མདུན་ངོས་སུ་བསྐྱོད། |   ཉར་ཚགས་བྱེད། |   མདུན་ངོས་སུ་བཀོད། |  རྒྱ་ཡིག་གི་དྲ་ངོས།
མདུན་ངོས། / ཞིབ་འཇུག / གཞན་དག / ནང་དོན་དངོས།

༄༅།།རྗེ་བླ་མ་ཙོང་ཁ་པ་ཆེན་པོའི་ཐུགས་གཤིས་དང་སྐུ་གཟུགས་ཞལ་རས་སོགས་གླེང་བ།

ཡོང་ཁུངས།   ངེད་དྲ་བ།     སྤེལ་དུས།  2017-08-30 12:45:51     རྩོམ་པ་པོ།   ཨ་ཚོགས་མཁས་བཙུན།    ཀློག་ཐེངས།  
ཡིག་གཟུགས་ཇེ་ཆེར་གཏོང་། ཡིག་གཟུགས་ཇེ་ཆུང་གཏོང་།

 གླེང་སློང་བ།pQIརྗེ་ཙོང་ཁ་པའི་དྲ་བ།

ད་ལོ་སྟེ་ཕྱི་ལོ་ཉིས་སྟོང་བཅུ་བདུན་པ་ནི། ༧ རྗེ་བླ་མ་ཙོང་ཁ་པ་ཆེན་པོ་རང་རེ་སྐྱེས་འགྲོའི་དཔལ་མགོན་དུ་སྐུ་འཁྲུངས་ནས་ལོ་ངོ་མཐོང་དྲུག་བརྒྱ་དྲུག་ཅུ་འཁོར་བ་དང་། གནམ་ལོ་མེ་བྱ་རྗེ་བླ་མ་ཙོང་ཁ་པའི་དགུང་སྙིང་མེ་མོ་བྱ་ལོ་བ་ཏག་ཏག་ཁེལ་འདུག དགུང་སྙིང་ནི་ལོ་དྲུག་ཅུའི་ནང་ཐེངས་རེར་ཁེལ་བ་དང་། འདས་པའི་ལོ་དྲུག་བརྒྱ་དྲུག་ཅུའི་ནང་ཁེལ་ཐེངས་བཅུ་གཅིག་པ་དེ་རེད།pQIརྗེ་ཙོང་ཁ་པའི་དྲ་བ།

   དེས་ན་ད་ལོའི་བོད་ཟླ་དང་ཧོར་ཟླ་རྩིས་ལུགས་གང་ཡིན་ལ་མ་ལྟོས་པར་རང་ལུགས་ཀྱི་བཅུ་བའི་མར་ངོའི་ཚེས་བཅུ་ནི། རྗེ་བླ་མ་སྐུ་འཁྲུངས་པ་དང་། མྱ་ངན་ལས་འདས་པ། བླ་ན་མེད་པའི་བདུད་རྩི་མངོན་ཏུ་བགྱིས་པའི་དུས་ཆེན་སུམ་འཛོམས་ལ་མངོན་པར་བསྒྲག་ཆོག་པར་ཡོད་དེ། ཕྱི་མ་གཉིས་ནི་རྩོད་མེད་ཡོངས་གྲགས་ཡིན་ཞིང་། སྔ་མ་ཡང་བརྩད་ཅིང་ཞིབ་ན་མཆུ་ཟླའི་ཡར་ངོའི་ཚེས་བཅུ་ལ་ལྷུམས་སུ་ཞུགས་པ། རྗེ་མཁས་གྲུབ་པའི་རྗེའི་རྣམ་ཐར་དང་། དེའི་ཟུར་འདེབས་བླ་མ་རྟོགས་ལྡན་འཇམ་དཔལ་བའི་རྗེའི་རྣམ་ཐར་སོགས་རྗེའི་བུ་ཆེན་ཉི་ཟླ་ལྟ་བུ་དག་གི་གསུང་ལ་རྩོད་པ་མེད། དེས་ན་དེ་ནས་བརྩིས་པའི་སྨིན་དྲུག་ཟླ་བའི་མར་ཚེས་བཅུ་ལ་སྐུ་འཁྲུངས་དུས་ཁེལ་བ་ནི་སྐྱེ་བོ་རང་ག་བ་ལའང་སྲིད་པས། སྐྱེ་བོ་ཕལ་བའི་ལུགས་ལའང་བཅུ་བའི་ཡར་ཚེས་བཅུ་དང་བཅོ་ལྔ་ལ་སྐྱེས་དུས་མ་ཚང་བར་འཇོག་པ་དང་། མངལ་ནས་ཉིན་འགའ་དང་དེ་ལས་མང་བར་འདའ་ཆོག་པ་མི་འགལ་བས། བཅུ་བའི་ཉེར་ལྔ་ནི་དུས་ཆེན་སུམ་འཛོམས་ལ་ཐེ་ཚོམ་མེད་པར་ཐག་གཅད་ཆོག་པར་ཡོད། དེ་ཡང་རྒྱུ་མཚན་གཞན་ཞིག་ནི་བླ་མ་མཁས་གྲུབ་པ་ལ། བདེ་མཆོག་ཞལ་གཟིགས་ནས་ཡི་དམ་གྱིས་གསུངས་པ། བུ་མྱ་ངན་མ་བྱེད། ཆུ་བུར་གྱི་མིག་ལ་བློ་བཟང་གྲགས་པར་མཐོང་བ་ཡིན་གྱི། ང་དང་གཉིས་སུ་མེད། ཡར་ངོ་མར་ངོའི་ཚེས་བཅུའི་མཆོད་པ་གྱིས། མཁའ་སྤྱོད་དུ་འགྲོ་བ་ལས་སླ་བ་མེད་དེ་བྱེད་པ་ཉུང་ཞེས་པའི་སྐབས་ཀྱི་ཡར་ངོའི་ཚེས་བཅུ་ལྷུམས་སུ་ཞུགས་པ་དང་། མར་ངོའི་ཚེས་བཅུ་དུས་ཆེན་སུམ་འཛོམས་ལ་ཐེ་ཚོམ་མེད་དེ། གཞན་དུ་ན་བུ་ཆེན་རྣམས་ལ་འཁྲུངས་ཚེས་གླེང་སློང་མེད་པའི་རྒྱུ་མཚན་མེད་དོ།pQIརྗེ་ཙོང་ཁ་པའི་དྲ་བ།

   གང་ལྟར་ད་ལོ་ནི་རྗེ་བླ་མ་བདག་ཉིད་ཆེན་པོ་ལ་རྗེས་དྲན་དམིགས་བསལ་བ་ཞིག་བྱ་དགོས་ཆགས་བསྡད་ཡོད་ལ། རང་ཉིད་ཀྱིས་ནི་རྗེ་བླ་མ་རྗེས་དྲན་བྱ་འཆར་ནི། སྔ་མ་ནས་རྗེ་ཡབ་སྲས་གསུམ་གྱི་གསུང་འབུམ་ཆ་ཚང་བཞུགས་པའི་སྟེང་། ཉེ་དུས་བསྟན་པའི་སྦྱིན་བདག་ཆེན་པོ་སྟེ་མགོན་མེད་ཟས་་སྦྱིན་གཉིས་པ། གྲོགས་སྙིང་ལྕགས་ལགས་ཀྱིས་ཁོ་རང་དང་། གྲོགས་བསོད་ནམས་རྡོ་རྗེ་ལགས་དང་། ཁོ་བོ་ཅག་བཅས་ལ་རྗེ་གསུང་འབུམ་སེར་གཙུག་དཔར་གཞི་ཡིན་པ་ལ། རྔ་བའི་ཀརྟི་དགོན་དུང་དཀར་དཔེ་ཁང་གི་རྗེ་གསུང་འབུམ་ཡི་གེ་རགས་ཁྱད་ཀྱིས་ཚར་རེ། མཇལ་རྟེན་ཏུ་གསོལ་རས་བཀའ་དྲིན་ཐོབ་པ་དེར་གསེར་ཞགས་ཤིག་འབུལ་བཞིན་པ་དང་། རྗེ་བླ་མའི་སྔགས་ཕྱོགས་ཀྱི་གཞུང་ཆེན་ཁག་ལ་བམ་ཀློག་དང་། ལྟ་བའི་གཞུང་ཆེན་ལྔ་ལ་ཞིབ་མཇལ་ཅིག། རྗེ་བླ་མའི་ལྕགས་མདའ་ལྕགས་གཞུ་གཉིས་ཀྱི་མཐེབ་སྦྱོང་བ་བཅས་ཀྱི་སྒོ་ནས་རྗེས་དྲན་བྱ་འཆར་རྣམས་བཏིང་ཡོད།pQIརྗེ་ཙོང་ཁ་པའི་དྲ་བ།

མྱོང་སྣང་བརྗོད་པ།pQIརྗེ་ཙོང་ཁ་པའི་དྲ་བ།

   ཉེ་དུས་སེར་གཙུག་གིས་བསྒྲིགས་པའི་རྗེའི་རྣམ་ཐར་པོད་ཆེན་ལྔ་བཞུགས་པ་དེར་ཞིབ་མཇལ་ཚར་གཅིག་རྫོགས་པ་ཡིན། དེ་ནས་ཚོར་ཤུགས་ཆེས་ཆེ་བའི་རིགས་གཞན་གཅིག་ནི། བསམ་གཏན་གྱི་མཉམ་བཞག་ཐུན་གཅིག་ལ་སྔོན་གྱི་སྐྱེ་བ་ལྔ་བརྒྱ་ཙམ་གཟིགས་ཤིང་། སྐྱེ་བ་བཅུ་དྲུག་ནི་ཉལ་བའི་རྨི་ལམ་དུ་ཡང་དྲན་ཞེས་ཞལ་གྱིས་འཆེས་པའི་སྔ་འགྱུར་རྙིང་མའི་གྲུབ་དབང་ཆེན་པོ་དང་། ༧ གྲུབ་ཆེན་ལས་ཀྱི་རྡོ་རྗེའམ་ལྷོ་བྲག་གྲུབ་ཆེན་ནམ་མཁའ་རྒྱལ་མཚན་པས། རྗེ་བླ་མ་ཙོང་ཁ་པ་ཆེན་པོ་རྒྱ་གར་འཕགས་པའི་ཡུལ་ལ་འབྱོན་བཞེད་ཀྱི་དགོངས་པར་བཤོལ་བཏབ་པ་དེ་ནི་ཇི་འདྲའི་ཡིད་འགུལ་ཐེབས་ཤིང་། བཀའ་དྲིན་ལེགས་གསོལ་ཞུ་ཡུལ་བླ་ན་མེད་པ་ཞིག་རེད་ཨང་། བླ་མ་བཀའ་དྲིན་ཅན་དེས་དེ་དུས་བཤོལ་བཏབ་མེད་པ་ཡིན་ན། ད་ལྟ་རྗེ་བླ་མའི་ལེགས་བཤད་ཀྱི་གཏེར་དུ་རྫོགས་པའི་གསུང་རབ་པོད་ཆེན་བཅོ་བརྒྱད་ཀྱི་བདག་ཉིད་ཅན་འདི། རང་རེའི་བོད་ཡིག་སྟེང་ཡོད་མེད་དང་། དེ་བས་ཀྱང་རང་རེའི་བགོ་སྐལ་དུ་ཡོད་དང་མེད་ཐེ་ཚོམ་མོ། དེའི་དུས་བཤོལ་བཏབ་ཚུལ་བླ་མ་བཀའ་དྲིན་ཅན་ཁོང་ཉིད་ཀྱིས་དངོས་སུ་གསུངས་པ་ཆ་ཚང་འདིར་བཤུས་པ་ཡིན་ན། དད་པའི་སྤུ་ཟིང་ཞིང་མིག་མཆི་མ་དང་བཅས་པའི་སེམས་ཚོར་མ་འདྲ་བ་ཞིག་ཡོད་ཀྱང་ཡི་གེ་མང་བས་འཇིགས་ཏེ་རགས་ཙམ་འགོད་ན་འདི་ལྟར་བཞུགས།pQIརྗེ་ཙོང་ཁ་པའི་དྲ་བ།

   བདག་གིས་ལོ་བདུན་ཅུ་ལོན་དུས་སུ་བུ་མོ་དཀར་མོ་གཅིག་ན་རེ། བྱམས་པས་བྱིན་གྱིས་བརླབས་པའི་གང་ཟག་འཇམ་དཔལ་དབྱངས་དང་གཉིས་སུ་མེད་པ། ལྷ་མོ་དབྱངས་ཅན་མས་རིག་པ་སྟེར་བར་བྱེད་པ་ཕུན་སུམ་ཚོགས་པ་ཞིག་དང་སྐྱེ་བ་བཅོ་ལྔའི་གོང་ནས་འབྲེལ་བ་ཡོད་ཅིང་། ཕན་ཚུན་དཔོན་སློབ་ཏུ་འབྲེལ་འོང་བ་ཡོད་པས། དེ་ལ་ཆོས་བཀའ་ལ་སྲིས་མ་འཇུག་པར་བྱིན། ཕར་ཡང་ཆོས་ཞུ་ཟེར་བ་ཞིག་བྱུང་བས། བདག་མོས་གུས་དཔག་ཏུ་མེད་པ་སྐྱེས་སོ། ཡང་ལན་གཅིག་མགོན་པོ་བྱམས་པ་འབྱོན་གྱིན་ཡོད་ཟེར་བའི་སྐད་ལྷང་བ་ཞིག་བྱུང་། ཆོས་རྗེ་དཀའ་བཞི་པས་རྒྱ་མོ་རིའི་འཕྲང་ལ་ཕེབས་པའི་ཚོད་དུ་འདུག བཅོམ་ལྡན་འདས་ཀྱིས་ཆོས་ཀྱི་འཁོར་ལོ་བསྐོར་བའི་དུས་ལུག་ཟླའི་ཚེས་བཞི་པའི་ཉིན། ལྷོ་བྲག་བྲ་བོ་དགོན་པར་ཕྱག་ཕེབས་བྱོན་པ་བདག་གིས་བསུ་བ་ལ་ཕྱིན་པས། རྗེ་བཙུན་འཇམ་པའི་དབྱངས་འོད་ཀྱི་དྲ་བས་མཛེས་པ་ཞིག་ཕེབས་བྱུང་བར་མཐོང་། ཁོང་གིས་བདག་ཕྱག་ན་རྡོ་རྗེ་དངོས་སུ་གཟིགས་ཤིང་ཞེས་དང་། ཡང་ཚེས་བཅོ་ལྔའི་ཐོ་རངས་བྱམས་པ་ཉིད་ལ་བསླབ་བཏུས་ཞུས་ཟེར་བ་ཞིག་བྱུང་། ཁོང་ལ་བསླབ་བཏུས་གསུང་བར་ཞུ་ཞུས་པས། ཁོང་གིས་གསུང་ནས་ཡི་དམ་དེ་སྐད་གསུང་ངམ་གསུང་། གསུང་ལགས་ཞུས་པས་བསླབ་བཏུས་གསུངས། ཆོས་ཉན་དུས་མཐོང་སྣང་ལ་ཁོང་གི་དབུའི་སྟེང་ན་རྗེ་བཙུན་བྱམས་པ་བཞུགས། དཔུང་གཡས་ན་འཇམ་དབྱངས་དཀར་པོ། གཡོན་ན་ལྷ་མོ་དབྱངས་ཅན་མ་བཞུགས་འདུག མགོན་པོ་ཕྱག་བཞི་པ་དང་ཕྱག་དྲུག་པས་གཙོ་བྱས་པའི་ཆོས་སྐྱོང་དང་མཁའ་འགྲོ་བསམ་གྱིས་མི་ཁྱབ་པས་བསྐོར་ནས་འདུག གཞན་ཡང་དཀར་ཕྱོགས་ལ་དགའ་བའི་ལྷ་འདྲེའི་ཚོགས་མང་པོ་ཆོས་ཉན་ཞིང་འདུག་པས་མོས་གུས་ཐུན་མོང་མ་ཡིན་པ་སྐྱེས་སོ་ཞེས་དང་། ཁོང་གི་འཁོར་བླ་མ་འཇམ་དཀར་བ་སོགས་ཕུན་སུམ་ཚོགས་པ་མང་བར་འདུག་པ་རྣམས་ལ་ཡང་། བདག་གིས་ཆོས་ལུང་མང་དུ་བྱས་དཔོན་སློབ་ཐམས་ཅད་ལ་དད་པ་ཐོབ་བོ། དེའི་སྟོབས་ཀྱིས་བདག་ལ་ཡང་ཡོན་ཏན་བག་རེ་སྐྱེས་པ་བྱུང་ངོ་ཞེས་དང་། pQIརྗེ་ཙོང་ཁ་པའི་དྲ་བ།

   དེ་ནས་རེ་ཞིག་དཀའ་བཞི་པའི་གསུང་ནས། བདག་ལ་ལྟ་བའི་སྐོར་གྱི་ཐེ་ཚོམ་འགའ་ཞིག་ཡོང་བས་འདི་སེལ་བ་ལ་རྒྱ་གར་ཤིང་གི་རི་ན་རྗེ་མི་ཏྲ་བཞུགས་པའི་དྲུང་དུ་འགྲོ་འདོད་པས། དེ་ལ་བར་ཆད་མི་འབྱུང་ལགས་སམ་གསུང་གིན་འདུག་པ་ལ། ལྟ་བའི་གནད་རྣམས་བདག་གིས་ཡི་དམ་ལ་ཞུ་ཡིས། རྒྱ་གར་ལ་འབྱོན་ན་རང་མི་ཏྲ་དང་མཇལ་བ་སོགས་ངོ་མཚར་བ་འོང་ནའང་། ཁྱེད་ཀྱི་འཁོར་འདི་རྣམས་ཚོགས་ལམ་དང་སྦྱོར་ལམ་ཆེན་པོ་ལ་གནས་པ་ཤ་སྟག་འདུག་པས། འདི་རྣམས་ཀྱི་ཚེའི་བར་ཆད་དུ་འགྱུར་བ་འདུག་ཅིང་། ཁྱེད་ཀྱང་རྒྱ་གར་དུ་བཞུགས་ནས་ཚུར་མི་ཕེབས། དེ་བས་བོད་ཕྱོགས་འདིར་བསྟན་པ་ལ་ཕན་པའི་ཐབས་ལ་འབད་ན་འགྲུབ་པས་དེབཞིན་མཛད་འཚལ་ཞེས་ཞུས་ཤིང་། བདག་གིས་བཤོལ་བཏབ་བོ། དགུང་ལོ་བཞི་བཅུ་རྩ་ལྔ་ལ་སྐུ་ཚེའི་བར་ཆད་ཡོང་ཉེན་འདུག་པས། དེ་སེལ་བའི་ཕྱིར་དུ་དཔལ་འཁོར་ལོ་ཆེན་པོ་བདུད་རྩིའི་ཐིགས་པའི་བསྐྱེད་རྫོགས་ཟབ་མོ་འདི་བདག་གིས་ཁོང་ལ་ཕུལ་ཞིང་། ད་ལན་འདི་ནས་ཙ་རི་དང་གཉལ་སོགས་ལ་བྱོན་ན་བསྟན་པ་དང་སེམས་ཅན་ལ་འཕྲལ་དང་ཡུན་དུ་ཕན་པའི་ཐབས་ཁྱད་པར་ཅན་འདུག་ཅིང་། རྒྱ་གར་གྱི་མཁས་གྲུབ་གཅིག་གི་སྐུའི་སྣང་བ་དང་བསྟན་བཅོས་ལ་བརྟེན་ནས་ཟབ་མོའི་དོན་ལ་དཔྱིས་ཕྱིན་པའི་ངེས་པ་རྙེད་པ་ཡོང་བས། དེ་ལྟར་མཛད་ཅིང་རེ་ཞིག་གི་བར་བྱ་བྲལ་འཆད་ཉན་མཛད་ན་འགྲོ་ལ་ཕན་ཆེ་ཞེས་སོགས་ཞུས་པས། ཁོང་གིས་ཀྱང་གསན་དགོངས་མཛད།   pQIརྗེ་ཙོང་ཁ་པའི་དྲ་བ།

   བདག་གི་ས་ཆ་ཡར་མར་རྣམས་སུ་ཟླ་བ་བདུན་བཞུགས། ལྷོ་བྲག་གི་གྲྭ་སློབ་སྐྱེ་བོའི་ཚོགས་དང་བཅས་པ་ལ་གསང་ཆོས་མང་དུ་གནང་ངོ་། བདག་གིས་ཁོང་གི་སྐུ་བསོད་རྒྱས་པའི་ཕྱིར་རྣམ་སྲས་ལ་གཏོར་མ་ཕུལ་བས་དེའི་ནུབ་མོ་རྡོ་རྗེ་རྣམ་འཇོམས་ལ་རྣམ་སྲས་བཞིས་བསྐོར་བ་ཞལ་མཐོང་ཞིང་། དེའི་སྒྲུབ་ཐབས་ལས་མཐའ་དང་བཅས་པ་གསུངས་སོ་ཞེས་སོགས། འཕགས་པའི་གང་ཟག་ནང་ཁོ་ནའི་སྤྱོད་ཡུལ་བའི་ཕྱི་ནང་གསང་གསུམ་གྱི་རྣམ་ཐར་དང་། མ་འོངས་འབྱུང་འགྱུར་གྱི་རྣམ་ཐར་ཡོངས་ཀྱི་གནད་བསྡུས་པའི་གསུང་གསེར་ནག་གི་རིལ་བུ་འདྲ་བ། གཅིག་ཏུ་བསྟན་པ་དང་འགྲོ་བ་ཁོ་ན་ཐུགས་ལ་བཞག་པའི་རྣམ་འགྱུར། ཤས་མ་བཟོད་ཅིངཤུགས་མ་ཐུབ་ཀྱིས་གསུང་ཕྱུང་བ་འདི་དག་ལ། རང་གཞན་ཀུན་པོས་དྲིན་ཚོར་བའི་བསམ་དགོངས་ངེས་པར་ཡོད་པ་ཞིག་དགོས་པ་མིན་ནམ་སྙམ་པའོ། གསུང་ཆ་ཚང་བླ་མ་སྐུ་དྲིན་ཅན་དེ་ཉིད་ཀྱི་བཀའ་འབུམ་ཁྲོད་དང་། འབྲུག་རྒྱལ་དབང་བའི་རྗེའི་རྣམ་ཐར་ཆེན་མོ་ནའང་འདུགpQIརྗེ་ཙོང་ཁ་པའི་དྲ་བ།

   འབྲུག་རྒྱལ་དབང་བའི་རྗེའི་རྣམ་ཐར་ཆེན་མོ་ནི། རྗེའི་རྣམ་ཐར་ཡོངས་ཀྱི་ཕྱི་མ་འཕྱི་ཤས་སུ་འདུག་པ་དང་། རྗེའི་ཕྱི་ནང་གསང་གསུམ་གྱི་རྣམ་ཐར་ཞིག་ལ་ཆ་ཚང་ཤོས་དང་། གྲ་རྒྱས་ཤོས། ཚིག་དོན་གང་ནས་ཀྱང་ལེགས་ཤོས་བཅས། ཡོད་ན་གཅིག་ཆོག་དང་། མེད་ན་ཐབས་ཆག་དེ་ཡིན། རྗེའི་གསང་བའི་རྣམ་ཐར་ཞིག་ལ་མདོ་སྨད་པ་རྗེ་ལེགས་བཟང་བའི་རྗེའི་གསང་རྣམ་དེ་ནི་མ་འདྲ་བ་ཞིག་འདུག བློ་འཁུལ་བ་དང་ཡིད་གཏོད་ཕེར་བ། གདེངས་ཚོད་དང་ལྡན་པ་སོགས་རྩོམ་པ་པོའི་རྩོམ་རྩལ་དང་རྩོལ་བ་ལྷག་བསམ། ཀུན་སློང་གི་ཁྱད་པར་བཅས་ལ་རག་ལས་པ་འདྲ་། རྗེ་མཁས་གྲུབ་པའི་རྗེའི་རྣམ་ཐར་ནི་སྔ་མོའི་དུས་སུ་རྣམ་ཐར་ཆེན་མོ་ཞུ་བཞིན་ཡོད་ཅིང་། ཕྱིས་བྱུང་གི་རྗེའི་རྣམ་ཐར་ཐམས་ཅད་ཀྱི་ཨ་མ་ལྟ་བུ་དེ་ཡིན། རྣམ་ཐར་གྱི་འགག་དང་ཁོག་སྒྲིག་པ་རྩལ་ཏུ་ཐོན་པས་བྱིན་རླབས་ཤིན་ཏུ་ཆེ་ཞིང་ཁུངས་ཤིན་ཏུ་དག་པར་ཡོད། ཡིན་ནའང་། བརྗོད་བྱེད་ཚིག་གི་སྙན་ཆ་དང་མཛེས་པ་རྩལ་ཏུ་བཏོན་དྲག་པ་དང་། རྗེའི་བུ་ཆེན་ཞིག་ལ་ཁོང་ལས་ནང་ཐུགས་འདྲིས་ཞིབ་པ་མེད་པས་འདི་ལས་རྒྱས་ཙམ་ཡོང་རེས་དེ་ཙམ་གྱིས་འདོད་བློ་ཁེངས་པ་མ་བྱུང་ངོ་། ཁོང་དང་རྗེ་རྟོགས་ལྡན་འཇམ་དཔལ་བའི་རྗེའི་གསང་རྣམ་གཉིས་ལེགས་བཟང་བའི་རྗེའི་གསང་རྣམ་ལ་དོ་མ་བྱུང་། རྗེ་ཡུམ་གྱི་ལྷུམས་སུ་ཞུགས་པའི་སྔ་ཕྱིའི་ལོ་རྒྱུས་ཐད། རྗེ་རྟོགས་ལྡན་པའི་རྣམ་ཐར་ཆེན་མོའི་ཟུར་འདེབས་དེ། རང་ས་རང་མིའི་ཁྱད་ཀྱིས་མ་འདྲ་བ་ཞིག་གོ། སྒོ་མང་བ་དོན་གྲུབ་བསྟན་རྒྱན་གྱི་རྗེའི་རྣམ་ཐར་ནང་མཛོ་དགེ་རོང་བ་ངག་དབང་ཆོས་གྲགས་རྒྱ་མཚོ་ཞུ་བའི་རྗེའི་རྣམ་ཐར་ཚིག་བཅད་མ། <<མེ་ཏོག་ཆུན་པོ་>>ཞེས་པ་ཆ་ཚང་དྲངས་པ་མ་གཏོགས། ཁུངས་རྗེ་མཁས་གྲུབ་པར་བཅོལ་ཞིང་ལེགས་ཆ་གཞན་དང་གཞན་ནས་བསྐངས་ཏེ། ངག་རྒྱུན་དང་དམ་པའི་གསུང་རྒྱུན་གྱིས་བརྒྱན་པའི་ཡིད་འཁུལ་བའི་རྣམ་ཐར་ཡག་པོ་ཞིག་འདུག ཡིན་ན་ཡང་། རྣམ་ཐར་ཚིག་བཅད་མ་དེ་ཁ་ཚང་དྲང་དགོས་པའི་ཁྱད་མ་མཐོང་ངོ་། ཆ་ཧར་དགེ་བཤེས་བློ་བཟང་ཚུལ་ཁྲིམས་ཀྱི་རྗེའི་རྣམ་ཐར་ཡང་། ཁུངས་རྗེ་མཁས་གྲུབ་པར་རྩ་འཛིན་བགྱིས་པའི་རྒྱས་ཙམ་འདུག་ཀྱང་། བཤད་སྒྲོས་དང་ངག་རྒྱུན་མ་དག་པ་རེ་འགའ་བསྲེས་པས་ཅུང་ཟད་དོགས་འཆར་བྱུང་། ཡང་རྗེའི་བུ་ཆེན་རྣམས་ཀྱི་རྣམ་ཐར་ལོགས་སུ་བཀོད་འདུག་པ་དང་། གསུང་རྒྱུན་དག་སྙམ་པའང་མང་པོ་འདུག་པས་བརྩམས་ཆོས་ལྟ་ཉན་སྤྲོ་བ་ཞིག་འདུག་གོ རྙིང་མའི་བླ་མ་ཟང་ཟང་ནེ་རིང་བ་འཆི་མེད་རབ་རྒྱས་མཆོག་གི་རྗེའི་རྣམ་ཐར་དག་ནི་ཐུང་དྲག་པ་དང་། བོར་བརླག་ཐེབས་པ། རྩོམ་འཕྲོ་ལུས་པ་བཅས་མ་གཏོགས། ཆ་ཚང་བར་རང་རེ་བགོ་སྐལ་དུ་བཞུགས་པ་ཡིན་ན་ནི་ཐུན་མོང་མ་ཡིན་པ་ཞིག་ཡོད་ངེས་པས་ཤིན་ཏུ་ཕངས་སོ།།pQIརྗེ་ཙོང་ཁ་པའི་དྲ་བ།

微信图片_20170830124454.jpgpQIརྗེ་ཙོང་ཁ་པའི་དྲ་བ།

རྗེ་སྐུ་ཞབས་སྨྱུང་མ། pQIརྗེ་ཙོང་ཁ་པའི་དྲ་བ།

དངོས་ལ་འཇུག་པ།pQIརྗེ་ཙོང་ཁ་པའི་དྲ་བ།

དང་པོ།pQIརྗེ་ཙོང་ཁ་པའི་དྲ་བ།

   གང་ལྟར་གོང་གསལ་གྱི་རྣམ་ཐར་འདི་དག་གིས་མཚོན་པའི་རྗེའི་རྣམ་ཐར་མང་པོས། རྗེའི་ཕྱི་ནང་གསང་གསུམ་དང་། ཐོས་བསམ་སྒོམ་གསུམ། མཁས་བཙུན་བཟང་གསུམ། འཆད་རྩོད་རྩོམ་གསུམ་བཅས་པའི་མཛད་འཕྲིན་ལས་འཕྲོས་པའི་རྣམ་ཐར་ཀུན། ཞིབ་ཅིང་ཕྲ་བའི་ལུགས་སུ་མཛད་པ་ནི་སྨོས་མ་དགོས་ཞིང་བཀའ་དྲིན་ལེགས་གསོལ་ཤིན་ཏུ་ཆེ་བ་ཡིན། ཡིན་ནའང་། ཞིབ་ཕྲ་བརྗོད་མེད་པ་གཅིག་རང་ཡོད་པ་ནི་རྗེ་བླ་མའི་སྐུ་གཟུགས་ཀྱི་བརྗིད་ཆེ་ཆུང་དང་། ཞལ་རས་ཀྱི་རྣམ་པ། མདོར་བསྡུས་ན་ཕྱིའི་རྣམ་པ་དང་ཐུགས་གཤིས་སོགས་ཇི་འདྲ་ཡོད་མེད་དེ་ཡིན། དེའི་སྟོང་ཆ་དེ་བོད་སྤྱི་བའི་ཆོས་འབྱུང་རྣམ་ཐར་ཡོངས་ལའང་ཁྱབ་བསྡད་ཡོད་པ་ལྟ་བུ་རེད།pQIརྗེ་ཙོང་ཁ་པའི་དྲ་བ།

   སྤྱིར་དམ་པའི་སྐྱེས་བུ་རྣམས་ནི། སྔར་བསགས་བསོད་ནམས་ཀྱི་སྟོབས་ཀྱིས་རང་བཞིན་ཉིད་དུ་ཕལ་ཆེར་ཞིག་གཟུགས་པོ་བརྗིད་ཐག་ཆོད་པ་དང་། ཞལ་རས་མཚན་བྱད་ལྡན་པ། ཉན་སྤྲོ་བའི་གསུང་སྐད་བཅས་ཐུན་མོང་མིན་པའི་ཁྱད་ཞུགས་ཏེ། སྐྱེ་བོ་ཀུན་གྱི་ཡིད་ལ་རང་བཞིན་གྱིས་ཤིན་ཏུ་འཐད་པ་ཞིག་ཡོད། དེ་ཡང་ཕལ་ཆེར་ཞིག་ཅེས་བརྗོད་པ་ལས་ཁྱབ་པ་གཅོད་ཀི་མེད་ཅིང་། དེ་བས་རྗེ་བླ་མ་ཙོང་ཁ་པ་ཆེན་པོ་ཡང་དེའི་གྲས་སུ་གཏོགས་པ་ཞིག་ཡིན་ཏེ། ཆུང་བཙས་མ་ཁད་ཀྱི་བྱིས་པའི་གནས་སྐབས་དང་། ཕྱིས་དབུས་གཙང་ལ་སླེབས་མ་ཉིད་ནས་རྣམ་དཔྱོད་དང་རིག་སྟོབས་ལ་མ་ལྟོས་པའི་སྐུའི་བརྗིད་དང་ཀུན་སྤྱོད་བཅས། ཕྱིའི་རྣམ་པ་སྤྱོད་སྟངས་སྒོ་ནས་ཀྱང་དབུས་གཙང་གི་ཆེ་རྒུ་ཐམས་ཅད་ཟིལ་གྱིས་མནན་པ་ཞིག་ཏུ་མཐོང་། དེ་ཡང་རྗེ་མཁས་གྲུབ་པའི་<<རྗེའི་རྣམ་ཐར་ཆེན་མོ་དད་པའི་འཇུག་ངོགས་>>ལས། དེ་ཡང་འདི་ཉིད་གང་གི་ཚེ་ཡུམ་གྱི་ལུས་ལས་ཉེ་བར་བལྟམས་པ་དེའི་ཚེ། འདིའི་དབུ་ནི་གདུགས་ལྟ་བུ་དང་། དཔྲལ་བ་དབྱེས་ཆེ་ཞིང་སྨིན་མ་འཇར་ལ་ཤངས་ཀྱི་གཟེངས་མཐོ་བ་དང་། སྙན་ཤལ་རིང་དུ་འཕྱང་ཞིང་ཡན་ལག་དང་ཉིང་ལག་རྒྱས་ལ་དཀུ་སྐབས་ཕྱེད་པ། དབང་པོ་ཡོངས་སུ་གསལ་ཞིང་པགས་པའི་མདོག་ནི་མེ་ཏོག་ཀུ་མུ་ད་ལྟར་དཀར་བས། འཇིག་རྟེན་གྱི་སྐྱེ་བོ་གཞན་དང་མི་མཐུན་པའི་མཚན་གྱི་དཔལ་གྱིས་མཛེས་པ་མིག་གི་བདུད་རྩི་ཞིག་བཙས་ཏེ། ཞེས་ཆུང་བྱིས་པའི་གནས་སྐབས་ཉིད་ནས་གཞོན་ནུ་གསར་ཡག་ཅིག་གི་དབུ་བརྙེས་ཡོད་པ་གསལ། དེ་ནས་སྐུ་བརྗིད་པ་དང་གསུང་བཟང་བ། སྤྱོད་ལམ་གཙང་ཞིང་འགྲོགས་བདེ་བ་སོགས་ནི་རིམ་པར་བསྟན་ཡོང་།pQIརྗེ་ཙོང་ཁ་པའི་དྲ་བ།

   དེ་ཡང་སྔ་འགྱུར་རྙིང་མའི་མཁན་ཆེན། ཟང་ཟང་ནེ་རིང་བ་འཆི་མེད་རབ་རྒྱས་ཀྱི་<<རྗེའི་རྣམ་ཐར་ནོར་བུའི་བང་མཛོད>>ལས། ཕྱོགས་ཀྱི་མི་ཕལ་ཆེ་ཆེ་བའི་སེམས་ལ་རིན་པོ་ཆེ་འདི་ཉིད། རྩ་བའི་ཁམས་པའི་དགེ་བཤེས་ཡིན་པས་ལྟག་ཚུགས་བཟང་བའི་སྟེང་དུ། གོང་མ་མཆོད་ཡོན་སོགས་ཀྱི་འདེགས་བཟང་སྙམ་པ་ལ་ཡང་བརྟེན་ལན་རེ་ལ་རིན་པོ་ཆེའི་དྲུང་དུ་སླེབས་པ་ལྟ་ཅི་སྨོས། བསྐོར་ལམ་གྱི་ཁོངས་སུ་སླེབས་པ་ཙམ་དང་། གཟིམ་ཁང་མཐོང་བ་ཙམ་དང་། སྒོ་ནང་དུ་སླེབས་པ་ཙམ་ལ་འདར་སིག་སིག་ཡོང་བ་དང་འཇིགས་ཞུམ་པ་ཡོང་སོགས། རིན་པོ་ཆེའི་བྱིན་རླབས་ཀྱི་ཟིལ་ལམ། གཟི་བརྗིད་ཀྱི་ཟིལ་ཤིན་ཏུ་ཆེ་བར་ཡོང་བ་ཡིན་པར་འདུག་ཅེས་པ་དང་། འདིའི་གོང་མ་ནི་རྒྱའི་གོང་མ་མིན་པར་བོད་ཀྱི་གོང་མ་སྣེ་གདོང་བ་ཡིན། ཡང་དེར། སྐུ་ལས་ཁམས་བྱང་ཆུབ་ཀྱི་སེམས་ཅུང་ཟད་ཙམ་ཡང་མ་ཉམས་ཤིང་བརྟན་པར་གྱུར་བའི་རྟགས་སུ། སྐུ་གཟུགས་ཤིན་ཏུ་ཆེ་ཞིང་དགུང་ལོ་དྲུག་ཅུ་ཙམ་དུ་ཕེབས་དུས་ཀྱང་། སྐུ་ཉམས་བགྲེས་པའི་རྣམ་པ་ཆེན་པོ་མེད་པར་མ་ཟད་ཅེས་དང་། ཡང་རྗེ་མཁས་གྲུབ་པས་རྗེ་གཟིགས་པ་ལྔ་ལྡན་གྱི་གཟིགས་པ་བཞི་བའི་སྐབས་སུ། རྣལ་འབྱོར་བའི་ཆ་ལུགས་སྐུ་མདོག་དམར་པོ་སྤྱན་དང་ཤངས་ཆེ་བ་ཞིག་གིས་ཞེས་དང་། ཤེལ་དཀར་སྨན་ཁང་བ་ངག་དབང་ཆོས་འཕེལ་ཞུ་བའི་གསུང་བགྲོས་ལ། རྭ་སྒྲེང་དུ་ཕེབས་ལམ་དགའ་ལྡན་དུ་ཕེབས་ནས་སྐུ་གདུང་རིན་པོ་ཆེར་མཇལ་བའི་མཚན་ལམ་དུ། ངོ་མི་ཤེས་པའི་བླ་མ་པཎ་ཞྭ་སྣེ་རིང་ཆོས་གོས་རྣམ་གསུམ་གསོལ་བ་དང་། གཟི་བརྗིད་མི་བཟོད་པ་ཞིག་དང་མཇལ་ཏེ་དམིགས་བརྩེ་མའི་ལས་ཚོགས་འཁོར་ལོའི་གདམས་པ་བསྩལ་ཏོ་ཅེས་པ་སོགས། འདི་དག་ལས་རྗེ་བླ་མ་ནི་སྐུ་བརྗིད་ཤིན་ཏུ་ཆེ་བ་༧པཎ་ཆེན་རིན་པོ་ཆེ་སྐུ་གོང་མ་བཅུ་བ་ཆེན་མོ་དང་འདྲ་བོ་ཞིག་མེད་དམ་སྙམ།pQIརྗེ་ཙོང་ཁ་པའི་དྲ་བ།

   དེ་ནས་གསུང་ཚངས་པའི་དབྱངས་འགག་པ་མེད་པ་ནི། མཁན་ཟང་ཟང་ནེ་རིང་བ་མཆོག་གི་རྗེའི་རྣམ་ཐར་དེ་ཉིད་ལས། ཡང་གསུང་སྐད་ཀྱི་རྩ་བ་ཁམས་སྐད་རེ་གྱོང་ཅིག་ཡོད་ཟེར་ཀྱང་། དབུས་གཙང་དུ་ཕེབས་པ་སོགས་ཀྱིས་རང་ཤུགས་ཡིན་ནམ། གཞན་ལས་གསུང་འཇེབས་ཤིང་གདངས་སྙན་པ་དང་འབོལ་བ་ཞིག་ཡོད་ཟེར། ཡང་ཚོགས་ཆེན་པོར་ཆོས་གསུངས་པ་དང་། གསུང་གི་གདངས་ཤིན་ཏུ་མཐོ་བའི་ངང་ནས་ཚིག་དོན་རྣམས་འཇེབས་པར་གསུངས་པ་ལ་བརྟེན། ཚོགས་ཀྱི་མཐའ་དབུས་གཉིས་ལ་ཁྱད་མེད་པའི་གོ་རིག་དང་ཚོར་རིག་བྱུང་བ་ཡིན་ཅེས་པ་དང་། ཡང་གསུང་སྐད་འཇམ་ཞིང་དེས་པ་དེ་ཉིད་འདྲིས་པ་ལ་བརྟེན། གསུང་ཆོས་གྲོལ་ཕྱིན་ཆད་ལ་ཡང་དགེ་བཤེས་དད་འདུན་ཅན་རྣམས་ཀྱི་སྙན་ཡུལ་དུ་ཞག་དུ་མའི་རིང་ལ་ཡང་། རྗེ་རིན་པོ་ཆེའི་གསུང་སྙན་ཞིང་འཇེབས་པ་དེ་ཉིད་ཀྱི་རྣམ་པ་ལྷང་ལྷང་བ་དང་ཁྲོལ་ཁྲོལ་བ་དང་། ཡང་རིན་པོ་ཆེའི་གསུང་བཟང་ཞིང་གདངས་མཐོ་བ་ལ་བརྟེན། བེར་བེར་བའི་རྣམ་པ་ཅན་འཇགས་པ་ཡོང་ཟེར་བ་ཡང་འདུག ཅེས་པ་རྣམས་ལས་རྗེ་བླ་མའི་གསུང་སྐད་ནི་༧སྐྱབས་མགོན་རིན་པོ་ཆེའི་གསུང་སྐད་ནང་བཞིན་རྩ་བའི་གསུང་སྐད་སྙན་ཞིང་འཇེབས་པ་དང་། དེས་ཤིང་འབོལ་བ་ལ། གདངས་མཐོ་ཞིང་ལྡིར་བའི་རང་བཞིན་ཅན་ཞིག་ཏུ་ཡོད་ངེས་སོ།pQIརྗེ་ཙོང་ཁ་པའི་དྲ་བ།

གཉིས་པ།pQIརྗེ་ཙོང་ཁ་པའི་དྲ་བ།

   དེ་ཡང་ཐུགས་མཁྱེན་པའི་རྣམ་དཔྱོད་དང་། བརྩེ་བའི་སྙིང་རྗེ། རྒྱལ་སྲས་བྱང་ཆུབ་སེམས་དཔའི་མཛད་སྤྱོད་བཅས་ནི་རྗེའི་རྣམ་ཐར་སྤྱི་དང་། ཁྱད་པར་གསུང་གི་འཕྲིན་ལས་གསུང་རབ་པོད་ཆེན་བཅོ་བརྒྱད་ཀྱི་བདག་ཉིད་ཅན་ནས་བསྙོན་མི་ནུས་པར་གསལ་ཞིང་རྫོགས་པར་བསྟན་ནས་ཡོང་བ་ཡིན། ཡིན་ནའང་། ཕྱིའི་ཀུན་སྤྱོད་དང་གཤིས་རྒྱུད་ཟུར་ཏུ་བཏོན་པ་མི་སྣང་བས་དེའི་ཚུལ་ཡང་། གོང་དུ་མཁན་ཟང་ཟང་ནེ་རིང་བ་མཆོག་གིས་སྐུ་བརྗིད་པའི་ཁྱད་ཆོས་བརྗོད་པའི་འཕྲོ་དེར། ཡང་རིན་པོ་ཆེ་རང་གི་དྲུང་དུ་སླེབས་ཏེ་བཀའ་ལུང་གནང་བའམ་བརྡ་སྤྲོད་ལེགས་པོ་མཛད་པའི་རྗེས་སུ། མི་དྲག་ཞན་ཕལ་མོ་ཆེ་དད་པ་རང་དབང་མེད་པར་སྐྱེ་བ་དང་། བློ་བག་ཕབ་པ་དང་ཁྱད་པར་དེ་ཕྱིན་སྐུ་དྲུང་དུ་སྡོད་སྙིང་འདོད་པ་དང་། གཞན་དུ་འགྲོ་སྙིང་མི་འདོད་པ་སོགས་ཡོང་ཟེར་ལ་ཞེས་དང་། དེ་ཡང་མཚན་ཉིད་ཀྱི་ཡོན་ཏན་འཛིན་པ་ལ། སློབ་དཔོན་དཀའ་བཅུ་བ་ཞེས་པ་དང་། སློབ་དཔོན་དཀའ་བཞི་བ་ཞེས་སོགས་ཀྱི་བསྔགས་ཚིག་སྐབས་དང་མཐུན་པར་གསུངས་པ་དང་། དགོན་པ་ལ་བརྟེན་པའི་བཙུན་པ་མཚན་ཉིད་ཀྱི་ཡོན་ཏན་མེད་པ་སྔགས་ཕྱོགས་ཅུང་ཟད་ཤེས་པ་ལ་ཡང་། བླ་མ་པ་དང་། དགེ་བཤེས་པ་སོགས་ཀྱི་སྙན་ཚིག་དང་བཅས་པ་ནས་གསུངས་པ་ཡིན་ཟེར་བ་ལ་ཞེས་དང་། ཡང་མདོ་སྔགས་ཀྱི་ཚིག་དོན་ལ་མ་བདེ་བ་ཆེན་པོ་བྱུང་བ་དང་། ཉམས་རྟོགས་ལ་ཐེ་ཚོམ་དང་དོགས་པ་བྱུང་བ་རྣམས་ཀྱི་དྲི་བ་ཆེ་ཆུང་ཅི་ཞུས་ཀྱང་། ཁྱད་གསོད་སོགས་མི་མཛད་ཅིང་། ཁྱེད་རྣམ་པའི་གོ་རྟོགས་དེ་ཚོ་དང་། དྲི་བ་དེ་ཚོ་དགའ་ཚད་ཡིན་དགའ་ཚད་ཡིན་ཅེས་པ་དང་། ང་ལའང་བཤད་རྒྱུ་ཡོད་བཤད་རྒྱུ་ཡོད་ཅེས་པ་སོགས་གསུང་ཞིང་རང་རང་གི་མ་བདེ་བ་དང་། དོགས་པ་རྣམས་སེལ་ངེས་ཀྱི་ལེགས་བཤད་དང་། བཀའ་ལུང་གནང་བ་ལ་བརྟེན་ནས་མི་ཐ་མལ་པའམ། བློ་ཆུང་རྣམས་ཀྱང་ཡ་ང་བ་དང་བག་ཚ་བ་སེལ་ཞིང་། སེམས་སྤྲོ་བར་འགྱུར་བ་དང་། ཞེས་སོགས་གསུངས་པས་ནི། རང་རེ་རྣམས་ལ་དེའི་ཐད་རྒྱལ་ཁྲིམས་བཟོས་ཀྱང་ཡོང་ཐབས་མེད་པའི་ཕྱིའི་ཀུན་སྤྱོད་ཀྱི་སྡོམ་ཞིག་བརྒྱབ་འདུག་གོ།pQIརྗེ་ཙོང་ཁ་པའི་དྲ་བ།

   ད་དུང་རྗེ་བླ་མ་ནི་ཁོང་རྣམ་པ་ཤིན་ཏུ་གཙང་ཞིང་གྲ་དག་ཅིག་ཡོད་པའང་། མཁན་ཟང་ཟང་ནེ་རིང་བ་མཆོག་གིས། སྐུ་ལས་འོད་ཟེར་ཤིན་ཏུ་ཆེ་བ་ཡོད་པ་དང་། ཚུལ་ཁྲིམས་ཀྱི་དྲི་ཤིན་ཏུ་ཞིམ་པ་རིང་དུ་ཡང་འཕྲོ་བ་དང་། མནབ་བཟའ་དང་ཕྱག་ཕྲེང་སོགས་ལ་ཡང་མི་གཞན་ལྟ་བུའི་དྲི་མ་ནག་ཁལ་ཁལ་དེ་འདྲ་ཡེ་མི་ཆགས་པ་ཡིན་ཟེར་ཞེས་གསུངས་སོ།pQIརྗེ་ཙོང་ཁ་པའི་དྲ་བ།

                 གསུམ་པ།pQIརྗེ་ཙོང་ཁ་པའི་དྲ་བ།

   ཁྱད་པར་བླ་མ་བཀའ་དྲིན་ཅན་འདི་ཆུང་གཞོན་ནུའི་དུས་ནས་(༡) གཤིས་ཀ་དྲང་མོ་འགྲོགས་བདེ་བོ་དང་། (༢) ཁ་རུ་ཁ་ཐུག་མངོན་ལྐོག་མེད་པ་ཞིག་ཡོད་པ་ནི། (༡) དེ་ཡང་རྗེའི་དངོས་སློབ་འཇམ་དབྱངས་ཁ་ཆེ་བའི་<<རྗེའི་བསྟོད་པ་ཙོང་ཁ་བརྒྱད་ཅུ་>>ལས། གྲོགས་འགའི་སྟོབས་ཀྱིས་སྐྱིད་ཤོད་གུང་ཐང་དུ།། གསོ་བ་རིག་པའི་སློབ་གཉེར་མཛད་པའི་ཚེ།། རིང་པོར་མི་ཐོགས་འབད་པ་ཆུང་ངུ་ཡིས། འཚོ་བྱེད་གོ་འཕང་བརྙེས་པའི་ཙོང་ཁ་བ།།ཞེས་པ་དང་། རྗེ་མཁས་གྲུབ་པའི་<<དད་པའི་འཇུག་ངོགས་>>ལས་ཀྱང་། གླང་ལོ་སྟོན་གྱི་དུས་འབྲི་གུང་དཔལ་གྱི་ནགས་ཁྲོད་དུ་ཕེབས། དེའི་ཚེ་འབྲི་གུང་སྤྱན་སྔ་རིན་པོ་ཆེ་ཆོས་ཀྱི་རྒྱལ་བོ་བཞུགས་པས། ཁོང་གི་སྤྱན་སྔར་མཇལ་ཐེག་ཆེན་སེམས་བསྐྱེད་ཀྱི་ཆོ་ག་དང་། ཕྱག་ཆེན་ལྔ་ལྡན་ལ་སོགས་པ་གསན། དེ་ནས་སློབ་གཉེར་ཞིག་ལ་འབྱོན་པར་བཞེད་པ་ལ། གྲོགས་འགའ་ཞིག་གིས་དབང་མེད་དུ་ཁྲིད་ནས་མི་འདོད་བཞིན་དུ་། ཚལ་བའི་སྨན་པ་མཁས་པ་དཀོན་མཆོག་སྐྱབས་ཞེས་བྱ་བའི་གམ་དུ་བྱོན་ནས་གསོ་དཔྱད་ཀྱི་གཞུང་ལ་སྦྱངས་ཤིང་། ཡན་ལག་བརྒྱད་པ་ཐུགས་ལ་བཟུང་བ་དང་། དེར་ཡུན་ཧ་ཅང་མི་རིང་བ་ཞིག་བཞུགས་ནས་ཆོས་གྲྭ་ཆེན་པོ་བདེ་བ་ཅན་དུ་བྱོན། ཅེས་པ་གཉིས་ལས་གྲོགས་འགའི་སྟོབས་དང་གྲོགས་འགའི་དབང་གིས་གསུངས་འདུག་པ་དང་། pQIརྗེ་ཙོང་ཁ་པའི་དྲ་བ།

དགུང་ལོ་བཅུ་དགུའི་སྟེང་དུ་གསང་ཕུ་དང་བདེ་བ་ཅན་ལ་སོགས་པ་རྣམས་སུ་གྲྭ་སྐོར་ལ་བྱོན། བློ་གྲོས་དང་ཆོས་སྐད་ཕུན་སུམ་ཚོགས་པའི་སྙན་པ་རིང་དུ་སོང་ཞིང་། བཤེས་གཉེན་མཁས་པ་དག་གི་ཡིད་ཀྱི་དབང་བོ་རྣམ་པར་དཔྱོད་པའི་ལྕགས་ཀྱུས་དྲངས་པར་གྱུར་ཏོ། དེ་ནས་གཙང་ཕྱོགས་ལ་འབྱོན་པར་བཞེད་དེ་རིན་སྤུངས་ཀྱི་རོང་ཆེ་བ་ལ་མཛད། གཞུང་ལམ་བསྲངས་ནས་ས་སྐྱ་ལ་འབྱོན་བཞེད་པ་ལ་ལམ་གྲོགས་ཇོ་གདན་པ་ཞིག་ཡོད་པའི་སྟབས་ཀྱིས། རིན་སྤུངས་ཀྱི་རྒྱང་མཁར་ཕུའི་ལ་ལ་བྱོན། ཉང་སྟོད་མཁར་ཁ་ལ་མཛད་ནས་ཞྭ་ལུར་ཕེབས། ཅེས་པར་གྲོགས་ཇོ་གདན་པ་ཞིག་ཡོད་པའི་སྟབས་ཀྱིས་གསུངས་པ་དང་།pQIརྗེ་ཙོང་ཁ་པའི་དྲ་བ།

      རྫོང་ཆི་གྲགས་པ་རིན་ཆེན་པ་དེ་རྗེ་འདི་བ་ལ་དེ་གོང་ནས་མི་ཕྱེད་པའི་དད་པ་ཡོད་པས། སྔ་ཕྱིར་གསོལ་བ་མང་དུ་བཏབ་པ་ལ་དགོངས་ནས་ཡར་ལུང་ཕྱོགས་ལ་འབྱོན་པར་བཞེད་དེ་སྲིན་པོ་རིར་ཕེབས་པ་ན། དེ་དུས་གོང་དཀར་ན་སྒོམ་པ་ཆོས་རྒྱལ་ཡོད་པ། ཁོང་ཡང་རྗེ་འདི་བ་ལ་སྙིང་ནས་དད་པ་ཡོད་པའི་དབང་གིས་ཞུ་བ་ནན་ཆེར་ཕུལ་ཏེ། སོས་དེ་རིགས་ལྔ་ལྷ་ཁང་དུ་བཞུགས་དགོས་བྱུང་བ་དང་།pQIརྗེ་ཙོང་ཁ་པའི་དྲ་བ།

   དེ་ནས་དགུན་མོན་མཁར་བཀྲ་ཤིས་གདོང་དུ་བཞུགས། དེ་དུས་ནུབ་ཅིག་ཞུགས་མེ་ལ་བཞུགས་ནས་བོད་ཀྱི་མཁས་གྲུབ་རྣམས་ཀྱི་རྣམ་པར་ཐར་བ་ཅི་རིགས་པ་གསུང་བའི་སྐབས་སུ། དཀའ་བཞི་བ་ཤེར་སེང་གིས་ཆོས་ཐོག་གཅིག་ལ་པོ་ཏི་བཅུ་གཅིག་གསུངས་འདུག དུས་ཕྱིས་བོད་དུ་པོ་ཏི་དུས་གཅིག་ལ་གསུངས་པ་དེ་མང་ཤོས་སུ་འོང་བ་འདྲ་གསུང་། དེ་ནས་དགེ་བཤེས་ཤ་སྟོན་ལ་སོགས་པས་འདི་ནས་ཀྱང་དེ་ཙམ་ཞིག་དུས་གཅིག་ཏུ་གསུང་འཚལ་ཞུས་པས། རྩོལ་བ་བྱས་ན་དེ་ཙམ་ཞིག་འཆད་ཐུབ་པ་འདྲ་གསུངས། འོ་ན་ཅིས་ཀྱང་གསུང་འཚལ་ཞེས་ནན་གྱི་གསོལ་བ་བཏབ་པས་ཞལ་གྱིས་བཞེས་ཏེ། ཚེས་ལྔ་ནས་ཉི་མ་གཅིག་ལ་རྒྱ་གར་སྐད་བཅོ་ལྔའི་དབུ་དུས་གཅིག་ཏུ་བཙུགས་ནས། ཉིན་རེ་ཞིང་ཐོ་རངས་ནས་སྲོད་ཀྱི་བར་ཆོས་ཐུན་བཅོ་ལྔ་རེ་མ་ཆག་པར་ཐུགས་བཤད་མཛད། སྤྱོད་འཇུག་བཅས་སྟེ་བསྟན་བཅོས་བཅུ་བདུན་གྱི་བཤད་པ་ཕྲ་རགས་མ་ལུས་པ་ལ། བཤད་པ་ཞིབ་པར་མཛད་དེ་ཟླ་བ་གསུམ་ལ་རྫོགས་པར་མཛད། ཅེས་པའི་དགེ་བཤེས་ཤ་སྟོན་སོགས་ཀྱིས་ཚོད་བགམ་པ་ལྟ་བུའི་རྣམ་ཐར་བཅས། རྗེ་བླ་མ་ནི་བླ་མ་དགེ་བཤེས་ཙམ་མ་ཟད། རང་གི་ཆོས་གྲོགས་ལམ་གྲོགས་ཚུན་ཆད་ཀྱི་ངོ་མི་གཅོག་པའི་མཛད་སྤྱོད་ངང་ཚུལ་ཅན། རྒྱུན་ཏུ་ཁེ་ཆུང་དང་དམན་ས་ཁོ་ན་འཛིན་པ་ཞིག་ཏུ་མངོན་ནོ།pQIརྗེ་ཙོང་ཁ་པའི་དྲ་བ།

   དེ་ཡང་རིན་པོ་ཆེ་འདི་(༢) ཁ་རུ་ཁ་ཐུག་མངོན་ལྐོག་མེད་པ་ནི། ཡང་རྗེ་མཁས་གྲུབ་པའི་དད་པའི་འཇུག་ངོགས་ལས། རྗེ་བཙུན་རེད་མདའ་བ་དབྱར་དེ་ས་སྐྱ་ནས་རྩེ་ཆེན་ན་ཕེབས་འདུག་པ་ལ་མངོན་པ་མཛོད་ཀྱི་རང་འགྲེལ་གྱི་སྟེང་ནས་མཛུབ་ཁྲིད་དུ་མཛད་དེ་གསན་པས། གཞུང་གི་ཚིག་རིས་ཙམ་ལ་བརྟེན་པ་མ་ཡིན་པར། བསྟན་བཅོས་ཀྱི་ལུས་ཡོངས་སུ་རྫོགས་པའི་དོན་གྱི་ཁོག་ལེགས་པར་བསྒྲིགས་ནས་འགངས་འཆུན་པའི་གོ་བ་བོགས་ཆོད་དུ་སྟེར་ནུས་པ་ཞིག་འདུག་པས་དད་པ་ཆེན་པོ་འཁྲུངས། གང་གསུང་ཐམས་ཅད་ལན་རེ་ཁོ་ནས་ཚིག་དོན་ལྷག་མ་མེད་པར་ཐུགས་སུ་ཆུད་ཅིང་། དཀའ་བའི་གནད་རྣམས་ལ་དྲི་གཏུགས་ལེགས་པར་མཛད་པས། རྗེ་བཙུན་པ་ཡང་ཤིན་ཏུ་ཐུགས་འཕྲོགས་པར་གྱུར་ཏེ། ཁྱེད་ལ་མཛུབ་ཁྲིད་བྱེད་པ་ལ་ལེགས་པར་བསྒྲིམ་དགོས་པ་འདུག་ཅེས་གསུངས་པ་དང་། ཡང་རྗེ་རིན་པོ་ཆེ་འདིས་བླ་མ་རྗེ་བཙུན་རེད་མདའ་བའི་ཞལ་སྔ་ནས་ལ། རྒྱུད་ཀྱི་རྒྱལ་པོ་དཔལ་གསང་བ་འདུས་པའི་རྩ་རྒྱུད་ཀྱི་བཤད་པ་ཚར་གཅིག་གསན། དེ་དུས་རྗེ་བཙུན་པའི་ཞལ་སྔ་ནས། སྔགས་ཀྱི་རྩད་གཅོད་དེ་ཙམ་མཛད་པ་ལ་ཡུན་རིངའགྱང་། ད་ལྟ་སྡེ་སྣོད་ཀྱི་བཤད་པས་ཕན་ཐོགས་རྒྱ་ཆེན་པོ་འོང་གིན་འདུག་པས། རེ་ཞིག་བཤད་པ་མཛད་པ་མི་འཐད་དམ་ཞེས་གསུངས་པ་ལ། བདག་སྔགས་ཀྱི་ཕྱོགས་ལ་འདུན་པ་དྲག་པོ་བདོག་པས་སྔོན་ལ་སྔགས་ཕྱོགས་ཀྱི་རྩད་གཅོད་བགྱིད་པ་ལགས་ཞེས་ཞུས་གསུང་པ་གཉིས་ལས། ཁོང་གི་ཁ་རུ་ཁ་ཐུག་གི་དྲི་གཏུགས་ནན་མོ་དང་། ཐུགས་བཞེད་དགོངས་འཆར་ངོ་འཛིན་དང་མངོན་ལྐོག་མེད་པར་ཐད་གར་དྲང་བོ་གསུངས་པའི་ཐུགས་གཤིས་གཉིས་གོ་ཡོང་བ་ཡིན།pQIརྗེ་ཙོང་ཁ་པའི་དྲ་བ།

བཞི་བ།pQIརྗེ་ཙོང་ཁ་པའི་དྲ་བ།

   དེ་བས་ཀྱང་རྗེ་བླ་མ་མཚུངས་པ་མེད་པ་འདི་ནི། <<ཡཱུ་ཀོང་གིས་རི་བོ་སྤོ་བ་>>ཞེས་པའི་རྒྱ་ནག་གི་ལེགས་བཤད་གཏའ་གཏམ་མིང་གྲག་ཅན་ཅིག་ཡོད་པ་དེའི་དོན་སྙིང་དང་འདྲ་བོ། ཁྲོ་ལྕགས་ཀྱི་ཕ་བོང་ཞིག་ལ་མི་སྐད་ལབ་པར་བྱ་དགོས་ཐུག་ཀྱང་བྱ་ཐུབ་པའི། དྲང་ཚུགས་བརྟན་པོ་དང་། དཔའ་ཞིང་སྲན་ཚུགས་པ། གང་ལའང་འཇིགས་ཞུམ་མ་མཆིས་པ་ཞིག་ཡོད་པ་ནི། རྗེ་མཁས་གྲུབ་པའི་དད་པའི་འཇུག་ངོགས་ལས། དེ་ཡང་ཆོས་རྗེ་དེའི་དྲུང་དུ་ཐོག་མར་ཕེབས་མ་ཁད་ནས། གསུང་རབ་ཀློག་པ་པོ་མང་དུ་འདུག་པ་རྣམས་གཟིགས་ཤིང་ཐུགས་ཀྱི་དཔྱད་པས། དེ་ཙམ་གྱིས་ཀློག་རང་ཉིད་ཀྱིས་ཐོགས་མེད་དུ་འདོན་པར་ནུས་པ་བྱུང་ཞིང་ཆེད་དུ་གཏད་ནས་བསླབ་དགོས་པ་མ་བྱུང་། དབང་ཐོབ་ནས་རབ་ཏུ་མ་བྱུང་གོང་དགུང་ལོ་བདུན་དུ་ཉེ་བ་ཙམ་གྱི་དུས་ཉིད་དུའང་། བདེ་མཆོག དགྱེས་རྡོར ཀུན་རིག གཤིན་རྗེའི་གཤེད་ལ་སོགས་པའི་དཀྱིལ་ཆོག་མང་པོ་ཐུགས་ལ་བཟུང་། བདེ་མཆོག་དྲིལ་བུ་བའི་བདག་འཇུག་ཀྱང་ལན་མང་དུ་མཛད་ཅིང་། ལྷའི་རྣལ་འབྱོར་དང་བཟླས་པའི་རིམ་པ་ལ་སོགས་པ་ལ་གཅིག་ཏུ་གཞོལ་བར་མཛད་པ་ཡིན་གསུང་ཞེས་པ་དང་།pQIརྗེ་ཙོང་ཁ་པའི་དྲ་བ།

   དེ་ནས་དབུས་གཙང་དུ་སློབ་གཉེར་དུ་ཕེབས་པར་ཡང་དེ་ཉིད་ལས། དེ་ལྟར་དགུང་ལོ་བཅུ་དྲུག་པའི་ཚེ། བླ་མའི་བཀས་ཀྱང་བསྐུལ་ཞིང་། བདག་ཉིད་ཀྱང་སྤྲོ་ཤུགས་དྲག་པོས་དབུས་གཙང་གི་ཕྱོགས་ལ་འབྱོན་པར་བརྩམས་ཤིང་ཞེས་དང་། དེའི་ཚུལ་ཆ་ཧར་བ་བློ་བཟང་ཚུལ་ཁྲིམས་ཀྱི་<<རྗེའི་རྣམ་ཐར་བདེ་ལེགས་ཀུན་འབྱུང་>>ལས་ཀྱང་། ད་ལྟ་ཡང་བསྟན་པའི་རྒྱུན་ཅུང་ཟད་གནས་པའི་ཡུལ་གྱི་མཆོག་ཏུ་གྱུར་པ་ནི་དབུས་གཙང་གི་གནས་དེ་ཡིན་པས། ཕྱོགས་དེའི་དགོན་སྡེ་རྣམས་སུ་སློབ་གཉེར་ལ་འགྲོ་བར་བྱ་སྙམ་པའི་བཞེད་པ་རྒྱུན་ཏུ་འཁྲུངས་ཤིང་། དམ་པའི་ཆོས་འཚོལ་བ་ལ་དཔའ་ཞིང་བརྟུལ་ཕོད་པ་བྱང་ཆུབ་སེམས་དཔའ་རྟག་ཏུ་ངུ་ལྟར། ཡུལ་ཐག་རིང་པ་དང་བགྲོད་དཀའ་བས་ངལ་དུབ་འབྱུང་བ་སོགས་ལ་ཅུང་ཟད་ཀྱང་མི་བལྟ་བར་ཡོན་ཏན་སློབ་པ་ཁོ་ན་ལ་ཐུགས་གཞོལ་བར་གྱུར་ཏོ་ཞེས་པ་ནི་དམ་པ་འདིའི་ངང་ཚུལ་ཁོ་ནའོ།pQIརྗེ་ཙོང་ཁ་པའི་དྲ་བ།

   དབུས་གཙང་དུ་སླེབས་ནས་ཐོས་བསམ་སློབ་གཉེར་གྱི་གནས་སྐབས་སུའང་། <<དད་པའི་འཇུག་ངོགས་>>ལས། དེ་ཡང་དེའི་ཚེ་འཕགས་པ་ཀླུ་སྒྲུབ་ཡབ་སྲས་ཀྱི་དགོངས་པ་མཐར་ཐུག་པའི་ལྟ་བ་དང་། གསང་བ་འདུས་པའི་ལམ་རིམ་པ་ལྔ། དེའི་ནང་ནས་ཀྱང་སྒྱུ་ལུས་འདི་ཤིན་ཏུ་རྟོགས་དཀའ་བ་དང་། རྟོགས་ན་དོན་ཆེ་ཞིང་མ་རྟོགས་ན་ནི་ལོག་པར་ལྟུང་བའི་གཡང་སའང་ཤིན་ཏུ་ཆེ་ལ། དེ་ཁོ་ན་ཉིད་བསྒོམ་པ་དང་། སྔགས་བླ་མེད་ཀྱི་ལམ་ལ་བརྟེན་ནས་སངས་རྒྱས་འཚོལ་བ་སོགས་ཚིག་ཙམ་དུ་འགྱུར་བར་དགོངས་ཏེ། འདི་དག་མགོན་པོ་ཀླུ་སྒྲུབ་ཡབ་སྲས་ཀྱི་དགོངས་པ་བཞིན་འཁྲུལ་མེད་དུ་སྟོན་པའི་བཤེས་གཉེན་དམ་པ་རྒྱ་བོད་བལ་གསུམ། དབུས་གཙང་ཁམས་གསུམ་སོགས་གང་ན་ཡོད་ཀྱང་དེའི་ཁུངས་ཤིག་རྙེད་ན་ནི། དེ་འཚོལ་བའི་ཕྱིར་དུ་ལུས་སྲོག་ཐེད་ལ་བོར་ནས་དཀའ་བ་ཅི་བྱུང་ཡང་དང་དུ་བླངས་ཏེ། ད་ལྟ་ཉིད་དུའང་འགྲོ་དགོས་དགོངས་པ་སྙིང་ནས་ཤུགས་དྲག་པོ་དེའི་ཚེ་ཡོད་ཅེས་རྗེ་ཉིད་གསུང་ངོ་ཞེས་དང་།pQIརྗེ་ཙོང་ཁ་པའི་དྲ་བ།

   རྗེའི་ཞལ་ནས་ང་ལ་སྔགས་ཀྱི་ཕྱོགས་ལ་གཞན་གྱིས་བསྐུལ་དགོས་པ་མེད། ཆུང་ངུ་ནས་འདི་ལ་ཤེས་འདོད་དྲག་པོ་ཡོད་ཅིང་། དེ་ཡང་རྒྱུད་སྡེ་མཐའ་དག་ཡོངས་སུ་རྫོགས་པར་བསླབ་དགོས་སྙམ་པ་ཞིག་དང་པོ་ནས་ཡོད་ལ་ཅེས་གསུང་ངོ་ཞེས་དང་།pQIརྗེ་ཙོང་ཁ་པའི་དྲ་བ།

   ཡང་རྗེ་ཉིད་ཀྱི་ཞལ་ནས། ཇི་འདྲ་བ་རྟོགས་དཀའ་བ་ཞིག་ཡིན་ནའང་། ཐོག་མར་རིགས་པས་ཞིབ་ཏུ་དཔྱད་པས་ཕལ་ཆེར་དགོངས་འོང་། དེ་ལྟར་མཛད་ཀྱང་ཐུགས་ངེས་མཐའ་ཆོད་པ་འདྲེན་མ་ཐུབ་པ་རྣམས་ལ། བླ་མ་དང་རྗེ་བཙུན་འཇམ་པའི་དབྱངས་ཐ་མི་དད་ལ་གསོལ་བ་དྲག་ཏུ་བཏབ་ཅིང་མཎྜལ་ཕུལ་བས། དེ་མ་ཁད་འབད་མེད་དུ་དཔྱིས་ཕྱིན་པར་དགོངས་ནས་འོང་བ་བསྙོན་མི་ནུས་པར་ཡོད་ལ་ཞེས་སོགས་གསུངས་པ་རྣམས་ལས། རྗེ་བླ་མ་ནི་ཐོས་བསམ་སློབ་གཉེར་སྤྱི་དང་། ཁྱད་པར་དུ་བསྟན་པ་དང་འགྲོ་བའི་དོན་ཁོ་ན་ལ་དམིགས་པའི་བློ་སྟོབས་དང་ཐུགས་བསྐྱེད་ཇི་འདྲ་མཆིས། ཚིག་གི་ལམ་ནས་ཇི་བཞིན་བརྗོད་མི་ནུས་ཤིང་མི་ཤེས་པར་གདའ་འོ། གོང་དུ་དྲངས་ཟིན་དང་ཕྱིས་དྲང་འགྱུར་གྱི་ལུང་ཚིག་དུ་མ་དང་རྣམ་ཐར་དག་ལས། བླ་མ་མཚུངས་པ་མེད་པ་འདིའི་ཐུན་མོང་མ་ཡིན་པའི་གནས་རོལ་ཙམ་དང་། ཁོང་གི་ཞུམ་མེད་ཀྱི་བློ་སྟོབས་དང་ལྷད་མེད་ཀྱི་ཐུགས་གཤིས་སོགས། རྒྱུས་ལོན་དང་ཤེས་རྟོགས་ཡོང་བ་ལ་མིག་ཆེན་ལ་གཟིགས་ཆེན་བསྟན་པ་ནང་བཞིན་ཡོད་པས། དེ་ཡང་བྱིན་རླབས་ཀྱི་ཚན་ཁའི་ཁྱད་དང་ཁུངས་བཙུན་བློ་གཏོད་ཕེར་བར་རྗེ་མཁས་གྲུབ་པའི་རྗེའི་རྣམ་ཐར་ཆེན་མོ་རྩ་འཛིན་གང་ཐུབ་བྱས་ཡོད། pQIརྗེ་ཙོང་ཁ་པའི་དྲ་བ།

    ལྔ་བ།pQIརྗེ་ཙོང་ཁ་པའི་དྲ་བ།

      ད་ནི་གལ་བོ་ཆེ་ལ་ནན་ཏན་གྱི་མིག་འབྱེད་པ་ཞིག་ལ་ནི། ཕྱི་རབས་ནས་མི་རབས་རབས་ལ་རྗེ་བླ་མ་ཙོང་ཁ་པ་ཆེན་པོ་ཞུ་བ་དེ། དོན་དམ་པར་སྐྱེས་བུ་ཆེན་པོ་ཇི་འདྲ་བ་ཞིག་ཡོད་ཀྱི་ངེས་ཤེས་ཟབ་མོ་འབྱུང་བ་དང་། རྩོམ་པ་འདིའང་མཐར་ཕྱིན་པའི་ཡན་ལག་ཏུ་དོན་གྱི་གནད་གསུམ་དུ་དྲིལ་བའི་སྡོམ་ཞིག་བརྒྱབ་པ་ཡིན་ན། ཆ་ཧར་བློ་བཟང་ཚུལ་ཁྲིམས་པའི་<<རྗེའི་རྣམ་ཐར་བདེ་ལེགས་ཀུན་འབྱུང་>>ལས། རྗེ་བཙུན་རེད་མདའ་བ་ཆེན་པོ་མངའ་རིས་ནས་དགའ་བ་གདོང་དུ་ཕེབས། རྗེ་རིན་པོ་ཆེ་དཔོན་སློབ་ཆེས་མང་པོས་སེར་སྦྲེང་སོགས་བཀུར་སྟི་ཆེན་པོས་བསུས། རྗེ་འདིས་ཕྱག་མཛད་པ་ལ་རེད་མདའ་བས་ཀྱང་ཕྱག་ལན་གནང་། དེ་ལ་རྗེས་ཕྱག་མི་གནང་བ་ནན་གྱིས་ཞུས་ནས་ཕྱག་བཟློག་ཅེས་བླ་མའི་ཡང་བླ་མར་གྱུར་བའི་རྣམ་ཐར་ཏེ། དེ་ཡང་རྗེ་མཁས་གྲུབ་པའི་<<རྗེའི་རྣམ་ཐར་དད་པའི་འཇུག་ངོགས་>>ལས། དེ་ཡང་ཁོ་བོ་ལ་གཞན་གྱིས་སྟན་བཟང་བོ་བཤམས་པ་དང་། གུས་པའི་བསྙེན་བཀུར་སོགས་ཅི་ཙམ་བྱས་པ་དེ་ཙམ་གྱིས་ཆེད་དུ་བསམ་མི་དགོས་པར་དུས་དེའི་གནས་སྐབས་རང་དུ། འདི་ཐམས་ཅད་མི་རྟག་ཅིང་ཡིད་བརྟན་ཏུ་མི་རུང་བ། སྒྱུ་མའི་བློ་བྲིད་དང་འདྲ་བ་ཡིན་སྙམ་པའི་སྐྱོ་བ་ཤུགས་དྲག་པོ་སྣང་བ་བུན་ལོང་དུ་ཐོངས་པ། ཡིད་གཏིང་ནས་འགྱུར་བ་རྒྱུན་རིང་པོ་རེ་སྐྱེ་བ་ཞིག་དང་པོ་ཉིད་ནས་རང་ཆས་སུ་ཡོད་པ་ཡིན་ཞེས་གསུང་ཞེས་དང་། གཞན་ཡང་རྗེ་བཙུན་འཇམ་པའི་དབྱངས་ཀྱི་སྐུ་དང་གསུང་གི་སྣང་བ་སོགས་ཀྱི་རྣམ་པར་ཐར་བ་ཞིབ་པར་ནི་དངོས་སུ་ཡོངས་ལ་བསྒྲག་པར་མི་ནུས་མོད། འོན་ཀྱང་གསུང་རབ་ཀྱི་དོན་ལ་ཚུལ་ཇི་ལྟར་དཔྱོད། དཔྱད་པ་རྫོགས་མ་རྫོགས་ཉམས་ལེན་གྱི་གནད། གདུལ་བྱ་ཇི་ལྟར་བཀྲི། འཁོར་ཇི་ལྟ་བུར་བསྟེན། གནས་ཇི་ལྟ་བུར་བཞུགས་པ་སོགས་ཕལ་ཆེར་རང་བཟོས་ཞུགས་པ་མ་བྱས་ཞེས་གསུང་ངོ་ཞེས་པ་དང་། གསུང་བགྲོས་འདི་བཞིན་རྗེ་ནས་བླ་མ་དབུ་མ་བར་སྤྲིངས་པའི་གསུང་འཕྲིན་ལས་ཀྱང་འདུག ཡང་དེ་ནས་གདན་ས་ཐེལ་དུ་བྱོན། སྤྱན་སྔ་རིན་པོ་ཆེ་གྲགས་པ་བྱང་ཆུབ་པའི་དྲུང་དུ་མཇལ། ལེགས་བཤད་ཀྱི་སྐྱེས་ཕུལ་ཞིང་དམ་པའི་ཆོས་ཀྱི་བཀའ་མཆིད་མཛད་པས་ཆོས་རྗེ་སྤྱན་སྔ་བ་དད་པའི་ཤུགས་ཀྱིས་སྤྱན་ཆབ་བྱུང་། ཕྱིས་ཀྱང་དྲུང་ན་འཁོད་པ་དག་དང་ཕེབས་པའི་མཆིད་གླེང་བ་ན། སྐུ་ན་གཞོན་ནུ་འདི་འདྲ་བ་ལའང་ཡོན་ཏན་གྱི་གཏེར་ཆེན་པོ་འདི་ལྟ་བུ་འདུག་ན། ཁོ་བོའི་སྐྱེ་བ་འདི་འདྲ་བ་ཞེས་ཐུགས་ཕྱུང་བའི་གསུང་ཡང་ཡང་འབྱོན་པའི་གཏམ་གླེང་བར་གྲག་གོ་ཞེས། དེ་དུས་རྗེ་བླ་མ་དགུང་ལོ་ཉེར་ལྔ་ཙམ་ཡིན་ཚོད་ཡོད།pQIརྗེ་ཙོང་ཁ་པའི་དྲ་བ།

   དེ་ལྟར་དང་པོ་ཉིད་ནས་རང་ཆས་སུ་ལོག་འཚོ་དང་ངོ་སྲུང་ལ་སོགས་པའི་ཆོས་བརྒྱད་ཀྱི་རྫབ་རྔམ་པོ་ཆེ་ལས་གཏན་ལོག་པའི་རྣམ་ཐར་གྱི་གནད་དང་། གཉིས་པ་རྗེ་བླ་མའི་རྣམ་ཐར་ཉིད་ནི་རྗེ་བཙུན་འཇམ་པའི་དབྱངས་ཀྱི་རྣམ་ཐར་ཡིན་པའི་གནད་དང་། གསུམ་པ་དེ་དུས་བོད་ན་རིགས་དང་ལུང་རྟོགས་ཀྱི་ཡོན་ཏན་གང་ཅིའི་ཆ་ནས་འགྲན་པའི་ཟླ་ཐམས་ཅན་དང་བྲལ་བའི་སྤྱན་སྔ་བ་གྲགས་པ་བྱང་ཆུབ་བ་ལྟ་བུའང་། ཁོང་གི་མཁས་བཙུན་བཟང་གསུམ་གྱི་ཡོན་ཏན་གྱིས་ཐུགས་འཕྲོགས་ཏེ། དད་པའི་ཤུགས་ཀྱིས་སྤྱན་ཆབ་བྱུང་ཞིང་ཐུགས་ཕྱུང་བའི་མཐོང་དང་གདེང་འཇོག་གི་ཆེ་བའི་གནད་བཅས། རྗེ་བླ་མ་འདིའི་རྣམ་པར་ཐར་བ་རྣམས་ནི་དོན་གྱི་གནད་འདི་གསུམ་ལྡན་དུ་ཡོད་པ་ཀུན་ལ་གོ་བར་བྱ་ཞིངའཕྲོད་པར་གྱིས།pQIརྗེ་ཙོང་ཁ་པའི་དྲ་བ།

   དེ་ཕྱིར་དེ་ལྟ་བུའི་སྐྱེས་བུ་རླབས་ཆེ་ཞིང་བླ་ན་མ་མཆིས་ཤིང་གོང་ན་མེད་པ་ཉིད་དེ། དེའི་སྐུའི་བཀོད་པ་ཇི་འདྲ་བར་བཞུགས་པ་དེ་འདྲ་བར་ཡིད་ལ་ཇི་བཞིན་བསྒོམ་ཞིང་། མཆོད་ཅིང་བསྟོད་པ་དང་། དད་ཅིང་མོས་པའི་སྒོ་ནས་རྣམ་ཐར་རྗེས་སུ་དྲན་པ་དང་། གདུང་ཤུགས་དྲག་པོས་བྱིན་རླབས་ཞུས་པ་སོགས་ཡིན་ན། ཚོགས་ཀྱི་གསོག་སྟོབས་རྒྱུན་ལྡན་ལས་ཀྱང་ཤིན་ཏུ་ཆེ་བ་སྨོས་མ་དགོས་པས། དེའི་ཆེད་དུའང་མདོར་བསྡུས་ན་རྗེ་བླ་མ་ཙོང་ཁ་པ་ཆེན་པོ་ནི། སྐུ་བརྗིད་ཆེ་བ་དང་དཔའ་ཞིང་དེས་པའི་ཆ་ནས་༧པཎ་ཆེན་རིན་པོ་ཆེ་སྐུ་གོང་མ་སྐུ་ཕྲེང་བཅུ་བ་ཆེན་པོ་དང་ཇི་འདྲ་བ་དེ་འདྲ་བར་ཡོད་པ་དང་། གསུང་ཚངས་པའི་དབྱངས་འགག་པ་མེད་ཅིང་དེས་ཤིང་འབོལ་བ་དང་། མཁས་ཤིང་མཛངས་བཀྱེད་སོགས་ཀྱི་ཆ་ནས་༧སྐྱབས་མགོན་རིན་པོ་ཆེ་དང་ཇི་ལྟ་བ་དེ་ལྟ་བུར་བཞུགས་པ་ཁོ་ནའོ། ད་དུང་གོང་དུ་དྲངས་པའི་རྣམ་ཐར་དང་། རྣམ་ཐར་གཞན་དང་གཞན་ནས་ཀྱང་ཐོན་པ་དང་། མདོ་སྨད་ཀྱི་གནའ་བོའི་ངག་རྒྱུན་ལའང་། དེ་དུས་དབུས་གཙང་དུ་རྗེ་བླ་མ་འདི་བ་ལ་ཨ་མདོ་སྣ་བོ་ཆེ་ཞེས་ཞུ་རིགས་ཡོད་ཚུལ་གཉིས་མཐུན་ཚབས་ཆེ་བས། རྗེ་མཁས་གྲུབ་པས་ཀྱང་སྨིན་མ་འཇར་ཞིང་ཤངས་ཀྱི་གཟེངས་མཐོ་བར་གསུངས་པ་དང་། རྗེ་གཟིགས་པ་ལྔ་ལྡན་གྱི་གཟིགས་པ་བཞི་བར་སྤྱན་དང་ཤངས་ཆེ་བར་གཟིགས་ཚུལ་དང་། གོང་གི་མཁན་ཟང་ཟང་ནེ་རིང་བའི་རྗེའི་རྣམ་ཐར་གྱི་གསུང་བགྲོས་སོགས་གོང་བསྒྲིགས་སྟེ། རྗེའི་འདྲ་སྐུ་སོགས་ལའང་དཔོག་པ་ཡིན་ན། ཁྱད་པར་དུ་རྗེ་སྐུ་ཞབས་སྨྱུང་མ་ལ་བལྟ་བ་ཡིན་ན། རྗེ་བླ་མའི་ཞལ་དབྱིབས་གནས་སྟངས་ནི་ད་ལྟའི་མདོ་སྟོད་པ་བློ་བཟང་སེང་གེ་དང་འདྲ་བོ་ཞིག་མེད་དམ་སྙམ་པ་ཞིག་འདུག་གོpQIརྗེ་ཙོང་ཁ་པའི་དྲ་བ།

   ཅེས་རྗེ་བླ་མ་ཙོང་ཁ་པ་ཆེན་པོ་རང་ཅག་སྐྱེས་འགྲོ་ཡོངས་ཀྱི་དཔལ་མགོན་དམ་པར་སྐུའི་མེ་ཏོག་གི་འདབ་ལག་མངོན་པར་བཞད་དེ། མི་ལོ་དྲུག་བརྒྱ་དྲུག་ཅུ་འཁོར་བའི་རྗེས་དྲན་ལ། ཨ་ཚོགས་མཁས་བཙུན་གྱིས་རྗེ་སྐུ་འབུམ་གསེར་གདུང་ཆེན་མོའི་ཁྱམས་སུ་ཉིན་འགར་ཕྱག་འཚལ་བའི་འཕྲོས་ལ་རག་ཟིག་ཏུ་བཀོད་པའོ།pQIརྗེ་ཙོང་ཁ་པའི་དྲ་བ།

 ཕྱི་ལོ་༢༠༡༧ བོད་ཟླ༦ ཚེས༤ཉིན།pQIརྗེ་ཙོང་ཁ་པའི་དྲ་བ།

  དཔྱད་གཞི་ཡིག་ཆ།pQIརྗེ་ཙོང་ཁ་པའི་དྲ་བ།

༡ རྗེ་བླ་མ་ལྷོ་བྲག་གྲུབ་ཆེན་དང་མཇལ་ཚུལ་གྲུབ་དབང་རང་གིས་མཛད་པ། pQIརྗེ་ཙོང་ཁ་པའི་དྲ་བ།

༢ རྗེ་མཁས་གྲུབ་པའི་རྗེའི<རྣམ་ཐར་དད་པའི་འཇུག་ངོགས> <གསང་རྣམ་རིན་པོ་ཆེའི་སྙེ་མ>pQIརྗེ་ཙོང་ཁ་པའི་དྲ་བ།

 ༣ རྗེ་རྟོགས་ལྡན་འཇམ་དཔལ་རྒྱ་མཚོའི་རྗེའི<རྣམ་ཐར་ལེགས་བཤད་ཀུན་འདུས>དེའི་<རྗེའི་གསང་རྣམ> pQIརྗེ་ཙོང་ཁ་པའི་དྲ་བ།

༤ རྗེ་ལེགས་བཟང་བའི་རྗེའི་གསང་རྣམ<རབ་གསང་རྨད་བྱུང་གཏམ་གྱི་དགའ་སྟོན>pQIརྗེ་ཙོང་ཁ་པའི་དྲ་བ།

 ༥ འབྲུག་རྒྱལ་དབང་བའི་རྗེའི་རྣམ་ཐར<ངོ་མཚར་ནོར་བུ་ཕྲེང་བ> pQIརྗེ་ཙོང་ཁ་པའི་དྲ་བ།

༦ མཁན་ཟང་ཟང་ནེ་རིང་བ་འཆི་མེད་རབ་རྒྱས་ཀྱི་རྗེའི་རྣམ་ཐར<དད་ལྡན་དགའ་བྱེད> <ནོར་བུའི་བང་མཛོད> <གསེར་གྱི་མཆོད་སྡོང་> <ཁ་སྐོང་གསེར་གྱི་མྱུ་གུ>pQIརྗེ་ཙོང་ཁ་པའི་དྲ་བ།

 ༧ བྲག་སྒོ་རབ་འབྱམས་པའི་རྗེའི་རྣམ་ཐར་<ངོ་མཚར་ལུང་བསྟན་གྱི་རོལ་མོ> pQIརྗེ་ཙོང་ཁ་པའི་དྲ་བ།

༨ སྒོ་མང་བ་དོན་གྲུབ་བསྟན་པའི་རྒྱལ་མཚན་གྱི་རྗེའི་རྣམ་ཐར་<རྣམ་དཀར་དད་པ་རྒྱ་མཚོར་རོལ་བའི་འཇུག་ངོགས>pQIརྗེ་ཙོང་ཁ་པའི་དྲ་བ།

 ༩ ཆ་ཧར་བློ་བཟང་ཚུལ་ཁྲིམས་ཀྱི་རྗེའི་རྣམ་ཐར་<བདེ་ལེགས་ཀུན་འབྱུང་>pQIརྗེ་ཙོང་ཁ་པའི་དྲ་བ།

 ༡༠ འཇམ་དབྱངས་ཁ་ཆེ་བའི<རྗེའི་བསྟོད་པ་ཙོང་ཁ་བརྒྱད་ཅུ>pQIརྗེ་ཙོང་ཁ་པའི་དྲ་བ།

རྩོམ་སྒྲིག་པ།:མཁའ་ཚེ།
བརྒྱུད་འགོད།  
29.1K