ་ཡུལ་ཤིང་ལ་ཡོད་པའི་བྱ་བ་ད་ལྟ་བ་ཡིན། ཤིང་གི་ངོས་ནས་དུམ་བུར་འགྲོ་འགྱུར་རམ་འགུལ་སྐྱོད་ཀྱི་རྣམ་འགྱུར་སྟོན་ཁ་མ་ལྟ་བུ་བྱ་ཡུལ་ཤིང་ལ་ཡོད་པའི་བྱ་བ་མ་འོངས་པ་ཡིན། དེ་གསུམ་ག་བྱ་བའི་ཡུལ་ལ་ཡོད་པའི་ལས་དང་དུས་ཀྱི་གཞི་མཐུན་ཡིན་པས་བྱ་ཡུལ་གྱི་ཡི་གེའི་ཐོབ་ཐང་དང་གཅིག་པ་ཡིན་ནོ། །ཚུལ་དེ་དག་གི་དཔེར་བརྗོད་ནི། བྱ་བའི་ཡུལ་ལ་ཡོད་པའི་ལས་ཚིག་དུས་འདས་པ་ལ་འཇུག་པ་མདོ་མཛངས་བླུན་ལས། རྒྱལ་པོའི་ཆུང་མ་བླང་བར་བྱས་སོ། །གསེར་གྱི་གླང་པོ་ཆེས་རྟག་ཏུ་བགྲུང་བར་གྱུར་ཏོ། །བསླབ་ན་ཡང་མི་སྟེར་བ་ཞིག་ཡོད། ལྷ་ལས་ཕུལ་བྱུང་ལས། གང་གཱ་དབབ་པར་མ་ནུས་སོ། ། མདོ་མཛངས་བླུན་ལས། ཁོ་བོས་གསད་པར་བྱ་བ་མ་ཡིན་སྙམ་ནས་གཏང་བར་གྱུར། རིན་ཆེན་ཕྲེང་བ་ལས། ཇི་ལྟར་ཆུ་ཤིང་ཡན་ལག་དག། མ་ལུས་བཅས་ཏེ་བཤིག་བྱས་ན། །ཡང་དག་བསྡུམ་པར་བྱས་པ་ཡིས། ཐར་ལམ་གསལ་བྱེད་ལས། རྣམ་བྱང་ཆོས་རྣམས་བརླག་པར་བྱས། །ལྟ་བུ་སོགས་སོ།།KHjརྗེ་ཙོང་ཁ་པའི་དྲ་བ།

    གོང་གསལ་གྱི་བླང་དང༌། བསྲུང༌། དབབ། གཏང༌། བཤིག བསྡུམ། བརླག སོགས་བྱ་ཡུལ་ལ་ཡོད་པའི་ལས་ཚིག་ཡིན་ལ་ཚིག་གྲོགས་ལ་བརྟེན་ནས་དུས་འདས་པའང་གོ་ནུས་སོ། །གཞན་ཡང༌། བསྒྲུབ་པར་གྱུར། བསྒོམ་ནས་གྲུབ། བསྒྲུབ་ཚར། གཅག་པར་བྱས་ལྟ་བུ་རྣམས་ཀྱང་བྱ་བའི་ཡུལ་གྱི་ངོས་ནས་ཚུར་འཕོ་འགྱུར་སྟོན་པ་དང་དུས་འདས་པའི་གཞི་མཐུན་དུ་གོ་ནུས་སོ།།KHjརྗེ་ཙོང་ཁ་པའི་དྲ་བ།

    བྱ་བའི་ཡུལ་ལ་ཡོད་པའི་བྱ་ཚིག་ད་ལྟ་བ་ལ་འཇུག་པ། ལམ་རིམ་ཆེན་མོ་ལས། ཅི་གསུང་བསྒྲུབ་ཅིང་གུས་པས་བསྟེན་པར་བྱེད་པ་སྟེ། ཡང་ཡང་དཔྱད་ཀྱིན་བསྒོམ་པ་དང༌། སྔར་མ་གྲུབ་པ་གསར་དུ་བསྒྲུབ་པའི་ཚེ། ལམ་བསྙོམ་ཞིང༌། ཁ་ན་མ་ཐོ་གཉིས་སྤོང་བ་གཅོད་པ་དང་འབྱེད་པ་དང༌། བརྡུང་བ་དང༌། དམྱལ་བར་བྱེད་དོ། །ཞེས་སོགས་དང༌། མདོ་མཛངས་བླུན་ལས། བདག་བསྲུང་ཞིང་འདུག་པ་ལས། ཤེར་མདོར། རང་བཞིན་གྱིས་སྟོང་པ་རྣམ་པར་བལྟའོ།། ལྟ་བུའི། བསྒྲུབ་དང༌། དཔྱད། བསྒོམ། བརྡུང༌། བསྲུང༌། བལྟ་རྣམས་བྱ་བའི་ཡུལ་ལ་ཡོད་པའི་ལས་ཚིག་ཡིན་ལ། ཚིག་གྲོགས་ལ་བརྟེན་ནས་དུས་ད་ལྟ་བར་གོ་ནུས་སོ།། དེ་བཞིན་དུ། གསད་པའི་སྐབས། རྡོ་གཅག་པའི་ཚེ། ལམ་དགག་པ་ན། ཡི་གེ་གཏང་དུས་ལྟ་བུ་ཡང་བྱ་ཡུལ་གྱི་ངོས་ནས་ཚུར་འཕོ་འགྱུར་རམ་འགུལ་བསྐྱོད་ཀྱི་རྣམ་འགྱུར་སྟོན་པ་དང་དུས་ད་ལྟ་བའི་གཞི་མཐུན་ཡིན་ནོ།།KHjརྗེ་ཙོང་ཁ་པའི་དྲ་བ།

    བྱ་བའི་ཡུལ་ལ་ཡོད་པའི་ལས་ཚིག་མ་འོངས་པ་ལ་འཇུག་པ། དགའ་ལྡན་ལྷ་བརྒྱ་མ་ལས། ཟབ་རྒྱས་ཆོས་ཀྱི་ཆར་པ་དབབ་ཏུ་གསོལ། མཛངས་བླུན་ལས། དམ་དུ་བཟུང་ལ་མ་གཏང་ཞིག། འཇུག་པར། རེ་ཞིག་དེ་དག་ཉིད་ལ་བརྩད་བྱ་དེ།། ཞེས་དང༌། བདག་མེད་འདི་ནི་འགྲོ་བ་རྣམས་དགྲོལ་ཕྱིར། །ཞེས་དང༌། ཕྱིས་ནས་སྟོབས་ལྡན་བདག་གིས་བསྟེན་པར་བྱ།། ལྟ་བུ། དབབ་དང༌། གཏང༌། བརྩད། དགྲོལ། བསྟེན་རྣམས་བྱ་ཡུལ་དང་འབྲེལ་བའི་ལས་ཚིག་ཡིན་ལ་ཚིག་གྲོགས་ལ་བརྟེན་ནས་དུས་མ་འོངས་པར་གོ་ནུས་སོ།། དེ་བཞིན་དུ། ལམ་བསྒོམ་པར་འགྱུར། ཆོས་བསྒྲུབ་རྒྱུ་ཡིན། སྐད་བསྒྱུར་ལ་ཉེ། པར་བསྐྲུན་ཁ་མ་ལྟ་བུ་རྣམས་ཀྱང་བྱ་ལས་མ་འོངས་པ་གསལ་བྱེད་ཡིན་ནོ། །KHjརྗེ་ཙོང་ཁ་པའི་དྲ་བ།

    ༤ ༽ བྱ་བྱེད་ཀྱི་ཁྱད་པར་དུ་མ་བྱས་པའི་དུས་གསུམ་བཤད་པ།KHjརྗེ་ཙོང་ཁ་པའི་དྲ་བ།

    གོང་དུ་བཤད་པའི་སྐོར་དེ་ནི་བྱེད་ལས་ཀྱི་དབང་དུ་བྱས་པའི་དུས་གསུམ་དང༌། བྱ་ལས་ཀྱི་དབང་དུ་བྱས་པའི་དུས་གསུམ་གྱི་རྣམ་པར་བཞག་སྟངས་ཡིན་ལ། བྱ་བྱེད་ཀྱི་ལས་གཉིས་གང་རུང་གིས་ཁྱད་པར་དུ་མ་བྱས་པར་བྱེད་པ་པོ་དང་འབྲེལ་བའི་ལས་སྤྱི་ཙམ་ལ་དུས་གསུམ་གྱི་རྣམ་པར་བཞག་སྟངས་ནི། དཔེར་ན། ཤིང་མཁན་གྱིས་ཤིང་གཅོད་པའི་ཚེ། བྱེད་ལས་གཅོད་པ་དང་བྱ་ལས་གཅད་པ་གཉིས་ཀ་གང་ལ་ཡང་མ་བསམ་པར་དེ་གཉིས་བར་དུ་སྤྱིར་བཏང་གི་བཅད་པའི་དུས་ཀྱི་ཁྱད་པར་ཕྱེ་ཚུལ་ཞིག་སྟེ། ཤིང་མཁན་གྱིས། ཤིང་བཅད་ཟིན། གཅོད་བཞིན་པ། གཅད་པར་འགྱུར། ལྟ་བུ་དང༌། གཞན་ཡང་གོ་སླ་བའི་ཆེད་དུ། དཔེར་བརྗོད་རེའུ་མིག་ཏུ་ཟུར་ཙམ་འགོད་ན།KHjརྗེ་ཙོང་ཁ་པའི་དྲ་བ།

    འདི་ནི་བྱ་བྱེད་ཀྱི་ལས་གཉིས་ཀྱི་ཁྱད་པར་དུ་མ་བྱས་པའི་བྱེད་པ་པོ་དང་འབྲེལ་བའི་ལས་ཚིག་གི་དུས་གསུམ་སྟེ། སྔོན་གྱི་མཁས་པ་མང་པོ་དང་ལྷག་པར་ཕྱིས་ཀྱི་གླེགས་བམ་མང་པོ་དང་འགྲེལ་བྱེད་མཁན་པོ་མང་དག་ཅིག་གིས་དུས་གསུམ་གྱི་རྣམ་པར་བཞག་ཚུལ་འདི་ཉིད་ཤིན་ཏུ་མང་བར་བཀོད་འདུག་པ་ནི། བྱ་བྱེད་ཀྱི་ཁྱད་པར་དུ་མ་བྱས་པའི་དབང་དུ་བྱས་པ་ཡིན་གྱི། གོང་གསལ་ལྟར་བྱ་བྱེད་ཀྱི་ཁྱད་པར་གྱི་སྟེང་ནས་དུས་གསུམ་འཇོག་ལུགས་རྣམས་ཀྱང་ཞིབ་ཏུ་ཤེས་སོ། །འོན་ཀྱང་ཕྱིས་འགྲེལ་མང་པོ་ཞིག་ཏུ་ཤིང་གཅོད་ལྟ་བུའི་འདས་ཚིག་ལ་བཅད། མ་འོངས་པའི་ཚིག་ལ་གཅད། ད་ལྟ་བའི་ཚིག་ལ་གཅོད་ཐོབ་རྐྱང་དུ་བྱས་ནས་བཤད་པ་རྣམས་སུམ་རྟགས་ཀྱི་འགྲེལ་པ་དང་དཔེར་བརྗོད་སབ་སོབ་ཙམ་ལས་གསུང་རབ་ཀྱི་བརྡ་ཆད་མིག་ལམ་དུ་མཐོང་བ་ལྟ་ཞོག རྣ་བས་གོ་བ་ཙམ་ཡང་བྱུང་མེད་པའི་རང་རྟགས་ཡིན་ལ། གཞུང་ལུགས་ལ་ཐོས་བསམ་བྱེད་མ་མྱོང་བའི་སུམ་འགྲེལ་མཁན་པོ་རྣམས་ཐུགས་ཁག་མེད་མོད། གཞུང་ཆེན་མོ་ལ་ཐོས་བསམ་གྱིས་མཁས་པར་རློམ་པའི་འགྲེལ་བྱེད་པ་མང་པོ་ཞིག་གིས་ཀྱང་ཚུལ་འདི་དག་གི་ཞིབ་ཆ་རྨི་ལམ་དུའང་བྱུང་མྱོང་མེད་པ་ལྟ་བུར་བྱས་འདུག་སྙམ་སྟེ་འགྲེལ་ཚིག་ལ་བལྟས་ན་ཤེས་ནུས་པས་སོ། །KHjརྗེ་ཙོང་ཁ་པའི་དྲ་བ།

    ད་དུང་ཞིབ་ཏུ་བཤད་ན། བློ་བཟང་གིས་སྟ་རེས་ཤིང་གཅོད་ལྟ་བུ་བརྗོད་པའི་ཚེ། བློ་བཟང་གིས་རྩོལ་བའི་ངོས་ནས་ཕར་འགུལ་སྐྱོད་བྱེད་པའི་དུས་ཀྱི་ཁྱད་པར་བསམས་ནས་བརྗོད་ན། བློ་བཟང་གིས་ཤིང༌། གཅོད་ཟིན། གཅོད་བཞིན་པ། གཅོད་རྒྱུ་རེད། ཅེས་འབྲི་དགོས། གཅད་བྱའི་ཤིང་གི་ངོས་ནས་ཚུར་འཕོ་འགྱུར་འགྲོ་བའི་དུས་ཀྱི་ཁྱད་པར་ལ་བསམས་ནས་བརྗོད་ན། བློ་བཟང་གིས་ཤིང་གཅད་ཟིན། གཅད་བཞིན་པ། གཅད་རྒྱུ་རེད་ཅེས་འབྲི་དགོས། བློ་བཟང་གིས་ཤིང་གཅོད་པའི་ཚེ་བློ་བཟང་གིས་སྟ་རེ་ཕར་འདེགས་འཇོག་གི་རྩོལ་བ་དང༌། ཤིང་གི་ངོས་ནས་ཚུར་འཕོ་འགྱུར་འགྲོ་བའི་ཁྱད་པར་གང་ལ་ཡང་མ་བསམས་པར། ཤིང་གཅོད་པའི་དུས་ཀྱི་ཁྱད་པར་ཙམ་ལ་བསམས་ནས་བརྗོད་ན། བློ་བཟང་གིས། ཤིང་བཅད་ཟིན། གཅོད་བཞིན་པ། གཅད་འགྱུར། ཞེས་འབྲི་དགོས་པ་རྣམས་ཞིབ་ཏུ་ཤེས་ན་གསུང་རབ་ཀྱི་བརྡ་ཆད་མང་པོ་ཞིག་ལ་འཇུག་པ་སླ་ཞིང་སྔར་མ་མྱོང་བའི་བྲོ་བ་གསར་པ་ཞིག་མྱོང་རྒྱུ་ཡོད་པར་སེམས་སོ། །KHjརྗེ་ཙོང་ཁ་པའི་དྲ་བ།

   གནད་འདི་དག་ལ་ཞིབ་ཏུ་མ་བརྟག་པའམ་བློ་གྲོས་ཀྱིས་མ་ཁྱབ་པར་དེང་སང་དཔེ་རྙིང་མང་པོ་ཞིག་ལ་དུས་གསུམ་གྱི་རྣམ་པར་བཞག་སྟངས་རྟགས་འཇུག་གི་འགྲེལ་བཤད་རྣམས་སུ་དུས་གསུམ་གྱི་མཚན་གཞི་འམ་དཔེར་བརྗོད་གྲགས་ཆེ་བ་བཀོད་པ་རྣམས་ཁྱབ་མཐར་བཟུང་སྟེ། མོན་པའི་རྡོར་གཅོད་པར་མ་བཞིན་བྱས་འདུག་པ་ཡང་མང་དུ་སྣང་བ་ནི་བློ་གྲོས་དང་རྣམ་དཔྱོད་ཀྱི་སྨིན་དཀྱུས་འདབ་མ་ལྟར་དཀྱུས་རིང་བ་རྣམས་ཀྱིས་ཇི་ལྟ་བ་བཞིན་མཐོང་སྲིད་ཀྱི། གཞན་དག་གིས་ད་དུང་དུས་གསུམ་གྱི་རྣམ་གཞག་ཕྱོགས་རེ་བ་ལ་ཞེན་པའི་རྨོངས་གཉིད་ལས་མ་སད་བར་དུ་གསུང་རབ་ཀྱི་བརྗོད་བྱ་དང་རྗོད་བྱེད་ལ་ཡིན་ལུགས་ཚད་ལྡན་གྱི་གོ་བ་རང་རྐྱ་འཕེར་བ་ཞིག་རྙེད་མི་སྲིད་དོ།།KHjརྗེ་ཙོང་ཁ་པའི་དྲ་བ།

   འོ་ན། བརྡ་སྤྲོད་མཁན་པོ་མང་པོ་ཞིག་གིས། བདག་གཞན་དང་འབྲེལ་བའི་ལས་ཀྱི་དུས་གསུམ་ལ་བཤད་པ་དེ་ཙམ་མ་མཛད་པར། བྱ་བྱེད་ཀྱི་ལས་གཉིས་གང་གི་ཡང་དབང་དུ་མ་བྱས་པར་བྱེད་པ་པོ་གཞན་དང་དངོས་སུ་འབྲེལ་བའི་ལས་ཙམ་གྱི་འདས་དང་མ་འོངས་ད་ལྟའི་ཁྱད་པར་ཞིབ་ཏུ་བཤད་པའི་རྒྱུ་མཚན་གང་ཡིན་ཞེ་ན། སྔ་མ་ནི་གཟུགས་མི་འགྱུར་བས་དེ་ཙམ་མགོ་རྙོག་མེད་ལ། ཕྱི་མ་བྱེད་པོ་དང་འབྲེལ་ཞིང་དུས་གསུམ་གར་ཡིག་གཟུགས་འགྱུར་བ་ཐེབས་འགྲོ་བས་སྔ་མ་ལས་མགོ་རྙོག་ཚ་བར་དགོངས་ནས་ཞིབ་ཚ་བོའི་ལུགས་སུ་བྱས་པར་སེམས་ཏེ། ཞིབ་ཏུ་སོམས་དང་མཁྱེན་ངེས་ཡིན།KHjརྗེ་ཙོང་ཁ་པའི་དྲ་བ།

    ༥ ༽ བྱེད་པ་པོ་དང་མ་འབྲེལ་བའི་ལས་ཀྱི་དུས་གསུམ་བཤད་པ།KHjརྗེ་ཙོང་ཁ་པའི་དྲ་བ།

    བྱེད་པ་པོ་གཞན་དང་དངོས་སུ་མ་འབྲེལ་བའི་ལས་ལ་ལྟོས་པའི་དུས་གསུམ་གྱི་ཁྱད་པར་འཇོག་ཚུལ་ནི། བྱེད་པ་པོ་ཞིག་གིས་རྩོལ་བའི་འབད་པ་ལ་མ་ལྟོས་པར། དངོས་པོ་རང་གི་ངོས་ནས་འགུལ་སྐྱོད་དམ་འཕོ་འགྱུར་གྱི་རྣམ་པ་སྟོན་པ་ལྟ་བུ་ཞིག་དབྱེ་བའི་གཞིར་བྱས་ཏེ། བྱེད་པ་པོ་མེད་པར་དངོས་པོ་རང་ངོས་ནས་འགུལ་སྐྱོད་དམ་འཕོ་འགྱུར་འགྲོ་ཚར་བའི་ཆ་དེ་བྱེད་མེད་ཀྱི་ལས་དུས་འདས་པ་དང༌། དེ་སྟོན་པའི་ཚིག་ལ་དུས་འདས་པ་སྟོན་པའི་བྱེད་མེད་ལས་ཚིག་ཟེར། དཔེར་ན་འཁོར་ལོ་འཁོར་ཟིན། ལྟ་བུ། དངོས་པོ་རང་ངོས་ནས་འཕོ་འགྱུར་འགྲོ་བཞིན་པ་ལ་བྱེད་མེད་ཀྱི་ལས་ད་ལྟ་བ་དང༌། དེ་སྟོན་པའི་ཚིག་ལ་བྱེད་མེད་ལས་ཚིག་ད་ལྟ་བ་ཟེར། དཔེར་ན། འཁོར་ལོ་འཁོར་བཞིན་པ་ལྟ་བུ། དངོས་པོ་རང་ངོས་ནས་འཕོ་འགྱུར་འགྲོ་རྒྱུའི་ཆ་ལྟ་བུ་བྱེད་མེད་ཀྱི་ལས་མ་འོངས་པ་དང༌། དེ་སྟོན་པའི་ཚིག་ལ་བྱེད་མེད་ལས་ཚིག་མ་འོངས་པ་ཟེར། དཔེར་ན།KHjརྗེ་ཙོང་ཁ་པའི་དྲ་བ།

    དེ་དག་གིས་མཚོན་ནས་རྒྱ་ཆེར་ཤེས་པར་བྱའོ།།KHjརྗེ་ཙོང་ཁ་པའི་དྲ་བ།

    ༦ ༽ དུས་གསུམ་གྱི་དབྱེ་བ་རྒྱས་པ་བཤད་པ།KHjརྗེ་ཙོང་ཁ་པའི་དྲ་བ།

    འདས་མ་འོངས་ད་ལྟ་གསུམ་པོ་ལ་རྗོད་པའི་གནས་སྐབས་ཀྱི་དབྱེ་བ་རྒྱས་པར་ཕྱེ་ན་དགུར་འགྱུར་ཏེ། འདས་པའི་འདས་པ། འདས་པའི་ད་ལྟ་བ། འདས་པའི་མ་འོངས་པ། ད་ལྟ་བའི་འདས་པ། ད་ལྟ་བའི་ད་ལྟ་བ། ད་ལྟ་བའི་མ་འོངས་པ། མ་འོངས་པའི་འདས་པ། མ་འོངས་པའི་ད་ལྟ་བ། མ་འོངས་པའི་མ་འོངས་པ་སྟེ་དགུ་རྣམས་སོ།།KHjརྗེ་ཙོང་ཁ་པའི་དྲ་བ།

    དང་པོ་འདས་པའི་འདས་པ་ནི། བརྗོད་བྱའི་དངོས་པོ་འམ་བྱ་བ་དེ་ཉིད་སྔར་ནས་བྱུང་ཚར་ཞིང་དེ་ཉིད་བྱས་ཟིན་གྱི་ཁྱད་པར་དུ་བྱས་པའི་རྗོད་བྱེད་ཀྱི་སྟོན་ཚུལ་ཞིག་སྟེ། དཔེར་ན། རྒྱལ་པོ་མྱ་ངན་མེད་ཀྱི་སྐབས་སུ་བཀའ་བསྡུ་དང་པོ་བྱས། དུས་རབས་ཉི་ཤུ་པའི་ནང་དམག་ཆེན་གཉིས་པ་མཇུག་བསྒྲིལད། གཅིག་དགུ་དྲུག་ཅུ་ལོར་བོད་ཀྱི་ཆབ་སྲིད་དམངས་གཙོའི་ལམ་ལུགས་སུ་བསྒྱུརད། ལྟ་བུའོ།།KHjརྗེ་ཙོང་ཁ་པའི་དྲ་བ།

    གཉིས་པ་འདས་པའི་ད་ལྟ་བ་ནི། རྗོད་པའི་གནས་སྐབས་སུ་བྱུང་ཟིན་པའི་བྱ་བ་ཞིག་འབྱུང་བཞིན་པའི་སྐབས་ཀྱི་ཁྱད་པར་གསལ་བྱེད་དེ། དཔེར་ན། དེའི་ཚེ་བཅོམ་ལྡན་འདས་ཏིང་ངེ་འཛིན་ལ་སྙོམས་པར་བཞུགས་སོ། ལོ་སྔོན་མའི་དཔྱིད་ཟླ་ཤར་བ་ན་ཞིང་པ་རྣམས་ཀྱིས་ཞིང་ལ་ཆུ་འདྲེན། ཕ་ཡི་རིང་ལ་རང་ས་རང་གིས་འཛིན་བཞིན་པ་རེད། ལྟ་བུ།KHjརྗེ་ཙོང་ཁ་པའི་དྲ་བ།

    གསུམ་པ་འདས་པའི་མ་འོངས་པ་ནི། བྱུང་ཟིན་པའི་གནས་སྐབས་ཀྱི་བྱ་བ་མ་འོངས་པ་གསལ་བྱེད་དེ། དཔེར་ན། བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་འདི་ཉིད་མངོན་པར་རྫོགས་པར་སངས་རྒྱས་ནས་ཤེས་རབ་ཀྱི་ཕ་རོལ་ཏུ་ཕྱིན་པའི་དོན་འདི་ཉིད་འཆད་པར་འགྱུར་རོ། སྒྲིག་ཁྲིམས་བསྡོམ་དགོས་ཞེས། དགེ་བསྐོས་སྔོན་མའི་སྐབས་ནས་བཅའ་ཡིག་ལ་བཀོད་ཡོད། ལོ་སྔོན་མ་ནས་རྒྱུགས་སྤྲོད་རྒྱུ་ཡིན་ཞེས་དགེ་རྒན་ལ་ཞུས་ཟིན། ལྟ་བུ།KHjརྗེ་ཙོང་ཁ་པའི་དྲ་བ།

    བཞི་པ་ད་ལྟ་བའི་འདས་པ་ནི། རྗོད་པའི་གནས་སྐབས་དེར་བྱ་བ་ཞིག་བྱེད་ཚར་མ་ཐག་པར་གསལ་བྱེད་དེ། དཔེར་ན། སངས་རྒྱས་མ་ཐག་ཏུ་ཆོས་འཁོར་སྐོར། སྐད་ཆ་བཤད་མ་ཁད་ཡིན། ཆོས་སྒྲུབ་ཚར་ཙམ་ཡིན། ད་ལྟ་མཐོང་མ་ཐག་པ་རེད། དེ་རིང་གཞི་ནས་མགོ་བརྩམས། ལྟ་བུ།KHjརྗེ་ཙོང་ཁ་པའི་དྲ་བ།

    ལྔ་པ་ད་ལྟ་བའི་ད་ལྟ་བ་ནི། རྗོད་པའི་གནས་སྐབས་ཀྱི་བྱ་བ་ཞིག་བྱེད་བཞིན་པ་གསལ་བྱེད་དེ། དཔེར་ན། ལམ་སྒོམ་བཞིན་པ། ཆོས་སྒྲུབ་བཞིན། སྐད་སྒྱུར་གྱིན་འདུག འཁོར་ལོ་འཁོར་བའི་སྒང་རེད། གདམས་ངག་གནང་བའི་སྐབས་ཏག་ཏག་འཁེལ། འགྲོ་བའི་དུས་རེད། ལྟ་བུ།KHjརྗེ་ཙོང་ཁ་པའི་དྲ་བ།

    དྲུག་པ་ད་ལྟ་བའི་མ་འོངས་པ་ནི། རྗོད་པའི་གནས་སྐབས་ཀྱི་བྱ་བ་མ་འོངས་པའམ་གཞི་ནས་ཡོང་དགོས་པ་གསལ་བྱེད་དེ། དཔེར་ན། ད་ལྟར་གདམས་ངག་གནང་རྒྱུ་རེད། ཕེབས་རྒྱུ་གཏན་འཁེལ་སོང༌། མིག་གིས་གཟུགས་མཐོང་ནུས། ལྟ་བུ།KHjརྗེ་ཙོང་ཁ་པའི་དྲ་བ།

    བདུན་པ་མ་འོངས་པའི་འདས་པ་ནི། རྗོད་པའི་གནས་སྐབས་ཀྱི་བྱ་བ་མ་འོངས་པ་ཞིག་གྲུབ་ཚར་བའི་དུས་ཀྱི་ཁྱད་པ་གསལ་བྱེད་དེ། དཔེར་ན། རིན་ཆེན་ཕྲེང་བ་ལས། བདག་ཉིད་ཁོ་ན་བསླུས་པར་འགྱུར། །ཕུང་བ་དག་ནི་ཐོབ་འགྱུར་ཞིང༌། །བཅོམ་འགྱུར་འདི་ནི་རྟད་མ་ཡིན། །སྤྱོད་འཇུག་ལས། བདག་མེད་མཐོང་བས་གྲོལ་འགྱུར་ཕྱིར། །དབུ་མ་བཞི་བརྒྱ་པ་ལས། གཏི་མུག་བཅོམ་པས་བཅོམ་པར་འགྱུར། །་ལེགས་ལྡན་གྱི་རྟོག་གེ་འབར་བ་ལས། སྟོང་ཉིད་ལྟ་བ་གོམས་བྱས་པས། །ཉོན་མོངས་འཇུག་པ་བཅོམ་ཕྱིར་རོ། །ལྟ་བུ་དང༌། དེ་བཞིན་དུ། སང་ཉིན་ཡི་གེ་བྲིས་ནས་སྐུར་ཆོག སླད་ནས་མཁས་པར་གྱུར་ཏེ་སློབ་དཔོན་བྱེད། ལོ་རྗེས་མར་རྒྱུགས་སྤྲད་ཚར་ནས་གུང་སེང་ལ་འགྲོ། སྨན་འདི་ཟོས་ན་སང་ཉིན་ད་ཚོད་དྲག་ཚར་བ་རེད། ལྟ་བུ།KHjརྗེ་ཙོང་ཁ་པའི་དྲ་བ།

    བརྒྱད་པ་མ་འོངས་པའི་ད་ལྟ་བ། རྗོད་པའི་གནས་སྐབས་ཀྱི་བྱ་བ་མ་འོངས་པ་ཞིག་འགྲུབ་བཞིན་པའི་དུས་ཀྱི་ཁྱད་པར་གསལ་བྱེད་དེ། དཔེར་ན། བདག་སངས་རྒྱས་ནས་ཆོས་ཀྱི་འཁོར་ལོ་སྐོར་བར་བྱེད། ལོ་རྗེས་མར་དབུ་མ་དཔེ་འཁྲིད་བྱེད། མ་འོངས་བྱམས་པས་ཆོས་འཁོར་སྐོར་བའི་ཚེ། འབྱུང་འགྱུར་ཚེ་ལོ་བཅུ་པའི་དུས། ལྟ་བུ།KHjརྗེ་ཙོང་ཁ་པའི་དྲ་བ།

    དགུ་པ་མ་འོངས་པའི་མ་འོངས་པ་ནི། རྗོད་པའི་གནས་སྐབས་ཀྱི་བྱ་བ་མ་འོངས་པ་ཞིག་འབྱུང་བར་འགྱུར་བའི་ཁྱད་པར་གསལ་བྱེད་དེ། དཔེར་ན་སངས་རྒྱས་བྱམས་པ་ཞེས་བྱ་བ་འཇིག་རྟེན་འདིར་འབྱུང་ལ་དེས་ཆོས་ཀྱི་འཁོར་ལོ་རྒྱ་ཆེན་པོ་བསྐོར་བར་འགྱུར་རོ།། ལོ་ལྔ་ཡི་རྗེས་སུ་ང་ཕ་ཡུལ་ལ་བསླེབ་རྒྱུ་རེད། ད་ནས་ལོ་བརྒྱ་སོང་ན་ང་ཅག་ཀུན་འཆི་བར་འགྱུར། རྗེས་མར་དཀའ་ངལ་བྱུང་ན་ཕྱག་བྲིས་གཏང་དགོས། ལྟ་བུའོ།།KHjརྗེ་ཙོང་ཁ་པའི་དྲ་བ།

    ༧ ༽ རྗོད་བྱེད་སྒྲ་ཡི་དུས་གསུམ་བཤད་པ།KHjརྗེ་ཙོང་ཁ་པའི་དྲ་བ།

    བརྗོད་བྱ་དོན་གྱི་བྱ་བའི་དུས་གསུམ་སྟོན་པའི་ཚིག་གམ་རྗོད་བྱེད་ཀྱི་སྒྲ་དེ་ལ་སྤྱི་བྱེད་འབྲེལ་ལས་ཚིག་གི་དུས་གསུམ་དང་བྱེད་མེད་ལས་ཚིག་གི་དུས་གསུམ་གཉིས་སུ་ཡོད་མོད་ཀྱང༌། འདི་ནི་ཚོགས་ཤུལ་བླ་མ་ནོར་བུ་བསྟན་འཛིན་གྱིས་ཉམས་མྱོང་གི་ཐོག་ནས། གསར་སྤེལ་མཛད་པའི་ལུགས་ལྟར་བཤད་ན་གོ་བདེ་ཞིང་གཞུང་དོན་འབྱེད་པའི་ཡན་ལག་ཏུ་འོས་ཤིང་འཚམ་པས་དེར་གཞི་བཞག་ནས་འགོད་ན། སྤྱིར་དུས་གསུམ་སྟོན་པའི་རྗོད་བྱེད་ཀྱི་སྒྲ་ལ། དུས་གསུམ་སྤྱིར་བཏང་བ། དུས་གསུམ་བྱེ་བྲག་པ། དུས་གསུམ་ཐོར་བུ་བ་དང་གསུམ་ཡོད་དོ།KHjརྗེ་ཙོང་ཁ་པའི་དྲ་བ།

    ༡ དུས་གསུམ་སྤྱིར་གཏང་བ་ནི།KHjརྗེ་ཙོང་ཁ་པའི་དྲ་བ།

    བྱ་ཚིག་མ་ནིང་བྱེད་ཚིག་མོ་ཡིས་འཕུལ།།པ་སྡེ་ལས་གཞན་འདས་ཚིག་ཕོ་ཡིས་འཕུལ།།སྒྲ་གདངས་ཐ་དད་མགོ་ཅན་མེད་ངེས་ལ།།བརྗོད་བདེར་བྱེད་ཚིག་མ་ནིང་འགྱུར་ཡང་སྲིད།།KHjརྗེ་ཙོང་ཁ་པའི་དྲ་བ།

    བྱ་ཚིག་མ་འོངས་པའི་ཚིག་ལ་སྔོན་འཇུག་མ་ནིང་དང༌། བྱེད་ཚིག་ད་ལྟ་བ་ལ་སྔོན་འཇུག་མོ་ཡིས་འཕུལ་ཞིང༌། མིང་གཞི་པ་སྡེ་ལས་གཞན་པའི་འདས་ཚིག་གི་སྔོན་འཇུག་ལ་ཕོ་ཡིས་འཕུལ་བ། དམིགས་བསལ་བརྗོད་བདེར་བྱེད་ཚིག་ད་ལྟ་བ་གི་སྔོན་འཇུག་མ་ནིང་འགྱུར་བ་ཡང་སྲིད་དོ། །ཞེས་པའོ།། དཔེར་ན།ལམ་སོགས། དགག འགོག བཀག ཁོགསྣོད་ཆུས། དགང༌། འགེང༌། བཀང༌། ཁོང༌།རྣ་བ། དགབ། འགེབ། བཀབ། ཁོབ།ཤིང་སོགས། གཟུགས། འཛུགས། བཙུགས། ཚུགས།ལྟ་བུ་སྟེ། འདི་ལ་ཞིབ་མོའི་ལུགས་སུ་བྱས་ན་ནང་གསེས་ཀྱི་དབྱེ་བ་ཁ་ཤས་ཡོད་པ་འདྲ་སྟེ། མིང་གཞི་སྡེ་པ་གཅིག་པའི་དུས་གསུམ་སྤྱིར་བཏང་བ། མིང་གཞི་སྡེ་པ་གཉིས་འབྲེལ་གྱི་དུས་གསུམ་སྤྱི་བཏང་བ། མིང་གཞི་སྡེ་པ་སུམ་འབྲེལ་གྱི་དུས་གསུམ་སྤྱིར་བཏང་བ་བཅས་ཡོད། དེ་དག་གི་གོ་དོན་རིམ་བཞིན་འགོད་ན།KHjརྗེ་ཙོང་ཁ་པའི་དྲ་བ།

    དང་པོ་ནི། དུས་གསུམ་སྤྱིར་བཏང་བ་གང་ཞིག བྱ་ཚིག་དེའི་མ་འོངས་པ་དང་ད་ལྟ་བའི་མིང་གཞི་ལ་སྡེ་པ་དེའི་མོ་ཡིག་ཡིན་དགོས་པ་དང༌། འདས་ཚིག་གི་མིང་གཞི་ལ་སྡེ་པ་དེའི་ཕོ་ཡིག་ཡིན་པས་ཁྱབ་པ། སྐུལ་ཚིག་ལ་སྡེ་པ་དེའི་མིང་གཞི་མ་ནིང་ཡིན་པས་ཁྱབ་པ་ཞིག་ཡིན་དགོས།KHjརྗེ་ཙོང་ཁ་པའི་དྲ་བ།

    དཔེར་ན། ལམ་སོགས་དགག་བྱ། འགོག་བྱེད། བཀག ཁོག་ཅིག་ལྟ་བུ།KHjརྗེ་ཙོང་ཁ་པའི་དྲ་བ།

     དགང་བྱ་འགེངས་བྱེད་བཀང་ཁོང་ཞིག།དགད་བྱ་འགད་བྱེད་བཀད་ཁོད་ཅིག།དགབ་བྱ་འགེབས་བྱེད་བཀབ་ཁེབས་ཤིག།དགར་བྱ་འགེར་བྱེད་བཀར་ཁོར་ཞིག།དགལ་བྱ་འགེལ་བྱེད་བཀལ་ཁོལ་ཞིག།དགུག་བྱ་འགུག་བྱེད་བཀུག་ཁུག་ཅིག།དགུམ་བྱ་འགུམ་བྱེད་བཀུམ་ཁུམ་ཞིག།དགོད་བྱ་འགོད་བྱེད་བཀོད་ཁོད་ཅིག།དགྲམ་བྱ་འགྲེམ་བྱེད་བཀྲམ་གྲོམས་ཤིག།དགྲོལ་བྱ་འགྲོལ་བྱེད་བཀྲོལ་ཁྲོལ་ཞིག།འདི་དག་སྔོན་འཇུག་ད་ཡིག་དང༌།།མིང་གཞི་ཀ་སྡེ་ཁོ་ན་ཡིན།།གདིང་བྱ་འདིང་བྱེད་བཏིངས་ཐིངས་ཤིག།གདགས་བྱ་འདོགས་བྱེད་བཏགས་ཐོགས་ཤིག།གདབ་བྱ་འདེབས་བྱེད་བཏབ་ཐོབ་ཅིག།གདུལ་བྱ་འདུལ་བྱེད་བཏུལ་ཐུལ་ཞིག།གདེག་བྱ་འདེགས་བྱེད་བཏེགས་ཐེག་ཅིག།གདོན་བྱ་འདོན་བྱེད་བཏོན་ཐོན་ཅིག།འདི་དག་བྱ་ཚིག་སྔོན་འཇུག་ག།བྱེད་ཚིག་སྔོན་འཇུག་འ་ཡིག་དང༌།།མིང་གཞི་ཏ་སྡེ་ཁོ་ན་ཡིན།།སྡེ་པ་གཅིག་པའི་མིང་གཞི་ནི།།བྱ་བྱེད་མོ་དང་འདས་པར་ཕོ།།སྐུལ་ཚིག་མིང་གཞི་མ་ནིང་སྟེ།།དབྱངས་དང་ཡང་འཇུག་སྐབས་བསྟུན་སྦྱར།།KHjརྗེ་ཙོང་ཁ་པའི་དྲ་བ།

རྩོམ་སྒྲིག་པ།:མཁའ་ཚེ།
བརྒྱུད་འགོད།  
29.1K